Detaje të reja kanë dalë në dritë lidhur me Violand Braçellarin, autorin e dyshuar të vrasjes së efektivit të Policisë së Shtetit, Enea Mekolli, gjatë operacionit të zhvilluar në Maliq.

Sipas burimeve, në momentin e arrestimit Braçellari ka shfaqur gjakftohtësi të plotë. Personat që e kanë shoqëruar me ambulancë tregojnë se, pavarësisht plagëve të marra nga tre plumba në dorë dhe në bark, ai nuk ka shfaqur shenja dhimbjeje apo shqetësimi gjatë transportimit.

Po sipas të njëjtave burime, autori i dyshuar nuk ka shprehur pendesë për ngjarjen e rëndë.

Ndërkohë, raportohet se rreth një vit më parë Braçellari dyshohet të ketë qenë i përfshirë edhe në një episod të rëndë dhune ndaj një shtetasi tjetër. Sipas informacioneve paraprake, ai mendohet se e ka tërhequr viktimën zvarrë me kalë për më shumë se dy orë.

Një operacion policor për arrestimin e një të kërkuari përfundoi në tragjedi mëngjesin e së enjtes në Lozhan të Maliqit. Efektivi i Forcës së Posaçme “Shqiponja”, Enea Mekolli, 34 vjeç, mbeti i vrarë, ndërsa kolegu i tij Edison Adri, 36 vjeç, u plagos gjatë shkëmbimit të zjarrit me Violand Braçellarin, një person i dënuar për trafik droge që fshihej prej kohësh në zonë.

Ngjarja ndodhi rreth orës 07:30 të mëngjesit në malin Boden, ku policia kishte gjetur stanin ku qëndronte Braçellari. Efektivët rrethuan vendin dhe i kërkuan të dorëzohej. Por 43-vjeçari nuk pranoi. Në vend të kësaj, ai hapi zjarr ndaj policëve.

Plumbat goditën për vdekje Enea Mekollin, ndërsa plagosën në nofull kolegun e tij Edison Adri. Polici i plagosur u dërgua me helikopter drejt Spitalit të Traumës në Tiranë dhe ndodhet jashtë rrezikut për jetën.

Policia iu përgjigj zjarrit dhe plagosi Braçellarin në pjesën e barkut. Ai u arrestua në vendngjarje dhe u dërgua fillimisht në spitalin e Korçës për të marrë ndihmën e parë mjekësore.

Autori nuk ishte një emër i panjohur për policinë dhe drejtësinë. Violand Braçellari konsiderohej person me rrezikshmëri të lartë dhe me precedentë të shumtë kriminalë. Ai ishte dënuar në vitin 2017 nga Gjykata e Korçës me 9 vjet, 11 muaj e 7 ditë burg për prodhim dhe trafik narkotikësh. Dënimi u la në fuqi më pas nga Apeli dhe në fund edhe nga Gjykata e Lartë, me vendimin e janarit 2024.

Historia që çoi në arrestimin e tij nis që në vitin 2015. Gjatë një operacioni policor në zonën e quajtur “Çezma e Senishtit”, policia ndaloi automjetin ku udhëtonte Braçellari me dy persona të tjerë. Në makinë u gjetën qese plastike dhe doreza kirurgjikale, ndërsa kontrolli i telefonit celular nxori fotografi dhe video që, sipas hetuesve, tregonin parcela me kanabis, transportimin dhe përpunimin e lëndës narkotike.

Përgjimet telefonike të administruara në dosje tregonin biseda për tharjen dhe transportimin e drogës me persona të regjistruar në telefon si “Sandri” dhe “Toni”. Më pas, gjatë kontrollit në një banesë që përdorej prej tij në Lozhan të Sipërm, policia gjeti mbetje të bimës narkotike cannabis sativa.

Megjithatë, pavarësisht se dënimi ndaj tij u bë i formës së prerë, mbetet ende e paqartë se si Braçellari nuk po vuante dënimin dhe si arriti të qëndronte i lirë deri në ditën e operacionit ku u vra një efektiv policie.

Problemet e tij me drejtësinë nuk mbaruan me dosjen e drogës. Në vitin 2024 ai u mor i pandehur nga Prokuroria e Korçës për “plagosje të lehtë me dashje”, ndërsa në janar 2026 gjykata urdhëroi njoftimin e tij për një seancë gjyqësore pasi nuk u gjet në adresën e banimit në Lozhan./Lapsi.al

Reperi i njohur Rigels Rajku, i njohur me emrin e artit Noizy, ka dëshmuar të mërkurën në Gjykatën e Posaçme kundër Korrupsionit dhe Krimit të Organizuar (GJKKO) në procesin gjyqësor ndaj Laert Haxhiut, lidhur me episodin e vënies së tritolit në biznesin e tij në Durrës në vitin 2022.

Gjatë dëshmisë së tij, Noizy ka deklaruar se natën e shpërthimit ndodhej në pallatin ku ishte vendosur eksplozivi, ndërsa ngjarjen e mësoi pasi u zgjua në mëngjes dhe pa dëmet e shumta të shkaktuara. Sipas tij, dyshimet e para e çuan në një konflikt që kishte pasur një ditë më parë me Kleviol Ahmetin, për të cilin tha se prej vitesh e kishte shqetësuar përmes fyerjeve dhe kërcënimeve në rrjete sociale.

“Një hamendësim e kisha se kush e kishte bërë. Më ndodhi një problem një natë përpara te një tjetër lokal që kam në Durrës, me një person që është i fiksuar, sjelljet e një fansi të fiksuar. Po nuk i dhe vëmendje bëhet agresiv dhe sjell problemin deri tek shtëpia.”, tha ai.

Reperi tregoi gjithashtu se Kleviol Ahmeti kishte shkuar në lokalin e tij një ditë para shpërthimit, i shoqëruar nga rreth 20 persona dhe disa automjete, duke shkaktuar një konflikt fizik.

“Më erdhi në lokal një ditë përpara shpërthimit për t’u sqaruar demek, vjen me 20 vetë. Fjala e parë që thotë është “Ku është ai legeni”. Futet brenda, dalim jashtë dhe pastaj ndodh një konflikt fizik te shkallët e lokalit. Të nesërmen ndodhi tritoli. E kam takuar më përpara, ka ardhur me një shokun e vet për tu sqaruar kur unë isha me familjarët e mi. Kur dolëm nga lokali filloi prap avazin duke më sharë.”, shtoi ai.

Më tej, artisti pretendoi se pas kësaj ngjarjeje iu dogj edhe një automjet.

“Iku në Dubai pagoi disa çuna nga Vlora dhe më dogjën makinën. Nga ana ime nuk ka situatë konfliktuale, nga ana e tij po. Për Laert Haxhiun nuk kam dëgjuar ndonjëherë, e dëgjova emrin e tij më mbrapa para 3 vitesh. E dëgjova kur u bë publik rasti im.“, ka theksuar ai.

Në lidhje me Laert Haxhiun, Noizy tha se nuk kishte pasur asnjë njohje apo informacion për të deri në momentin kur rasti i vendosjes së tritolit u bë publik.

“Për Laert Haxhiun nuk kam dëgjuar ndonjëherë, e dëgjova emrin e tij më mbrapa para 3 vitesh. E dëgjova kur u bë publik rasti im.”

Pas shpërthimit të tritolit në lokalin e reperit, qëndron grupi i Laert Haxhiut. Sipas policisë, autorë të dyshuar janë Laert Haxhiu, Artan (Marjus) Tafani, Lulzim Spahija (Arapi) dhe Erisiano Abedini. Ngjarja ndodhi mëngjesin e 8 qeshorit 2022, ku si pasojë e shpërthimit pati vetëm dëme materiale.

