Kryebashkiaku Erion Veliaj e konsideron transferim politik zhvendosjen e tij nga paraburgimi i Durrësit në atë të Fierit.

Përmes një reagimi në rrjetet sociale ai thekson se kemi të bëjmë me një rrëmbim policor që i cënon rëndë të drejtat. 

Veliaj i kërkon Ministrit të Drejtësisë, Avokatit të Popullit dhe Komitetit Shqiptar të Helsinkit të ndërhyjnë urgjentisht, të verifikojnë arsyet dhe shkaqet e këtij transferimi, që sipas tij është politik.

REAGIMI

Sot, një grup punonjësish të Policisë së Burgjeve, të dërguar nga Drejtoria e Përgjithshme e Burgjeve, janë paraqitur në IEVP Durrës për të më transferuar në burgun e Fierit.

Pavarësisht kërkesave të përsëritura, si nga unë ashtu edhe nga avokati im, për t’u njohur me aktin që urdhëron transferimin dhe arsyet që e justifikojnë atë, na është refuzuar vënia në dispozicion e këtij dokumenti.

Një transferim i detyruar, pa më bërë të njohur aktin dhe arsyet ligjore mbi të cilat mbështetet, për mua përbën një rrëmbim policor dhe cenon rëndë të drejtat e mia.

Unë nuk kam dhënë pëlqimin për këtë transferim dhe kam kundërshtuar mënyrën se si po realizohet, pa transparencë dhe pa më mundësuar ushtrimin efektiv të të drejtave të mia ligjore.

I kërkoj publikisht Ministrit të Drejtësisë, Avokatit të Popullit dhe Komitetit Shqiptar të Helsinkit të ndërhyjnë urgjentisht, të verifikojnë arsyet dhe shkaqet e këtij transferimi politik.

Erion Veliaj

Belinda Balluku u paraqit mëngjesin e kësaj të mërkure në ambientet e SPAK, ku iu komunikua mbyllja e afatit të hetimeve.

Gazetarja Anila Hoxha, në një lidhje direkte në “Breaking me Fiori Dardha” në Top News, zbuloi detaje rreth kësaj çështjeje.

“Ballukut i është komunikuar mbyllja e hetimeve, plot 8 ditë nga data 20 tetor, ku iu komunikuan një sërë akuzash.

Belinda Balluku, me komunikimin e mbylljes së afatit të hetimeve dhe deri sa t’i komunikohet të gjithëve kjo procedurë, më pas, sapo të përfundojë edhe i fundit i dyshuar, do t’i vendosen në dispozicion fashikujt dhe materialet e tjera hetimore. Të pandehurit do të kenë 10 ditë kohë për të depozituar pretendimet e tyre. Derisa të mbarojë ky afat, Prokuroria e Posaçme do të ketë kohën e saj për ta çuar çështjen në gjykatë.

Belinda Balluku, si ish-zv.kryeministre dhe ish-ministre e marrë e pandehur, ndaj saj do të ketë një gjykim bazuar vetëm në dy masa sigurie personale, të shpallura në 2025, njëra ndalim për të dalë jashtë vendit dhe tjetra, pezullim nga detyra.

Në tetor të vitit të kaluar, Belinda Balluku e kaloi për herë të parë pragun dhe i është komunikuar menjëherë vepra penale për shkelje mbi barazinë në tendera.

Bëhet fjalë për shkelje të barazisë në tendera, me një faturë të dyshuar sipas SPAK-ut, me një vlerë 1,2 milionë euro, për 2 vila nën sekuestro preventive, derisa hetimet të përfundojnë, derisa të vërtetohet që SPAK-u ka të drejtë apo jo.

Balluku, megjithëse ishte me avokatin e saj mbrojtës, nuk ka dhënë asnjë shpjegim para Prokurorisë së Posaçme, edhe pse e kishte të drejtën e saj procedurale. Me sa duket, do të depozitohen në formën e një memoje me shkrim.

