“Opozita është shumë e qartë për ti dhënë Shqipërisë një shans të ri, ky është shansi i fundit për ta çuar Shqipërinë drejt Bashkimit Europian”.
Kështu tha kryetarja e Lëvizjes Socialiste për Integrim, Monika Kryemadhi në nisje të protestës së sotme para Parlamentit.
Ajo deklaroi se dhuna vjen vetëm nga qeveria dhe se këtë po e faktojnë edhe ndërkombëtarët.
Sipas saj, kjo është mundësia e fundit që i jepet jo vetëm politikës shqiptare por edhe Partisë Socialiste.
Lidhur me shtyrjen e sencës së sotme parlamentare, Kryemadhi e cilësoi si frikë, “Vetëm ai që ka bërë gabime ka frikë! Ai që është me të drejtën e tij, nuk ka pse ktë ketë frikë. por përballet me opinionin publik dhe zhvillon seancë”.
E pyetur lidhur me faktin se deputeti i LSI, Lefter Koka nuk e dogji mandatin, ajo tha, “Zgjedhja e tij! Prandaj ne kërkojmë demokraci, në demokraci çdo njeri është i lirë të bëj atë që do”.
Protesta e sotme vjen vetëm pak orë pasi deputetët demokratë dhe ata të Lëvizjes Socialiste për Integrim, hoqën dorë nga mandatet parlamentare.
Ndërkohë seanca parlamentare e ditës së sotme u shty nga kryeparlamentari Gramoz Ruçi, me synim shmangien e çdo incidenti të mundshëm.
