Kuvendi është mbledhur këtë të enjte në seancë plenare, ndërsa në afërsi të godinës janë grumbulluar protestues.

Pak para nisjes së seancës, protestuesit mbajnë në duar flamurin kombëtar shqiptar dhe atë të UÇK-së, një ditë pas vendimit të Gjykatës Speciale në Hagë.

Ndërkohë, forca të shumta policore kanë rrethuar godinën e Kuvendit. Gazetari Igli Çelmeta raporton për A2CNN se në total rreth 1600 forca policore janë angazhuar në terren.

Policia ka mbyllur me gardh metalik edhe trotuarin ku kalojnë qytetarët që nuk janë pjesë e protestës. Kjo ka sjellë debate mes qytetarëve dhe efektivëve të policisë, me kërkesën që të lejohet lëvizja e lirë në trotuar.

Grupi parlamentar i Partisë Demokratike ka shkuar këtë të enjte në sallën e Kuvendit, duke u spikatur me një gjest simbolik.

Në shenjë solidariteti me vendimin e marrë një ditë më parë në Hagë ndaj katër ish-krerëve të Ushtrisë Çlirimtare të Kosovës (UÇK), deputetët e opozitës kanë zgjedhur të mbajnë të vendosur stemën e UÇK-së në veshjet e tyre gjatë seancës plenare.

Mazhoranca socialiste ka rrëzuar kërkesën e PD për ngritjen e një Komisioni Hetimor për veprimtarinë e kompanisë shtetërore “KAYO”.

Kërkesa e opozitës është diskutuar në Konferencën e Kryetareve, pas pretendimeve të ngritur nga PD lidhur me aktivitetin e kompanisë, kjo edhe pas publikimit të audiopërgjimeve nga ish zv. kryeministri Arben Ahmetaj.

Kryetari i Grupit Parlamentar të PD, Gazment Bardhi deklaroi në Konferencën e Kryetarëve se kompania KAYO ka shpenzuar rreth 34 milionë euro nga buxheti i shtetit dhe kërkoi transparencë mbi mënyrën e përdorimit të këtyre fondeve, kontratat dhe aktivitetin e kompanisë.

“Janë shpenzuar 34 milionë euro. Kështu na thatë edhe për inceneratorët, por doli që paratë digjeshin në shesh. Kemi kaq kohë që kërkojmë informacion në Ministrinë e Mbrojtjes. Nuk jepet informacion. Refuzon ministri dhe për këtë i jam drejtuar Kryetarit të Kuvendit. Çfarë duhet të bëjmë ne, të futemi në ministri dhe të marrim dokumentatat? Për këtë arsye duhet komisioni hetimor, sepse ai i nënshtrohet Kodit Penal nëse nuk jepet informacion.

Ne nuk kërkojmë asgjë tjetër, veç të mësojmë dhe të njohim kontratat e lidhura mes një kompanie shtetërore me kompaninë private. Si e gjeti KAYO individin Ron Yefet? Cila është CV-ja që ka ky njeri, veç faktit që është mik i Edi Ramës? Si përfiton ky njeri në vetëm 6 muaj 34 milionë euro? Ne jemi të hapur për objektin e hetimit. Na thoni çfarë doni të rregullojmë. Ngritja e komisionit hetimor nuk ka nevojë për lejen tuaj, këtë na e jep Kushtetuta. Ne mund vetëm të diskutojmë objektin e hetimit”, tha Bardhi.

Nga mazhoranca, kreu i Grupit të PS, Taulant Balla argumentoi se kërkesa nuk plotëson kriteret për ngritjen e një komisioni hetimor parlamentar.

Sipas arsyetimit të paraqitur, objekti i kërkesës është tepër i gjerë dhe përfshin çështje të ndryshme, pa përcaktuar në mënyrë të qartë faktet konkrete, veprimet apo mosveprimet që duhet të hetohen.

Qeveria ka vendosur të rikthejë Bordin e Transparencës.

Lajmin e bëri të ditur ministrja e Ekonomisë, Delina Ibrahimaj, e cila tha se vendimi lidhet me një mekanizëm të përcaktuar më herët për reduktimin e akcizës në rast se çmimi i karburanteve kalon këtë nivel.

“Sot morëm një vendim që e kemi diskutuar prej disa kohësh për riaktivimin e Bordit të Transparencës për çmimin e karburanteve. Duke qene se çmimi më shumë se dy javësh qëndron 222 lekë për litër dhe duke qenë se kemi marrë një vendim paraprakisht ku sa herë që çmimi të kalojë 220 lekë në do të aktivizojmë një mekanizëm për reduktimin e akcizës, atëherë mekanizimi i vetëm përmes ne të cilën ne mund të aktivizonim reduktimin e akcizës ishte ringritje bordit”, tha Ibrahimaj, e cila theksoi se nuk ka një afat sa do të zgjasë, por theksoi se do të monitorojnë tregun.