SPAK ka nisur veprimet hetimore për kallëzimin e bërë nga gjyqtarët kundër Ministrit të Financave dhe zyrtarëve të tjerë në lidhje me bllokimin e pagave të magjistratëve.

Pas sekuestrimit të praktikës dokumentare në Ministrinë e Financave, vendimeve të KLP dhe KLGJ dhe vendimit të Kushtetueses, listëpagesave të Prokurorisës së Përgjithshme dhe gjykatave, listëpagesat e anuluara tek MF, gjurmët elektronike të sistemit të thesarit SPAK ka filluar të marrjen në pyetje zyrtarët e përfshirë në procesin e mosekzekutimit të pagave.

Mëngjesin e sotëm në SPAK është paraqitur Elmira Peto, drejtoreshë e Thesarit. Ajo po pyetet në cilësinë e personit në dijeni.

Në kallëzimin e depozituar në SPAK gjyqtarët pretendojnë se zyrtarët e Ministrisë së Financave dhe degëve të Thesarit kanë konsumuar veprat penale të “shpërdorimit të detyrës”, “pengimit të ekzekutimit të vendimit të gjykatës” dhe “mosekzekutimit pa shkaqe të përligjura të vendimit të gjykatës.

Ministrja Mirela Kumbaro dhe deputeti Tërmet Peçi, njoftojnë se kanë dakordësuar dhe kanë firmosur një shkresë për kryetarin demokrat të Bashkisë Memaliaj, Albert Malaj, si dhe Këshillin Bashkiak të kësaj njësie vendore, duke kërkuar marrjen e masave për banorët e disa fshatrave.

Dy drejtuesit e lartë të qarkut të jugut, thonë se janë të shqetësuar për fatin e banorëve të disa fshatrave, sepse gjatë vitit 2026 rrugët e tyre kanë pësuar dëme të konsiderueshme nga shirat, dhe nuk është marrë asnjë masë për t’i paraprirë përmirësimit të situatës.

“Banorët e njësive Memaliaj Fshat, Luftinjë e Buz kanë nevojë për mbështetjen, jo fjalët tona”, shprehet ministrja Mirela Kumbaro.

Bashkë me Tërmet Peçin, ajo thotë se të gjitha strukturat e qarkut duhet të veprojnë tani, që reshjet dhe moti i keq i vjeshtës 2027 të mos bëhen shkak për dëme e pasoja që lidhen me jetën dhe pronën e banorët të fshatrave.

“Nga Kuvendi, bashkë me deputetin e qarkut të Gjirokastrës Tërmet Peçi, sot i drejtuam një letër kryetarit të Bashkisë Memaliaj mbi një shqetësim që na shoqëron prej më shumë se një viti ne si përfaqësues të politikës dhe rrezikon banesat, pronat dhe sigurinë e shumë familjeve në disa prej fshatrave të njësive administrative”, shprehen ata.

Kuvendi miratoi në orën 01:30 të 18 shtatorit ligjin e maxhorancës për pagat e gjyqtarëve.

Ligji u miratua me 84 vota pro dhe 24 vota kundër, pas një debati që vijoi në Kuvend edhe pas mesnate.

Ndërkohë para votimit u debatua deri në orët e para të mëngjesit.

Debati në Kuvend për pagat e gjyqtarëve dhe prokurorëve ka vijuar edhe pas mesnate, ndërsa kryeministri Edi Rama ndërhyri disa herë gjatë diskutimeve.

Kreu i qeverisë tha se do të japë qëndrimin e tij për çështjen pasi të dëgjojë të gjithë deputetët që po marrin fjalën në seancë.

“Për sa i përket pastaj çështjes në fjalë, unë do të flas, patjetër që do të flas dhe do të flas kur të dëshiroj unë, jo kur vendosni ju. Por do të flas, këtu jam për të folur. Por po dëgjoj një herë të gjitha mendjet e ndritura të mendimit juridik të Parlamentit, pastaj do të them dhe unë ato që mendoj si një piktor i rëndomtë”, tha Rama.

Gjatë debatit, kryeministri u përfshi edhe në replika për çështjen e arbitrazhit, duke sqaruar deklaratën e tij të mëparshme se subjekti që fitoi çështjen do të marrë “zero lek” nga shteti shqiptar: “Meqë më doli emri për një saktësim, juve thatë që unë paskam thënë që nuk e njoh vendimin e arbitrazhit. Unë nuk kam thënë nuk e njoh vendimin e arbitrazhit, kam thënë që ai subjekti që e fitoi atë çështje do marri zero lek nga shteti shqiptar”, deklaroi Rama.

