Ardi Veliu është emëruar drejtor i Përgjithshëm i Policisë së Shtetit. Ai fitoi gradën “Drejtues i Parë” në konkursin e zhvilluar pak kohë më parë në akademinë e Policisë. Kjo gradë është e nevojshme për të mbajtur postin e Drejtorit të Përgjithshëm të Policisë. Aktualisht, Veliu mban postin e drejtorit të policisë së Tiranës. Vetëm pak ditë më parë policia e Tiranës zbardhi brenda pak ditësh një nga vrasjet më të bujshme që tronditi kryeqytetin. Ishte vetë Veliu që bëri të ditur detajet e operacionit. Aktualisht, i komanduar pas largimit të Haki Çakos ishte Rebani Jaupi.

Bashkia e Tiranës paralajmëron disiplinimin e zhurmës nga lokalet, duke ndarë zonat rezidenciale nga ato të argëtimit. Ka qenë vetë kreu i bashkisë Erion Veliaj që ka bërë të ditur lajmin, gjatë nisjes së zbatimit të marrëveshjes me ministrinë e Brendshme, “Për formimin dhe kualifikimin e punonjësve të Policisë Bashkiake”. “E njëjta gjë ndodh jo vetëm me zaptimet e rrugëve, por edhe me muzikën e lartë. Ka ardhur koha që në Tiranë të kemi një diferencim shumë të qartë, ku janë vendet ku t’i mund të bësh aheng dhe ku është një vend tjetër ku fëmijët duhet të shkojnë të flenë sepse vjen e nesërmja për të shkuar në shkollë dhe familja duhet të ketë një paqe qoftë edhe akustike përpara se të përgatitet për ditën e re. Kemi filluar një proces me Ministrinë e Mjedisit, nën drejtimin e kryeministrit, për t’u siguruar që në qytetet tona edhe këto hapësira të sistemohen, duke i ndarë zonat rezidenciale nga zonat që janë për argëtim”, nënvizoi Veliaj.

Në një interpelancë të kërkuar përmes Platformës së Bashkëqeverisjes “shqiperiaqeduam.al” nga një grup studentësh të ekselencës, ministri i Europës dhe Punët e Jashtme, Ditmir Bushati u shpreh se marrëveshja e re me Greqinë do të jetë më e mirë se ajo e 2009. Bushati thotë se çdo diskutim në media për 12 milje detare, apo për falje të detit, është thjesht një shpifje. “Ne kemi disa fakte që janë të pakundërshtueshme, kemi një marrëveshje që u shfuqizua nga Gjykata Kushtetuese, e për pasojë kjo është pika e nisjes për çdo marrëveshje të re me Greqinë. Për dy vendet burojnë disa të drejta dhe detyrime dhe nuk mund të jenë fakultative për dy vendet. E drejta ndërkombëtare është pika e dyta. Dy vendet kanë legjislacion të brendshme dhe kjo merret për bazë në këto diskutime. Nga 2013 kemi bërë disa diskutime, pasi ka qenë në interesin e të dy palëve për të gjetur një zgjidhje. Çdo marrëveshje e re që do të duhet të arrihet do të jetë më e mirë nga ajo që është arritur nga qeveria Berisha, në 2009. Në thelb, vendimi i Gjykatës Kushtetuese është shumë i qartë. Çështje e delimitimit të hapësirës detare është pjesë e diskutimeve. