Gjykata e Krimeve të Rënda ka shpallur fajtor ish-gjyqtarin e Beratit Shyqyri Çobo, i akuzuar se ka kërkuar favore seksuale.
Në vendimin e ditës së sotme Çobo u dënua me dy vite burg, i cili do të konvertohet në 18 muaj shërbim prove.
Gjithashtu sipas këtij vendimi, për 5 vite ai nuk mund të mbajë funksione publike.
Ndërkohë Prokuroria për Krime të Rënda kërkoi ndaj tij dënimin me 3 vite burg, si i akuzuar për veprën penale të “Korrupsionit pasiv të gjyqtarit” në formën e kërkimit të favoreve seksuale, dënim i cili u ul nga gjykata.
Ish-gjyqtari i Beratit u denoncua nga një grua e cila ishte në proces divorci, se e ka ngacmuar seksualisht përmes mesazheve dhe telefonatave, duke kërkuar lidhje intime.
Fillimisht i ka premtuar se do i gjente një avokat dhe nëpërmjet mesazheve të tij, i ka kërkuar lidhje në mënyrë që procesi gjyqësor të ishte në favor të saj.
Organi i akuzës thotë se Çobo e ka marrë rreth 300 herë në telefon denoncuesen, përveç mesazheve të shumta të dërguara në harkun kohor të tre muajve,
Disa nga mesazhet e dërguara nga ish-gjyqtari
-“Ende s’jam investuar në dobinë tuaj… Ndonëse statura juaj sociale post-martesore për një person që unë disponoj do të jetë ekzigjencë jetësore, kuptohet që të shijosh “triumf…do të flasim!! Ok.
-“Në qartësinë time sundon “Ideja” standarde se fshati xxxx përbëhet nga “komunitete ‘që në aspektin intelektual demonstrojnë DEFICENCË!!! Shtetas të quajtur Y.T. (babai i kallëzueses), për të qenë i sinqertë -Jo, nuk mendoj se e njoh… Gjithsesi, do komunikojmë gjykoj… Si mendon ?/ Ok??”
-“Mirëmbrëma. Ju jeni potencialisht e emancipuar. E kupton se “Miqësia që të njoh progres- kërkohet komunikim dhe jo heshtje, aq më keq druajtje… Mirënjohje!!”
-“Kurani shprehet se “Ndjenja njerëzore më fisnike që Zoti i ka dhuruar njeriut është dashuria”!!”
-“Unë konstatova se “sharmi yt femëror ishte tepër joshës dhe femëror, mos u prezanto me “modesti (thjeshtësi) të tepruar… do më falësh 100 herë, por “modestia “e tepruar është veti e njeriut ‘Naiv’ (budalla)…për atë performancë që ke, duhet të ndjehesh krenare! Ok?