Ai vijoi duke thënë: “Dhe pavarësisht se partia juaj u angazhua fuqimisht që t’u thoshte shqiptarëve se ai në ndërkohë mori 100 milionë euro, unë dua t’ju informoj që, jo vetëm deri në momentin që ne po flasim, ai ka marrë zero lek nga shteti shqiptar, por ndërkohë, si shumë të tjerë, që kur kapen mbas Shqipërisë padrejtësisht pastaj për një arsye ose një tjetër nuk i shkon mbarë jeta, ai sot që flasim, subjekti në fjalë, së bashku me një apo dy arbitrit përkatës do të përballen me drejtësinë.”

Sipas Ramës, paratë e mbajtura të ngrira do të kthehen në arkën e shtetit shqiptar.

“Të jesh i sigurt që më herët sesa vonë, të gjitha lekët, që të gjitha ato që janë mbajtur padrejtësisht të ngrira, duke ia marrë Albcontrol-it, do kthehen në arkën e shtetit shqiptar”, tha ai.

Kryeministri përsëriti se nuk kishte deklaruar se nuk njihte vendimin e arbitrazhit.

“Unë nuk kam thënë, nuk e njoh vendimin e arbitrazhit, unë kam thënë që koha kur lloj-lloj kriminelësh dhe lloj-lloj legenësh mund t’ia merrnin Shqipërisë çfarë të donin ka ikur dhe ai do marri zero lek nga shteti shqiptar. Këtë kam thënë unë!”

“Zero lek do marri nga shteti shqiptar dhe natyrisht jo me forcë, por nëpërmjet rrugës ligjore. Ne kemi ndjekur rrugën ligjore, jemi në disa procese me subjektin në fjalë”, shtoi Rama.

Ai deklaroi se për subjektin në fjalë ka procese administrative dhe civile, si dhe një proces penal jashtë Shqipërisë : “Për subjektin në fjalë, ka jo vetëm procese administrative civile, por dhe proces penal jashtë Republikës së Shqipërisë. Edhe në Republikën e Shqipërisë SPAK ka hapur procesin”, tha Rama.

Rama tha se vendimi nuk është ekzekutuar dhe se qeveria e ka kontestuar atë.

“E vërteta është që ai vendim nuk është ekzekutuar, i dashur jurist i panjohur. Sepse ne jemi në disa procese, e kemi kontestuar në rrugët që kemi gjetur dhe deri tani subjekti, jo vetëm nuk ka marrë asnjë kokërr leku dhe nuk ka parë të marrë asnjë kokërr leku, por ka hyrë në një telash shumë të madh me Republikën e Shqipërisë, sepse nga një kundërshtar në arbitrazh është subjekt i të drejtës penale, qoftë këtu, qoftë dhe jashtë.”

Për fondet e Albcontrol-it, Rama deklaroi: “Paratë e bllokuara të Albcontrol janë në një fond të ngrirë dhe do të preken vetëm kur të mbarojë sqarimi i çështjes. Dhe në ndërkohë, po ju përsëris që vetë SPAK ka hyrë aktivisht në këtë çështje.”

Në ndërhyrjen e tij të tretë, Rama këmbënguli sërish se paratë nuk janë marrë.

“Ndërkohë që unë jam këtu prezent me zërin tim, unë thashë që ai ka marrë dhe ka për të marrë zero lek, nuk thashë, sepse nuk ka ndodhur, se po të ndodhte kjo, do të ishte në librat e llogarive të shtetit shqiptar, që ai ka marrë dhe do t’ia marrim mbrapsht. Unë thashë që ai ka marrë zero lek.”

Sipas kryeministrit, fondi vijon të jetë i ngrirë deri në përfundimin e procesit.

“Fondi është një fond i ngrirë deri në fund të procesit, pikërisht sepse ndryshe nga çfarë mendoi ai, që u kthye në heroi i këtyre këtu, që nuk lënë plehrë pa e kthyer në hero për të sulmuar me çdo kush dhe me çdo kusht dhe me çmimin e përbaltjes së Shqipërisë, palën tonë, ndërkohë që sot, pikërisht çështja e arbitrazhit nuk u mbyll ashtu sikundër ëndërronte ai subjekt, ne jemi në disa procese dhe zero lek janë marrë, zero lek do të merren.”