Me reformën në drejtësi të vitit 2016, është një e drejtë e gjyqtarit të seancës paraprake të vendosë nëse e çon për gjykim me hetimet që SPAK-u ka bërë deri tani, mund ta kthejë pas për veprime hetimore, ose…

Është kompetencë e gjyqtarit të seancës paraprake, pasi të dorëzohen fashikujt në gjykatë nga SPAK-u, të shohë”, tha ndër të tjera gazetarja.

 “Po punojmë për lëvizje politike”. Këtë paralajmëroi në Off the Record me Andrea Dangllin në A2 CNN politologu Ermal Hasimja, i cili theksoi se platforma e Forumit të Dialogut politik mbështetet në dy elementë kyçë; çlirimi i shtetit nga partia dhe çlirimi i ekonomisë nga politika.

“Po punojmë. Jemi një grup shumë i mirë, 30 veta aty janë studentë e pedagogë bashkë. Ne jemi aktorë politikë që në këtë moment. Mund të vendosim mbas një muaji, mbas 6 muajsh që të bëhemi parti. Po është diskutim tjetër. Për momentin ajo që është e rëndësishme për ne është që të kemi një grup me kohezion, me ide dhe këto ide i kemi prezantuar dhe përpara disa kohësh. Nuk mjafton sot të ndryshosh thjesht një emër me një tjetër, sepse problemi kryesor që kemi sot është sistemi dhe ky sistem e ka bërë të mundur sidomos me ato ndryshimet e 2008-ës që të kesh një lloj republike kryeministrore, jo tamam parlamentare por parlamentare kryeministrore. I ke dhënë jashtëzakonisht shumë pushtete kryeministrit dhe cilido edhe norvegjez dhe finlandez ta marrësh sot ta bësh kryeministrin do ta ketë atë tundimin e fortë për t’i ushtruar pushtetet që ka dhe për të marrë akoma më tepër sesa aq. Kemi dy elemente kyçë që janë në platformën tonë; një çlirimin e shtetit nga partia, sepse sot jemi në kushtet e një partie shtet që i kontrollon të gjitha në radhë të parë dhe dy dhe çlirimin e ekonomisë pastaj nga politika, sepse sot në qoftë se ti do të jesh një aktor i rëndësishëm në ekonomi, ti do ose s’do, do kalosh nga politika, politika prapë do përplaset me ty”, tha Hasimja.

Sipas tij sistemi ndryshohet vetëm në parlament ose me referendum.

“Ky sistem do ndryshojë aty ku u bë lëmsh, në parlament. Ndryshimi nuk ka për t’u bërë as në shesh, dhe ata që janë në shesh të gjithë e dinë e kanë të qartë këtë gjë ndryshimi do bëhet po në parlament ose me referendum kushtetues. Ne po ju themi njerëzve si forum pikërisht rrugën që duhet ndjekur për ta bërë këtë ndryshim. Dhe këtu ke një dua ta tregoj gjithë platformën se si duhet të bëjë kjo gjë, se kjo gjë nuk bëhet. Ti vendos një ditë e tani kemi vendosur të bëhemi të mirë e të ndershëm. Nuk funksionon kështu”, theksoi Hasimja.

Nga Klodian Tomorri

Një pabesi e tillë ndaj biznesit dhe sipërmarrjes vendase nuk ishte parë kurrë në historinë e tranzicionit shqiptar.

Vetëm tre ditë më parë, në mbledhjen zyrtare të Këshillit Tatimor, ministri i Financave, Petrit Malaj, u ul përballë dhomave të tregtisë dhe shoqatave të biznesit duke i parë në sy e duke i garantuar me zë të plotë se nuk do të kishte asnjë ndryshim taksash.

Madje sikur të mos mjaftonte kjo ministria e Financave u shpërndau bizneseve një paketë të rreme fiskale, e cila parashikonte vetëm disa ndryshime të papërfillshme më së shumti proceduriale. Por premtimi i ministrit karton të Financave zgjati më pak se 72 orë.

