Ish-kryeministri Sali Berisha ka pritur ditën e sotme në një takim ambasadorin italian në vendin tonë, Alberto Cuttilo.

Me anë të një postimi në rrjetin social në Facebook ai shprehet se me Cuttilo-n diskutoi mbi situatën politike në vend, dhe ndërkohë e ka falenderuar në lidhje me mbështetjen e vlefshme të treguar në raport me kauzën për zgjedhje të lira dhe të ndershme.

Ndër të tjera Berisha shkruan se në bisedën me Ambasadorin italian në Shqipëri ka theksuar se në takim ka ngritur dhe shqetesimin se, sot, opozita përballet me malin e drogës dhe paratë e këtij mali që u krijuan më së pari, për qëllime elektorale.

“Këtë vit, Shqipëria u mbulua nga droga në çdo skaj të saj, sepse kjo ishte një politikë qeveritare e pashpallur e Edi Ramës për qëllime elektorale… ngrita shqetesimin se, sot, opozita përballet me malin e drogës dhe paratë e këtij mali që u krijuan më së pari, për qëllime elektorale”, shkruan Berisha në postimin e tij.

Ndërkohë, ish-kryeministri theksoi se sot vendi ndodhet në një situatë të vështirë dhe të rrezikshme, e cila mund ta çojë atë drejt desabilizimit. Ai theksoi se një opozitë, kudo në botë, ka si mision kryesor: zgjedhjet.

Gjatë një takimi me banorët e Paskuqanit, ish-ministri i Punëve të Brendshme Saimir Tahiri ka folur me tone të larta kundër kritikëve të qeverisë.

Në fjalën e tij Tahiri la të nënkuptuar dhe disa mesazhe që ia adresoi aleatit në qeverisje, LSI, ndërsa shtoi se për ca vota më shumë dalin në lajme dhe shajnë.

Në 18 qershor do ketë zgjedhje, duhet të shkojmë në zgjedhje të gjithë bashkë. Në fakt në 18 qershor vendosni ju, vendosin qytetarët dhe bëni gabim të mendoni se qeverisja e ardhshme vendoset në korridoret e qeverisë së madhe. Politika e televizorit del herë me sharje, herë me llum, por qeverisja e ardhshme përcaktohet këtu, në çdo familje. Në çdo rrugë të Paskuqanit, Babrrusë, në çdo shtëpi.

Qeverinë e ardhshme e keni ju në dorë, dhe jo në korridoret e politikës. Duhet të shash qeverinë që të dalësh në lajme, që të bësh lajm, që të mbledhësh ca vota më shumë. Sa më shumë sulmojnë aq më shumë duan të na tërheqin në vorbullën e sherrit, t’i thonë se ‘ja ku jemi të gjithë njësojë, dhe ndaj s’ka rëndësi se ku e çojmë votën’. Sa më shumë sulmojmë ata, aq më shumë me qytetarët duhet të flasim, aq më shumë duhet të bëjmë, aq më fortë duhet të luftojmë të gjithë bashkë. Përgjigja jonë është puna, për çdo sulm, për çdo akuzë, për çdo baltë që hedhin ndaj nesh. Ne jemi të vetëdijshëm që do na gjykojnë për punën, jo për llafet.”, tha Tahiri.

Ish-deputeti i Partisë Socialiste Koço Kokëdhima, i njohur si një ndër njerëzit më të afërt të Kryeministrit Rama deri para disa muajsh, ka rrëfyer në një komunikim në Universitetin Europian të Tiranës, historinë e tij në politikë dhe situatën që ai ka gjetur kur ka hyrë në PS.

Kokëdhima ka lançuar një lëvizje brenda PS-së të quajtur ‘Zgjidhja’ të cilën ai e paraqet para socialistëve si mënyrën e vetme që pushteti të delegohet në duart e popullit.

Pyetur nga pedagogia Belina Budini, Kokëdhima ka treguar situatën që ka gjetur kur është bërë pjesë e PS-së.

Në 2013 që shkova në Partinë Socialiste si deputet ishte një situatë e paimagjinueshme për një njeri të biznesit, mjedisi ishte agresiv, nuk kishte qetësi, nuk mund të kishte takime që njerëzit të flisnin me normalitet me njëri-tjetrin, njerëzit ishin aq agresivë, shikoja njerëz që kapeshin për flokësh, kuti që fluturonin nga penxherja. Ishte një situatë e paimagjinueshme atje poshtë që tregonte se këta nuk qeveriseshin dhe nuk kishte mirëkuptim”- thotë ai.

Kjo situatë sipas Kokëdhimës është bërë shkaku që e ka bindur që nga një sipërmarrës të kthehet në një politikan aktivë.