“Kjo është e vërteta”, përfundoi Rama në këtë pjesë të replikave, ndërsa debati në Kuvend për çështjen e pagave të magjistratëve vijoi edhe pas mesnate.

Një arbitër ndërkombëtar në Londër bëri për Aeroportin e Vlorës atë që drejtësia e përgjumur shqiptare nuk guxon dot ta bëjë prej muajsh: ka ngrirë konfliktin mes kompanive private dhe qeverisë para se gjoba me vlerë qindra milionë euro të kthehej në fakt të kryer dhe fatura t’i mbetej buxhetit të shtetit.

Më 16 shtator, Arbitri i Emergjencës i Gjykatës Ndërkombëtare të Arbitrazhit të Dhomës Ndërkombëtare të Tregtisë (ICC), Cecilia Carrara, nxori një urdhër paraprak në çështjen e hapur nga MABCO Constructions kundër Ministrisë së Infrastrukturës dhe Energjisë.

MABCO, kompania zvicerane e grupit Mabetex, zotëron 98% të Vlora International Airport, ndërsa 2A Group 2%.

Urdhri ndalon Ministrinë e Infrastrukturës dhe Energjisë të ndërmarrë veprime të tjera lidhur me përfundimin e kontratës që mund ta përkeqësojnë konfliktin ose ta bëjnë të pavlefshme procedurën.

MABCO iu drejtua ICC-së më 7 shtator, pasi Ministria kishte njoftuar prishjen e kontratës së koncesionit. Sipas dokumentit të arbitrazhit, prishja do të bëhej efektive më 17 shtator, vetëm një ditë pas nxjerrjes së urdhrit. Ky afat shpjegon edhe urgjencën e procedurave.

Pas hyrjes në fuqi të prishjes së kontratës, ministria mund të ndërhynte në projekt, të merrte në posedim ose nën kontroll operacional kantierin, asetet dhe punimet, të kërkonte dorëzimin e pasurive dhe të zgjidhte një operator që do të zëvendësonte koncesionarin ekzistues.

MABCO argumentoi se, nëse kjo ndodhte, procedura emergjente humbiste kuptimin. Në Londër do të vazhdonte shqyrtimi i prishjes së kontratës, ndërsa në Vlorë qeveria mund ta kishte marrë aeroportin dhe mund të kishte vendosur një operator tjetër.

Arbitri e pranoi se ekzistonte rreziku që qeveria të merrte kontrollin e pronave apo të zëvendësonte VIA-n me një operator pasardhës.

Në dosje kishte edhe materiale të paraqitura nga MABCO që arbitri i përshkroi si “disa prova që sugjerojnë se MIE mund të jetë duke shqyrtuar emërimin e një operatori pasardhës”.

Në pikën 38 urdhërohet ministria të mos ndërmarrë veprime lidhur me përfundimin e koncesionit që ndryshe nënkupton se qeveria nuk mund ta kthejë prishjen e kontratës në një fakt të kryer ndërsa arbitri po shqyrton nëse duhet ta ndalojë atë.

Ndërhyrja e gjykatës në Londër ndryshon rrjedhën e konfliktit. Pa të, skenari ishte që qeveria të prishte kontratën, të merrte aeroportin, të largonte koncesionarin dhe eventualisht të vendoste një operator tjetër. MABCO do të vazhdonte më pas betejën në arbitrazh, këtë herë jo vetëm për kontrollin e aeroportit, por edhe për dëmin që pretendon se i është shkaktuar nga shteti shqiptar.

Pretendimet e MABCO-s për ekspozimin financiar të Shqipërisë kanë shkuar në qindra milionë euro, me një dëm potencial të pretenduar deri në 500-700 milionë euro, por rreziku financiar do të diskutohet në një konflikt arbitrar në themel. Kështu, masa që mbron sot interesin e një kompanie private mbron edhe një interes publik.

Kontrasti me atë që ndodhi prej muajsh brenda Shqipërisë është i dukshëm.

Konflikti i Aeroportit të Vlorës vazhdon prej muajsh. Nisi për kontrollin e Vlora International Airport, vazhdoi me vendime gjykatash që prekën të drejtat e aksionerit me 98%, bllokim të kantierit, ndërhyrje institucionale dhe më pas procedurën e Ministrisë për prishjen e koncesionit.