DËSHMIA E NOIZYT NË GJKKO:

Kam dijeni për vendosjen e lëndës plasese në Durrës. Kam qenë në të njëjtën pallat ku u vendos ekspozivi, kam patur dritaren hapur. Kam qenë në gjumë , dëgjova shpërthimin dhe më doli gjumi kuptova që diçka ndodhi. Zbrita poshtë dhe kuptova që ishte vendosur një eksploziv. Më doli gjumi zbrita poshtë, ishte babi im poshtë, motra po ashtu mund të ketë ardhur, mamin e mbaj mend. Tritoli u vendos në katin e parë të pallatit ku qëndroja. Prindërit jetojnë në të njëjtin pallat, por në një kat më sipër. Kur zbrita, ngjarja kishte ndodhur rreth orës 03:00-04:00, unë u zgjova në orën 09:00.

Ishin shkatërruar xhamat e lokalit dhe të dyqanit poshtë. Kam një firmë rrobash dhe një lokal, të dy pronat janë të miat. Pashë komshinjtë, polici pa fund dhe kishte plasur një tritol. Hyrja ishte komplet e shkatërruar dhe në kat të parë dhe në kat të dytë. Ishte shkaktuar një gropë e madhe në tokë nga sasia e tritolit. Ishte thyer mermeri komplet. Një hamendësim e kisha se kush e kishte bërë. Më ndodhi një problem një natë përpara te një tjetër lokal që kam në Durrës, me një person që është i fiksuar, sjelljet e një fansi të fiksuar… Po nuk i dhe vëmendje bëhet agresiv dhe sjell problemin deri tek shtëpia. Kur shan dhe kërcënon në rrjetet sociale ai të vjen dhe deri tek shtëpia. Kleviol Ahmeti është personi, sharjet që nga 2019 nuk janë ndalur asnjëherë. Njohje me Kleviolin nuk kam patur asnjëherë, as bashkëpunime. Është i fiksuar me mua, kërkon me se sbën vëmendjen time. Do të bëhet shok me mua, ndërkohë që unë nuk dua të bëhem shok me të. Nuk ta shpjegoj dot nivelin e fiksimit të atij me mua. Nuk e di a e njihni, por del në TikTok dhe shan të gjithë botën. Ai e ka kuptuar që merr vemendje kur përmendet “Noizy” dhe nuk e ka ndalur asnjëherë këtë gjë.

Është një i çmendur pas meje. Më erdhi në lokal një ditë përpara shpërthimit për t’u sqaruar demek, vjen me 20 vetë. Fjala e parë që thotë është “Ku është ai legeni”. Futet brenda, dalim jashtë dhe pastaj ndodh një konflikt fizik te shkallët e lokalit. Të nesërmen ndodhi tritoli. E kam takuar më përpara, ka ardhur me një shokun e vet për tu sqaruar kur unë isha me familjarët e mi. Kur dolëm nga lokali filloi prap avazin duke më sharë.

I thotë vetës artist, ka bërë disa këngë. Ai bën shumë gjëra, por nuk bën asgjë. Ishte live Tik Tok gjatë gjithë kohës, tregonte armë në video, e dija që po vinte. Nuk njihja askënd nga ata që shoqërohej Klevioli. Erdhën me makina, me 5 të tilla. U largua me makinë pastaj, ishte pasagjer. Prezenca e tij në pronën e tij duke më ofenduar mua, sharjet, u bënë shkak për nxitjen e konfliktit. Erdhi brenda dhe më tha “Do të qëroj o pederast”.

Kur erdhi në pronën time, unë e godita i pari, konflikti ndodhi disa sekonda. Pas kësaj ngjarje, ai më dogji edhe një automjet. Ai e ka gjyqin akoma hapur dhe nuk e di si ka dalë nga burgu. Iku në Dubai pagoi disa çuna nga Vlora dhe më dogjën makinën. Nga ana ime nuk ka situatë konfliktuale, nga ana e tij po. Për Laert Haxhiun nuk kam dëgjuar ndonjëherë, e dëgjova emrin e tij më mbrapa para 3 vitesh. E dëgjova kur u bë publik rasti im.

