Ish-deputeti demokrat Ervin Salianji tha se gara për drejtimin e PD-së nuk mund të kontrollohet nga lidershipi aktual, Sali Berisha.

Në një lidhje të drejtpërdrejtë në edicionin qendror të lajmeve në televizionin kombëtar Vizion Plus me moderator Aleksandër Furxhi, Salianji tha se pakënaqësia e demokratëve është e dukshme kohëve të fundit

Sa i përket deklaratës së PD-së se ai dhe të tjerë janë “vetëpërjashtuar”, Salianji e cilësoi të pavlefshme.

Salianji theksoi gjithashtu se do të kandidojë pavarësisht pengesave, duke argumentuar se statuti i PD-së nuk lejon kandidimin e Berishës për shkak të mosrealizimit të objektivit për ta kthyer partinë në forcë qeverisëse.

INTERVISTA E PLOTË:

Sot, disa militantë të Partisë Demokratike nga Durrësi, mbështetës të Ervin Salianjit, protestuan te selia qendrore e partisë. A mund të themi, pas episodit të sotëm dhe atyre të javëve të fundit, se dera e Partisë Demokratike zyrtare është përfundimisht e mbyllur për një kandidaturë alternative ndaj zotit Berisha?

Ervin Salianji: Nuk di ta them këtë me siguri. Ajo që di të them është se frika e lidershipit dhe e zotit Berisha për të garuar ka baza reale, sepse demokratët janë kudo të pakënaqur, të dëshpëruar dhe kërkojnë llogari ndaj lidershipit të PD-së për rezultatet zgjedhore, si dhe për mosmbajtjen e përsëritur të premtimeve.

Salianji, nuk është kuptuar mirë se çfarë vjen pas kësaj situate për ju, kur Partia Demokratike deklaron se ju dhe të tjerët jeni të vetëpërjashtuar. Çfarë vjen më pas?

Ervin Salianji: Nuk ka rëndësi ajo deklaratë, është njësoj sikur Edi Rama të thoshte se PD-ja është e përjashtuar nga gara. Kjo nuk ndodh dot. Një kandidat, në këtë rast zoti Berisha, nuk mund të përjashtojë një kandidat tjetër, kundërshtari nuk mund ta zgjedhë rivalin e tij dhe as votuesit. Është për “Rekordet Guinness” që lidershipi i një partie kërkon të zgjedhë anëtarët, kur në fakt anëtarët duhet të zgjedhin drejtuesit. Rasti i Durrësit tregoi se demokratët kërkojnë llogari për abuzimet që po kryhen për të uzurpuar funksionin e kryetarit.

E keni thënë se Berisha nuk mund të përjashtojë kandidatët apo votuesit, por vjen dita e votimit dhe Salianjit nuk ia kanë hapur derën apo nuk e kanë regjistruar. Çfarë ndodh konkretisht nëse nuk e keni emrin në fletën e votimit?

Ervin Salianji: Unë nuk i kërkoj leje askujt për të kandiduar në partinë ku jam anëtar dhe ku kam dhënë kontribut. Se çfarë do të ndodhë me fletën e votimit, mbetet për t’u parë. Unë di që neni 46 i Statutit të PD-së ia ndalon zotit Berisha kandidimin, sepse ai nuk arriti objektivin për ta kthyer PD-në në forcë qeverisëse. Ky ishte premtimi i tij, që do ta mundte Edi Ramën. Politika bëhet mbi baza premtimesh publike, nëse nuk i realizon, duhet të përballesh me votën.

Salianji, ju bëtë burg për një denoncim që u prodhua me konsensus në shtabin e asaj kohe të PD-së. Berisha ju erdhi në burg me libra. A ndjeni sot zhgënjim, zemërim apo dëshirë për revansh?