Mbrëmë, në orën 10 të natës, në pabesi të plotë dhe nën errësirën e mungesës së transparencës, qeveria u nisi bizneseve Paketën e re Fiskale 2027. Ajo që u zbulua nuk ishte thjesht një korrigjim teknik, por një ndryshim rrënjësor dhe një rritje e ndjeshme e taksave që godet në palcë ekonominë.

Paketën nuk e di askush se kush e ka bërë. E sigurtë është vetëm që ajo nuk është përgatitur nga ministria e Financave. Por kjo lëvizje e Edi Ramës dhe Petrit Malajt shënon herën e parë që në Shqipëri ndodh një rritje taksash kaq e dhunshme në fshehtësi, duke përdorur mashtrimin e hapur si instrument qeverisës.

Deri dje, reformat tatimore, sado të ashpra, të paktën kalonin në filtrin e debatit dhe konsultimit publik. Sot, kjo dyshe ka zgjedhur të sillet si një “qeveri e prapaskenave”, duke hartuar ligje në korridore të mbyllura dhe duke goditur pas shpine pikërisht ata që mbajnë me gjak e me djersë buxhetin e shtetit.

Projektligjet e reja parashikojnë masa shtrënguese që do të tronditin tregun: rritje të tatim-fitimit për korporatat në 17%, rritje të normës standarde të TVSH-së në 21%, dhe një goditje fatale për turizmin e agroturizmin duke e çuar TVSH-në e akomodimit nga 6% në 10%. Si të mos mjaftonte kjo, tatimi mbi dividendin pothuajse dyfishohet duke kërcyer në 15%.

Të gjitha këto ndryshime u mbajtën qëllimisht të fshehura deri në momentin e fundit për të shmangur rezistencën e natyrshme të grupeve të interesit.

Ky akt nuk është thjesht një politikë e gabuar ekonomike; është një dëshmi e qartë e mungesës së moralit shtetëror. Kur një qeveri gënjen hapur përpara se të fusë duart në xhepat e qytetarëve dhe sipërmarrësve të saj, ajo humb çdo legjitimitet dhe sillet si një grup okult interesash.

Biznesi shqiptar sot nuk po përballet vetëm me një barrë të re financiare, por me një pabesi të pastër institucionale që shkatërron përfundimisht sigurinë juridike dhe klimën e besimit në vend.

Me këtë natë të gjatë të spastrimit fiskal, Rama dhe Malaj kanë kapërcyer një vijë të kuqe që nuk ka kthim. Ata provuan se për këtë ekzekutiv, fjalë e dhënë, institucioni i dialogut dhe partneriteti me privatin nuk vlejnë as sa letra e projektligjeve të tyre të hartuara në terr.

Duke zgjedhur pabesinë ndaj atyre që gjenerojnë vendet e punës dhe mbajnë në këmbë shtetin, kjo qeverisje vulosi natyrën e saj të vërtetë. Kur sunduesit fillojnë e sillen si zuzarë që vjedhin natën atë që premtojnë të mbrojnë ditën, ata nuk meritojnë më as bindje tatimore dhe as respekt institucional.

Ky nuk është më shtet ligjor; ky është një pritë financiare në errësirë ku biznesi nuk trajtohet si partner, por si pre e radhës./kapitali.al

Kreu i Partisë Demokratike, Sali Berisha, ka dënuar ashpër veprimet e policisë ndaj qytetarëve që marrin pjesë në protestat kundër qeverisë, duke akuzuar kryeministrin Edi Rama se po përdor frikën dhe dhunën për të ruajtur pushtetin. 