Policia e Vlorës ka kryer edhe dy arrestime të tjera lidhur me ngjarjen e ndodhur në Zvërnec, ku qytetarë protestuan kundër ndërtimeve në zonat e mbrojtura dhe një prej tyre u tërhoq zëvarrë nga rojet e sigurisë të maskuar dhe u dhunua.

Policia sqaron se në pranga janë vene dy persona pasi kanë tërhequr me forcë, drejt vendit të rezervuar për rojet, pjesëmarrësin në tubim, ndërsa më parë ishte arrestuar edhe kreu i shoqërisë private, gerald Biba, që ndodhet në paraburgim me masë sigurie.

Ashtu si Biba, të arrestuarit nuk figurojnë të regjistruar si roje sigurie.

Ndaj të ndaluarve Gjykata ka lëshuar masat arrest me burg për “heqje e paligjshme të lirisë”.

“Në vijim të veprimeve hetimore dhe procedurale, për zbardhjen dhe dokumentimin e të gjitha rrethanave dhe të gjitha përgjegjësive për këtë ngjarje, shërbimet e Drejtorisë Vendore të Policisë Vlorë, në bashkëpunim me shërbimet e Drejtorisë Vendore të Policisë Tiranë, kapën dhe ndaluan shtetasit A. G., 35 vjeç dhe G. V., 41 vjeç, banues në Tiranë, pasi Gjykata e Vlorës iu ka caktuar masën e sigurisë “Arrest në burg”, për veprën penale “Heqja e paligjshme e lirisë”, thuhet mes të tjerash në njoftimin zyrtar.

Ngjarja solli reagime të forta si nga qytetarët, ashtu edhe nga Policia e Shtetit.

“Të dy akuzohen se në bashkëpunim me shtetasin G. B. (të arrestuar), kanë tërhequr me forcë, drejt vendit të rezervuar për rojet, pjesëmarrësin në tubim, shtetasin E. S., të cilit i kanë shkaktuar dëmtime trupore. Më tej, nga verifikimet rezultoi se shtetasit e ndaluar, A. G. dhe G. V., nuk figurojnë të regjistruar apo të licencuar nga asnjë subjekt për shërbim privat të sigurisë fizike”, sqaron policia.

Njoftimi i plotë

“Vijojnë hetimet intensive në bashkëpunim me Prokurorinë e Vlorës për të nxjerrë përpara përgjegjësisë penale, të gjithë autorët e veprimeve ose mosveprimeve të kundërligjshme të kryera gjatë tubimit të zhvilluar më datë 30.05.2026, në Portonovë, Zvërnec.

Ndalohen dhe vihen në pranga 2 shtetasit që tërhoqën me forcë, pjesëmarrësin në tubim.

Në vijim të veprimeve hetimore dhe procedurale, për zbardhjen dhe dokumentimin e të gjitha rrethanave dhe të gjitha përgjegjësive për këtë ngjarje, shërbimet e Drejtorisë Vendore të Policisë Vlorë, në bashkëpunim me shërbimet e Drejtorisë Vendore të Policisë Tiranë, kapën dhe ndaluan shtetasit A. G., 35 vjeç dhe G. V., 41 vjeç, banues në Tiranë, pasi Gjykata e Vlorës iu ka caktuar masën e sigurisë “Arrest në burg”, për veprën penale “Heqja e paligjshme e lirisë”.

Të dy akuzohen se në bashkëpunim me shtetasin G. B. (të arrestuar), kanë tërhequr me forcë, drejt vendit të rezervuar për rojet, pjesëmarrësin në tubim, shtetasin E. S., të cilit i kanë shkaktuar dëmtime trupore.

Më tej, nga verifikimet rezultoi se shtetasit e ndaluar, A. G. dhe G. V., nuk figurojnë të regjistruar apo të licencuar nga asnjë subjekt për shërbim privat të sigurisë fizike.

Materialet procedurale iu referuan Prokurorisë së Vlorës, për veprime të mëtejshme”.