Ervin Salianji: Unë jam në një betejë politike për të fituar mbështetjen e demokratëve dhe qytetarëve, me qëllim largimin e Edi Ramës një orë e më parë. Çdo përpjekje imja ka qenë për të përmirësuar jetën e qytetarëve dhe për të pasur përgjegjshmëri para ligjit. Nuk bëj beteja për interes personal, por për një shoqëri më demokratike, duke nisur nga demokratizimi i partive tona. Shqetësimi im është që PD-ja duhet të jetë jo vetëm alternativë, por gati për të sjellë rotacionin, sepse kështu siç është, është vërtetuar se nuk fitojmë dot. Po të ishte për interes personal, unë mund të kisha zgjedhur të qëndroja si disa të tjerë, por kam zgjedhur interesin publik.

Ish-Presidenti Bamir Topi ka hedhur akuza të forta ndaj ish-kryeministrit Sali Berisha, për të cilin deklaroi se bashkëpunon me kryeministrin Edi Rama për të bërë biznes dhe për të ndarë benefitet e pushtetit.

Në studion e emisionit ‘Frontline’ me gazetaren Marsela Karapanço në Report Tv, Topi tha se Berisha dhe Rama janë pronarë të partive politike që drejtojnë dhe kësisoj edhe të jetës politike në vend.

Ai shtoi se veprimet e fundit të Berishës dhe aksioni politik i opozitës tregojnë qartë që ish-kryeministrit dhe grupit të tij i ka ardhur fundi politik. Sipas Topit, Berisha me një grusht njerëzish në PD po përpiqen të mbajnë me forcë në çdo lloj forme pushtetin brenda kësaj force politike.

“Sistemi i dha mundësi dy partive kryesore që të jenë kontrolluese të të gjithë jetës politike në vend. Mos e harroni këtë. Ka 16 vite që funksionon në këtë mënyrë. Politika shqiptare ka pasur qindra probleme, por nuk ka qenë kurrë kështu. Pra i dha mundësi dy kryetarëve të partive që të formatojnë ekipet e tyre me emërim. Berisha dhe Rama, duke qenë pronarë të partive politike, janë pronarë të jetës politike në vend, janë pronarë të shumë benefiteve të rëndësishme, të pronave, të bizneseve.

Por nga pikëpamja politike, kjo strukje, kjo nevojë për të bërë të tilla veprime, tregon se Sali Berisha me grupin e tij janë në fund, nuk kanë rrugëdalje. Nuk rigjenerojnë më. Berisha nuk njeh më njeri, përveç një grupi të ngushtë që i garanton atij, qoftë me gjuhë urrejtje, qoftë me baltosje, qoftë me ‘të fortë’, pra gjuha politike duhet të jetë gjuhë politike. Ai duhet të hapë lojën, por në subkoshiencën e tij është që ‘unë e kam filluar lojën’, sepse edhe këtu ka një lloj diskutimi nëse e ka filluar ky lojën në 1990, sepse ka qenë dikush tjetër që e ka filluar… Berisha në gjithë këtë periudhë që nuk është e pakët, ka realizuar vetëm autogola në shërbim të ekipit kundërshtar”, tha mes të tjerash Topi.

Lidhur me përjashtimin e Salianjit dhe shumë anëtarëve të tjerë nga PD, Topi tha se ky veprim tregoi qartë që Berisha është një komunist që gjatë këtyre kohërave është ‘maskuar’ si demokrat.

“Berisha duke përjashtuar Salianjin, tregon se ai ka qenë, është sjellë në atë lloj metamorfoze si demokrat dhe në fund fare ka përfunduar prap si komunist”, përfundoi ish-Presidenti Topi.

Gazetari Bledian Koka, i ftuar në “Off the Record” në A2CNN, u shpreh se kryeministri Edi Rama mund të thirret nga SPAK brenda muajit prill.

Sipas Kokës, kjo lidhet me informacione për dosje që i kanë mbërritur drejtësisë shqiptare, veçanërisht nga Gjermania, të cilat mund të ndikojnë në vijimin e hetimeve. Ai theksoi se bëhet fjalë për një informacion që, sipas tij, ekziston, por që mbetet për t’u konfirmuar nga zhvillimet konkrete.

Nga ana tjetër, analisti Albatros Rexhaj ngriti pikëpyetje mbi burimin e këtij informacioni, duke e pyetur nëse bëhej fjalë për një fakt të verifikuar apo një vlerësim personal.