Si njeri biznesi kur konstaton një problem, nuk qan as nuk ankohet, por planifikon një zgjidhje. Në shtator 2013 kam filluar këtë debat brenda partisë. Si mund të kemi përgjigje për njerëzit për çdo çështje. Ajo që më pengoi është kjo se Partitë politike në Shqipëri dhe baza e tyre, anëtarësia dhe qytetari i thjeshtë nuk kanë asnjë lidhje. Ka një hendek aq të madh mes tyre saqë reflektohet dhe në qeveri. Po ashtu dhe qeveria është aq larg njerëzve, problemeve të tyre saqë duket i pamundur të mbyllet ky hendek”.

Sipas Kokëdhimës zgjidhja gjendet në një propozim radikal për një Kushtetutë të re të vendit.

Një Kushtetutë që është në standardet e një rregulloreje të një instituciuoni. Është me përkufizime që janë larg parimeve dhe mënyrave të  gjithëpranuara për ndërtimin e kushtetutave kudo. Së dyti kjo kushtetutë do të duhej që të garantonte moscënimin e sovranitetit kombëtar pasi nuk është diçka që negociohet, është diçka që nuk cënohet kurrë”- thotë ai.

Deputeti socialist Taulant Balla në një takim me të rinjtë e Elbasanit për t’ju përgjigjur deputetes së LSI-së, Monika Kryemadhi për akuzat e kësaj të fundit mbi reformën në drejtësi.

Duke e ironizuar, Balla thotë se LSI-ja po bën opozitë në vend të asaj të vërtetës që ka bojkotuar institucionet dhe proteston para kryeministrisë.

Balla kujton deputetes aleate se deklaratat e saj bëhen me qëllim që të manipulojë brezin e ri.

“Sulmi ndaj reformës në arsim bëhet për të manipuluar brezin e ri, pasi të vetmen opozitë që kemi e kemi brenda vetes”,- tha Ballla.

Pak ditë më parë, deputetja e LSI-së Monika Kryemadhi kritikoi ligjin e arsimit të lartë dhe reformën në arsim të cilën e cilësoi një pseudoreformë, si dhe u përplas me deklarata me ministren e Arsimit Lindita Nikolla

Një grup ndërministror në përbërje të të cilit është edhe ushtria si dhe shërbimet inteligjente, do t’i shpallë luftë kanabisit në Shqipëri.

Zv.Kryeministri Niko Peleshi prezantoi planin antikanabis të miratuar nga këshilli i Ministrave, duke dhënë detaje për mënyrën se si do të funksionojë.