Në një deklaratë për mediat, Berisha pretendoi se komisariatet e policisë po ushtrojnë presion ndaj protestuesve pa asnjë shkak ligjor, duke shkelur, sipas tij, Kushtetutën dhe të drejtat themelore të qytetarëve. Kryedemokrati e krahasoi Ramën me presidentin serb Aleksandar Vuçiç dhe ish-diktatorin rumun Nicolae Çaushesku, ndërsa paralajmëroi se protestat nuk do të ndalen.

Berisha deklaroi se marrja në pyetje e qytetarëve për pjesëmarrjen në tubime paqësore është një përpjekje për të frikësuar protestuesit, por sipas tij, këto metoda nuk do të arrijnë të ndalin kundërshtimin ndaj qeverisë.

“Së fundi, dënoj me forcën më të madhe terrorin, dhunën antikushtetuese që komisariatet, në shkelje të të gjitha ligjeve, po ushtrojnë ndaj qytetarëve në qytete dhe kudo për pjesëmarrjen e tyre në protesta paqësore”, u shpreh Berisha. Ai akuzoi strukturat policore se po shkelin ligjin duke marrë deklarime nga qytetarët, ndërsa theksoi se përdorimi i frikës nuk do ta shpëtojë kryeministrin.

 “Pa asnjë shkak, pa asnjë motiv, duke shkelur kode dhe Kushtetutë, marrin deklarata dhe besojnë si të verbër se me instrumentet e frikës do mund të shpëtojnë Vuçiçin shqiptar”, deklaroi kreu i PD-së. Në përfundim, Berisha ashpërsoi gjuhën ndaj Ramës, duke e krahasuar me figura politike që janë larguar nga pushteti pas protestave dhe përmbysjeve politike.

 “Edi Rama, argati i Vuçiçit, apo siç e kanë quajtur, Pashiqi shqipfolës, do të ketë fatin e tij ose të Çausheskut. Duhet të zgjedhë vetë. Protestat nuk ndalen”, përfundoi Berisha. Deklaratat e kryedemokratit vijnë në vijim të akuzave të opozitës për përdorim të paligjshëm të forcës dhe presion policor ndaj pjesëmarrësve në protestat studentore dhe qytetare.

“Rama mund të bjerë më shpejt se Vuçiçi, për arsye që janë krejtësisht të brendshme. Kështu deklaroi në Off the Record me Andrea Dangllin në A2 CNN, analisti Mentor Nazarko, sipas të cilit nuk ka efekt domino në vendin tonë, ndërsa i njeh disa merita Vuçiçit.

“Unë jam në favor të autokratëve të ndritur, që i shërbejnë vendit të vet. Nuk dua ta shpall Vuçiçin autokrat të ndritur por për të krahasuar parametrat e zhvillimit gjatë qeverisjes së tij. Rritja e rrogës minimale, mesatare, shtim të investimeve të huaja, subvencione në bujqësi, ulje të borxhit të jashtëm, vendi ka njohur zhvillime gjatë këtyre viteve. Nuk shoh lidhje të tipit domino. Kjo është klishe propagandiste për shkak të afërsisë së dy liderëve”, tha Nazarko në Off the Record me Andrea Dangllin në A2 CNN.

Për entuziazmin e opozitës shqiptare pas rënies së Vuçiçit në Serbi, Nazarko e paralajmëron se duhet të jetë më e trishtuar, pasi nga zgjedhjet në Serbi u zhduk opozita.

“Opozita duhet të jetë më e trishtuar se nga zgjedhjet në Serbi u zhduk opozita. Nuk ka asnjë parti opozitare me përjashtim të pakicave hungareze e shqiptare dhe Sanxhakut. Në këtë kuptim opozita nuk duhet të jetë shumë e lumtur se nuk shoh atë lidhje që vijon të kultivohet ende për një afërsi Rama Vuçiç. Ka patur një afërsi 2017-2022 në kuadër të një projekti që e nxiste Merkel, pastaj e mori në dorë administrata Trump e parë. Kjo afërsi është në mendjen e atyre që i krijojnë këto klishe”.

  (A2 Televizion)