Bledian Koka: Unë besoj që zoti Rama mund të ketë informacione që në prill atij i vjen një thirrje nga SPAK.

Albatros Rexhaj: Ke informacione për këtë apo është thjesht intuita juaj?

Bledian Koka: Unë e kam një informacion të kësaj natyre, por mbetet për t’u parë.

Albatros Rexhaj: Si person në dijeni?

Bledian Koka: Si person në dijeni mund të thuash. Nëse drejtësia avancon me ato dosje që kanë ardhur, sidomos nga Gjermania…

Ministri i Infrastrukturës dhe Energjisë, Enea Karakaçi ka folur në lidhje me rritjen e çmimit të naftës në vend për shkak të luftës në Iran. Pas përfundimit të mbledhjes së Këshillit të Ministrave, Karakaçi ka është pyetur nëse shoqatat e transportit publikik kanë kërkuar rritje të çmimit të biletës. 

Karakaçi dekklaroi se po shqyrtojnë mundësinë e rikthimit të skemës të subvencionimit të naftës, sikurse në vitin 2022, si dhe propozime të tjera të bëra nga shoqatat.

”Jo më larg se para rreth dy orësh bashkë me ministren e Ekonomisë dhe të  bashkisë së Tiranës ishin në takim me shoqatat e transportit, situata e krizës dhe çmimeve është duke u ndjekur me kujdes, qeveria ka njoftuar disa plane masash, si ngritja e Bordit të Transparencës dhe akcizën. E dimë që gjatë 2022 janë marrë disa akte subvencioni sa i përket shoqatave, ky element po diskutohet përsëri. Por jemi duke e marrë në konsideratë bashkë me propozime të tjera të bëra nga shoqatat e transportit,” tha Karakaçi.

Grupi Parlamentar i Partia Demokratike i është drejtuar këtë të mërkurë me një letër zyrtare përfaqësive diplomatike në Tiranë, ku shpreh shqetësimin për zhvillimet e fundit në sistemin e drejtësisë, veçanërisht për një mbledhje të parashikuar të Gjykata e Lartë e Shqipërisë.

Në letrën e firmosur nga kreu i grupit parlamentar, Gazment Bardhi, theksohet se më 9 prill pritet të mblidhen Kolegjet e Bashkuara për të shqyrtuar çështje që lidhen me masën e sigurisë “arrest në burg”. Sipas PD, kjo nismë është ndërmarrë nga kryetari i gjykatës, Sokol Sadushi, pa një bazë të qartë ligjore.

Demokratët e konsiderojnë momentin delikat për luftën kundër korrupsionit, duke theksuar se një numër zyrtarësh të lartë dhe ish-zyrtarësh janë aktualisht nën hetim apo masa sigurie për akuza të rënda, përfshirë korrupsionin dhe shpërdorimin e detyrës. Në letër përmendet edhe fakti se aktualisht në paraburgim ndodhet kryetari i Bashkisë së Tiranës, Erion Veliaj.

Sipas PD, një interpretim më i butë i masës së “arrestit në burg” mund të çojë në ndryshime të statusit për persona të ndaluar, përfshirë figura të profilit të lartë politik dhe të krimit të organizuar, duke rrezikuar besimin e publikut te pavarësia e gjyqësorit.

Në të njëjtën kohë, në letër përmenden edhe deklarata të fundit nga përfaqësues të pushtetit ekzekutiv, përfshirë Kryeministrin, që kanë kritikuar përdorimin e paraburgimit, çka sipas opozitës shton shqetësimet për ndikim të mundshëm mbi drejtësinë.

PD vlerëson se lufta kundër korrupsionit dhe funksionimi i institucioneve si SPAK janë thelbësore për procesin e integrimit evropian të vendit.

Në përfundim, Grupi Parlamentar i PD u bën thirrje ambasadave që të monitorojnë nga afër procesin në Gjykatën e Lartë, të inkurajojnë transparencën dhe respektimin e standardeve ndërkombëtare, si dhe të mbështesin garantimin e një sistemi drejtësie të pavarur dhe të paanshëm.