Prej disa javësh ka nisur gjyqi kundër Emiljano Shullazit në Gjykatën e Krimeve të Rënda.
Avokatët kanë kundërshtuar provat e paraqitura nga prokuroria dhe kanë kërkuar që ato t’i nënshtrohen debatit gjyqësor. Ish-kryeministri Sali Berisha pritet që në seancat e ardhme, në gjyqin kundër Emiliono Shullazit.  Po ashtu në këtë gjyq pritet të japin dëshminë e tyre dhe Ardian Çipa dhe Marsida Musai. Ky ka qenë vendimi i Gjykatës së Krimeve të Rënda, me kërkesë të avokatëve të Emiljano Shullazit. Emri i Berishës në këtë çështje ka dalë nga ish-ministri i Brendshëm, Saimir Tahiri, i cili teksa dëshmonte para gjykatës së Krimeve të Rënda tha se personi që ka dijeni të plotë mbi kërcënimet ndaj dy profesorëve Dhori Kule dhe Mynyr Koni, është SaliBerisha. Avokatët e Shullazit, duke u nisur nga postimi i Berishës në Facebook, kanë kërkuar që dhe ish-kryeministri të jetë pjesë e dëshmitarëve. Sipas informacioneve Berisha pritet të pyetet në lidhje me rrethanat se si ishte vënë në dijeni të këtyre kërcënimeve dhe çfarë dinte mbi këto kërcënime të profesorëve. Gjykata ka pranuar këtë kërkesë të avokatëve dhe ka ftuar në seancën e të martës së ardhshme ish-kryeministrin Sali Berisha të paraqitet në gjyqin e Shullazit

Një foshnjë e sapolindur ka humbur jetën në maternitetin “Koço Glozheni” në Tiranë. Ngjarja e rëndë ka ndodhur gjatë ditës së djeshme, e hënë, ku në maternitet, kanë shkuar në gjendje të rëndë, 40-vjeçarja V.K., banues në Tiranë, me foshnjën dy javëshe. Mësohet se foshnja ka lindur në kushtet e shtëpisë dhe vdiq në maternitet kurse nëna është në gjendje të rëndë. Nga veprimet paraprake kryera rezulton se V.K., vuan nga çrregullime mendore. Për shkak të natyrës delikate të çështjes, por edhe për shkak të gjendjes së gruas, nuk bëhen me dije detaje të tjera. Ndërkohë materialet iu referuan Prokurorisë së Tiranës, për vlerësim të mëtejshëm.

Forca Detare shpëton një peshkarexhe me 4 persona në bord në afërsi të Llamanit. Peshkarexha “Andi 2” me tonazh 100 ton kishte kërkuar ndihmë në QNOD. Anija e Forcës Detare “Bora” shkoi në vendngjarje duke u ardhur në ndihmë ekuipazhit dhe peshkarexhes. Peshkarexha me probleme në motorr u ankorua në bazën e Porto Palermos.

Kryeprokurorja Arta Marku ka marrë pjesë në analizën e Prokurorisë së Korçës, ku ka kërkuar aplikimin e Marrëveshjes dhe Urdhrit Penal. Qëllimi i saj sipas Markut është që prokurorët të jenë më të angazhuar dhe fokusuar tek hetimi i veprave penale me rrezikshmëri të theksuar dhe sensitive për Korçën. “Mbështesim prokurorët për hetime në lëndën e korrupsionit. Kjo të bëhet duke kërkuar dhe mbështetur forma të reja bashkëpunimi me policinë gjyqësore, agjencitë e tjera në Korçë, si Shërbimi Informativ Shtetëror (SHISH), etj. dhe tërheqja e qytetarëve në luftën kundër korrupsionit. Përkrahim hetime më të thelluara në luftën kundër drogës, ku megjithë suksesin e arritur, e bën të domosdoshme që prokuroria të mos mbetet vetëm me goditjen e shpërndarësve të lëndëve narkotike, por të identifikojë dhe vendosë përpara përgjegjësisë penale grosistët, grupet që financojnë dhe organizojnë kultivimin e lëndëve narkotike, trafikimin etj”, është shprehur Marku. Ajo foli dhe për nëpunësit publike që janë shkelës të ligjit, duke shprehur mbështetjen për prokurorët për identifikimin dhe regjistrimin e veprave të tyre penale. “Nxisim analiza të përbashkëta me organet tatimore dhe doganore për të identifikuar shkelje të ligjit në këto fusha nëse ka, pasi siç del nga raporti për vitin 2017 ka vetëm një kallëzim nga këto organe”, tha Marku.