Sipas Peleshit, grupi që ta drejtojë vetë ai, do të ketë qëllim goditjen që në gjenezë të fenomenit.
Në strategji, parashikohen dënime mjaft të ashpra ndaj zyrtarëve që nuk do ta kenë nën kontroll territorin për të cilin janë përgjegjës, ndërsa plani do të shoqërohet edhe me vettingun e tyre.
Pas deklaratës së zv.kryeministrit, i shpejtë ishte reagimi i ish-ministrit të Drejtësisë Ylli Manjani, i pari që ka propozuar përfshirjen e ushtrisë në luftën kundër kanabisit, gjë që shkaktoi edhe përplasje politike.
“E përshëndes Zv.kryeministrin që pranoi sugjerimin tim për futjen e ushtrisë në luftën antikanabis. Zoti Peleshi është i vetmi që dëgjon.”
Paketa e masave përfshin edhe ndërgjegjësimin publik, lehtësimin e barrës fiskale dhe mbështetjen sociale për individët dhe komunitetet nën risk.
Fjala e Niko Peleshit
Sot, Këshilli i Ministrave miratoi Planin e veprimit kunder Kultivimit dhe Trafikimit te Kanabisit 2017-2020.
Ky plan përfaqëson një dokument strategjik të Qeverisë Shqiptare që do të udhëheqë të gjithë përpjekjen ndërinstitucionale kundër kultivimit dhe trafikimit të kanabisit në vendin tonë.
Ky plan është finalizimi i një procesi të iniciuar nga Kryeministri Edi Rama dhe të mbështetur fuqimisht nga partnerët tanë ndërkombëtarë, të cilët gjej rastin ti përshëndes dhe t’i falenderoj per kontributin e cmuar.
Në zbatim të Urdhrit të Kryeministrit nr. 170, datë 23.11.2016 një grup ndërministror, i kryesuar nga Zëvendëskryeministri, dhe një grup ekspertësh nga të gjitha institucionet, i kryesuar nga Këshilltari i Kryeministrit Sander Lleshi, kanë punuar për hartimin e planit. Në këtë proces intensiv janë përfshirë edhe shumë ekspertë nga BE dhe organizata e vende të tjera partnere.
Nëpërmjet këtij plani, qeveria shqiptare, parashikon marrjen e të gjitha masave të nevojshme për parandalimin e kultivimit dhe trafikimit të kanabisit në vend.
Kultivimi dhe trafikimi i kanabisit është evidentuar si fenomen në Shqipëri që në vitin 1991. Vitet në vijim, kanë qwnw një duel i pandërprerë mes institucioneve ligjzbatuese dhe rrjeteve e grupeve të trafikimit.
Tolerimi zyrtar dhe mbështetja e hapur politike e kultivimit të kanabisit në komunën e Lazaratit të qarkut Gjirokastër e më gjerë deri në vitin 2013, krijoi kushte të favorshme për grupet kriminale, të cilat, për më shumë se një dekadë, arritën të konsolidojnë financat, rrjetet, tregjet dhe lidhjet politike.
Modeli negativ i krijuar në Lazarat ndikoi shumë, jo vetëm në fuqizimin e shumanshëm të grupeve dhe rrjeteve kriminale, por edhe në inkurajimin e kultivimit të kanabisit në rajone të tjera të vendit.
Goditja e suksesshme kundër grupeve dhe rrjeteve kriminale në Lazarat në vitin 2014, solli si pasojë, që energjitë kriminale të përqendruara në këtë rajon të shpërndahen në drejtime të tjera në vend.
Theksi kryesor i Planit Kombëtar kundër Kanabisit është përpjekja e përbashkët ndërinstitucionale për goditjen e gjithanshme/ frontale që ka për qëllim identifikimin, zbulimin dhe shkatërrimin e grupeve dhe rrjeteve kriminale që janë aktive në fushën e kultivimit dhe të trafikimit të kanabisit.
Duke filluar nga ky vit Policia e Shtetit, organet ligjzbatuese dhe të gjitha institucionet e tjera që kanë lidhje do të angazhohen në një operacion të gjerë dhe të kombinuar, e theksoj te kombinuar i cili do të sigurojë identifikimin e hershëm dhe goditjen që në gjenezë të përpjekjeve për kultivim apo trafikim.
Në shërbim të këtij operacioni, ne perberje te TASK FORCES QENDRORE DHE TASK FORCAVE LOKALE do të jenë kapacitetet e Policisë së Shtetit, të shërbimeve inteligjente, të ushtrisë, të bujqësisë, të mjedisit, të shëndetësisë, ato të pushtetit vendor, partnerët ndërkombëtarë etj..
Plani parashikon masa serioze ndaj të gjithë zyrtarëve të nivelit qendror dhe lokal, të cilët nuk arrijnë të mbajnë në administrim e kontroll efektiv territorin për të cilin janë përgjegjës. Po ashtu, një proces vlerësimi dhe vetingu ndaj zyrtarëve me përgjegjësi në këtë fushë do të shoqërojë procesin e zbatimit të planit.
Identifikimi dhe sekuestrimi i aseteve të krijuara nga veprimtaritë kriminale është një kriter i rëndësishëm për të matur shkallën e suksesit në përballjen me fenomenin e kanabisit.
Përveç theksit të fortë goditës kundër grupeve, rrjeteve dhe financave kriminale që nxisin dhe organizojnë kultivimin dhe trafikimin, Plani i kushton një rëndësi të veçantë masave që kontribuojnë në shkurajimin e qytetarëve për t’u përfshirë në veprimtari të paligjshme në këtë fushë.
Një paketë shumë e gjerë masash që synojnë ndërgjegjësimin publik, nxitjen dhe mbështetjen e veprimtarisë ekonomike të ligjshme në zonat dhe komunitetet e prekura, lehtësimin e barrës fiskale dhe mbështetjen sociale për individët dhe komunitetet nën risk është përcaktuar në Planin Kombëtar kundër Kanabisit.
Bashkëpunimi ndërkombëtar konsiderohet si një prioritet tjetër i rëndësishëm për suksesin e përpjekjes kundër kanabisit.
Zbatimi i Planit Kombëtar Kundër Kanabisit përbën një prioritet të rëndësishëm të Qeverisë dhe të institucioneve. Viti 2017 do të shënojë pa asnjë dyshim një kulm të rëndësishëm në goditjen e fenomenit të kanabisit në Shqipëri.
Me këtë rast ftoj të gjithë qytetarët, aktorët e shoqërisë civile, mediat dhe partnerët ndërkombëtarë të bashkohen me përpjekjet e institucioneve për të kontribuar në arritjen e vizionit “Për një Shqipëri të çliruar nga bimët narkotike, ku dinjiteti, mirëqenia dhe siguria e qytetarëve bazohen tek puna e ndershme dhe respekti ndaj ligjit”, që udhëheq planin e ri.