Pak orë para nisjes së protestës së Partisë Demokratike para kryeministrisë, Sali Berisha ka zbuluar në një deklaratë për mediat nga selia blu, skenarët e tubimit nga demokratët.

Berisha tha se skenari i protestës është skenari i një kryengritjeje të fuqishme paqësore. Ai theksoi se janë të vendosur të mbrojnë me çdo çmim vlerat e përbashkëta që njerëzit e lirë ndajnë në Shqipëri dhe në botë.

“Skenari i protestës është skenari i një kryengritjeje të fuqishme paqësore, që do të përcillet sot më shumë se kurrë në vatrat e të gjithë shqiptarëve, por edhe në Bruksel, SHBA dhe qendra të tjera kryesore, për të dëshmuar se ne nuk mposhtemi kurrë nga një narkokraci dhe se jemi të vendosur të mbrojmë me çdo çmim vlerat e përbashkëta që njerëzit e lirë ndajnë në Shqipëri dhe në botë”, tha ai.

Berisha shtoi se skenari i sotëm zhvillohet pas dështimit të fazës së parë të grushtit të shtetit dhe pas inicimit të fazës tjetër nga Edi Rama.

“Skenari i sotëm zhvillohet pas dështimit të fazës së parë të grushtit të shtetit dhe pas inicimit të fazës tjetër nga Edi Rama. Ai zhvillohet gjithashtu pas “kartonit të zi” që iu nxor në Bruksel një njeriu që, për të mbuluar vjedhjet e tij, është i gatshëm t’i vërë flakën një procesi aq jetik sa integrimi në BE, ëndrra më fisnike e shumë brezave, për Shqipërinë zonjë në Europë”, u shpreh kryedemokrati.

Analisti Baton Haxhiu, i ftuar në emisionin “Të Paekspozuarit” në MCN TV, ka zbuluar se Belinda Balluku i ka ofruar Edi Ramës dy herë dorëheqjen, por kryeministri nuk e ka pranuar. 

Haxhiu thotë se Rama në këtë rast po bën betejë për parimin dhe nuk lejon që pezullimi të jetë një instrument i drejtësisë për të ndryshuar përbërjen e qeverisë. 

“Belinda Balluku ka ofruar dorëheqjen edhe herën e parë, kur Dritan Prençi, e vendosi në lëndën e tij si të pandehur. Edhe sot në mëngjes zonja Balluku ka ofruar dorëheqjen.

Zoti Rama në statusin e tij e tregon arsyen se përse nuk e pranon dorëheqjen. Jam munduar ta dekonstruktoj statusin e tij. SPAK-u, por edhe GJKO, e kanë njëfarë autoriteti moral të momentit dhe një përkrahje të jashtëzakonshme te qytetarët.

Kjo i ka shtyrë të sjellin vendime apo akt-akuza, që nuk e kanë vlefshmërinë maksimale të fakteve. Për faktin se kanë autoritetin moral, ata duhet të kërkojnë maksimumin për të ndërtuar një akt-akuzë. Sidomos për figurat si ministra apo anëtarë të qeverisë.

Meqenëse nuk është bërë, erdhi momenti i ballafaqimit mes institucioneve të drejtësisë dhe qeverisë, pasi autoriteti moral i SPAK e tejkaloi vetëveten duke kërkuar pezullimin e ministrit. Natyrshëm, Rama nuk pranon dorëheqjen e Ballukut, sepse nuk e pranon pezullimin si instrument për të ndryshuar ekzekutivin. Është nderhyrje mes dy pushteteve. Pikërisht se Rama kërkon parimin dhe jo çështjen Balluku si çështje. Ajo e ka ofruar dorëheqjen. I është pezulluar funksioni edhe herën e parë edhe tashmë. Meqenëse kemi pezullim, na mbeten në tregun e drejtësisë dy masa, njëra kërkimi i imunitetin dhe tjetra, ajo e pezullimit, pasi GJK e la të tillë”, tha Haxhiu. 

Grupi Parlamentar i Partisë Socialiste është mbledhur mëngjesin e kësaj të hëne ku i pranishëm në mbledhje ishte Edi Rama dhe Belinda Balluku, e cila tashmë është e pezulluar nga posti i zv/kryeministres dhe ministres së Infrastrukturës.

Pasi “i urdhëroi mirë të vetët”, Edi Rama ka zbuluar në rrjetin social X tre konkluzionet që ka dalë PS pas mbledhjes së Grupit Parlamentar mbi vendimin e fundit të Gjykatës Kushtetuese dhe rivendosjen e pezullimit të për zv/kryeministres.

Pasi nuk la gur pa lëvizur për të shpëtuar krahun e tij të djathtë nga prangat, Rama shprehet se funksionet e padelegueshme kushtetuese, nuk mund të pezullohen nga askush. Sipas tij grupi parlamentar socialist do të angazhohet për zgjidhjen përmes ndërhyrjes në legjislacion, ndërsa thekson s ee vetmja palë e përmbushur nga rikthimi i pezullimit është SPAK-u.

Postimi i Ramës:

3 konkluzione nga mbledhja e Grupit Parlamentar pas mosvendimit të Gjykatës Kushtetuese dhe rivendosjes së pezullimit të ministres nga:

1. Funksionet e padelegueshme kushtetuese, nga ai i anëtarit të qeverisë tek ai i Presidentit të Republikës dhe jo vetëm, nuk mund të pezullohen kurrësesi nga askush duke u nisur nga një emër përveçëm, sepse pezullimi paralizon funksionin, pra institucionin që ai/ajo drejton.

2. Nisur edhe nga leximi i deklaratës publike të Gjykatës Kushtetuese, ku të gjithë anëtarët e trupës shfaqen unanimë lidhur me problemin, po ndahen tek rrugëzgjidhja, grupi parlamentar socialist do të angazhohet për zgjidhjen përmes ndërhyrjes në legjislacion.

3. E vetmja palë e përmbushur nga rikthimi i pezullimit është SPAK-u, që në kushtet e pezullimit mund të vazhdojë krejt qetësisht hetimin përkatës, ndërkohë që deri në adresimin ligjor të zgjidhjes nuk ka asnjë urgjencë për të trajtuar kërkesën që SPAK-u bëri pas rënies së masës së pezullimit.

Një shtesë nga ana ime:

SPAK-u nuk preket, vetëm mbështetet. Liria dhe e drejta e çdo prokurori për të hetuar çfarëdoqoftë e këdoqoftë nuk preken, vetëm garantohen. Pavarësia kushtetuese e pushtetit legjislativ dhe ekzekutiv, gjithashtu nuk preken. Vetëm garantohen.