Në dosjet hetimore të SPAK në lidhje me lotet e Unazës së re në Tiranë dolën komunikime mes personave që lidhen me këtë histori. SPAK ka administruar në hetimet e tij materiale që përfshijnë Arbër Abazin dhe Belinda Ballukun, ndërsa lidhjet e Abazit me Valon Ademin dhe rolet e personave të përfshirë në VIA janë elemente që kërkojnë verifikim për të përcaktuar nëse konflikti ishte pasojë e interesave korruptive.

Këto janë materiale që SPAK i ka në dosje, por që duhet t’i hetojë nëse materialet që disponon krijojnë dyshime për vepra penale. Nëse nga hetimi rezulton se veprime të caktuara mund të jenë produkt i një vepre penale, vazhdimi i tyre mund të prodhojë pasoja qindra miliona euro dëmë për qytetarët shqiptarë.

Prokurori Klodian Braho dhe SPAK duhet të sqarojnë çfarë materialesh kanë për Aeroportin e Vlorës, çfarë tregojnë ato dhe nëse krijonin bazë për të ndërhyrë para se konflikti të arrinte në pikën ku shteti shqiptar rrezikonte një tjetër betejë ndërkombëtare.

Nëse paratë ikin, atëherë drejtësia për aeroportin e Vlorës do t’i kushtojë shumë qytetarëve shqiptarë. Shqipëria e provoi këtë me inceneratorët, ku hetimet ngritën akuza dhe çuan personat përgjegjës para gjykatës, por ndërkohë kontratat ishin lidhur dhe paratë e buxhetit ishin paguar.

Në Vlorë ka ende kohë që historia të mos përfundojë njësoj Mbetet të shihet nëse SPAK do të hetojë atë që ka ndodhur përpara se dëmi të prodhohet, apo do të mbërrijë përsëri me vonesë kur dëmi të jetë bërë./Lapsi.al

Kryetari i Partisë Demokratike, Sali Berisha nga foltorja e Kuvendit iu drejtua socialsitëve duke i thënë se “jeni bërë ushtarë të Padronit dhe Ron Yeffet-it, duke i thënë para kompanisë KAYO”, që Berisha thotë se është e Edi Ramës.

Lideri i opozitës ngriti pikëpyetje mbi mënyrën se si janë përdorur fondet publike dhe akuzoi qeverinë për favorizim të interesave private.

Sali Berisha iu drejtua socialisteve qe te mos heshtin përballë këtyre padrejtësive qe po u behen shqiptarëve, ndërsa i paralajmëroi ata “Rama do t’ju marre me vete ne anijen qe po mbytet çdo ditë”.

“Kërkoj lirimin e menjëhershëm të protestuesve të ndaluar dhe ndëshkimin e atyre që përdoren dhunën ndaj tyre. Ju kërkoni të mbijetoni me dhunë policore. Ju jeni bërë figurat më të urryera në historinë e kombit shqiptar. Ju mendoni se jeni të qetë, por ju them unë ju; Ai padrionoja juaj zvarritet çdo ditë zvarrë nga ata protestues dhe hiqni dorë nga mbrojtja e tij, sepse si minj do ju marrë me vetë në anijen e tij që po mbytet cdo ditë.

E paimagjinueshme, skandali në të cilën dalin Rama, Lubia, Nufi..a e kuptoni ca u bëni shqiptarëve ju?! U jepni para kompanisë së Edi Ramës. Blen automjetet dhe shteti ia blen ato automjete qe blen me paratë tona. A ka akt më të shëmtuar se ky?! A ka vjedhje me flagrante se kjo?! A keni ju interesin më të vogël njerëzor, apo  jeni ushtarë të Yeffet dhe padrinos?

Si mundet të heshtni para këtij fakti, kontrabandë e legjitimuar. Do bëjë punë të pista të kujt? Të kryepisit, nëse qeveria porosit punë të pista, kryepisi është ai që porosit dhe është kryeministri. Si ka mundësi ta ndiqni ju këtë?!”, tha Berisha.

Përplasje janë shënuar sërish mes protestuesve dhe policisë, ndërkohë që mbahet seanca plenare e Kuvendit.

Burime bëjnë me dije se disa protestues janë shoqëruar nga uniformat blu. Një grup protestuesish të cilët erdhën nga zona e Ministrisë së Brendshme goditën me vezë efektivët.

Tanimë turma ka nisur të zhvendoset në drejtim të xhamisë. 

1600 forca policore janë angazhuar sot në terren për mbarëvajtjen e protestës dhe punimeve normale të Kuvendit. 

Në të gjitha rrugët hyrëse drejt godinës së Parlamentit është vendosur gardh metalik dhe ka kordon policor.