Veliaj për mediat italiane në Romë: Europa është një destinacion brenda nesh. Sot shqiptarët janë të lirë për të besuar, udhëtuar dhe për të qenë europianë

0
14
Zjarr Televizion Ad This is a sample article. ...

Gjatë vizitës së tij në Romë dhe në Vatikan, ku u prit nga Papa Françesku, kryebashkiaku Erion Veliaj, ka dhënë edhe një intervistë për televizionin italian Rai Tre, lidhur me përvojën e Tiranës si Kryeqyteti Europian i Rinisë 2022 dhe se çfarë e pret vitin tjetër, tani që sapo ka marrë titullin e Qytetit Europian të Sportit.

Veliaj shprehet se qyteti i Tiranës e meriton plotësisht këtë vlerësim, pasi prej vitesh ka treguar se është e zonja të organizojë evente të këtyre përmasave, por edhe të mirëpresë njerëz nga zona në konflikt, siç janë edhe ukrainasit e përfshirë nga agresioni rus.

“Europa nuk është një destinacion jashtë nesh, por një destinacion brenda nesh. Ne kemi qenë një vend emigrantësh, male njerëzish hipnin mbi anije për të ardhur këtu, kurse tani, prej mëse 10 vjetësh kemi mikpritur opozitën iraniane, vitin e kaluar mikriptëm afganët, kurse këtë vit ukrainasit. Ndaj, besoj se të gjitha vendet mund të ndryshojnë. Nëse ka ndryshuar Shqipëria, pas regjimit të egër komunist, të gjitha vendet mund të ndryshojnë dhe të mirëpresin njerëz me dinjitet”, u shpreh Veliaj.

“Unë i përkas brezit të viteve ‘80, kur në Shqipëri ishte i ndaluar besimi fetar. Po ashtu, nuk mund të përdoreshin emrat e Biblës apo të Kuranit. Pra, unë jam shembulli i një bote që tashmë ka kaluar. Kemi vuajtur shumë, por tashmë jemi të lirë. Të lirë për të besuar, të lirë për të udhëtuar, të lirë për të qenë evropianë”, shtoi ai.

Zjarr Tv Ad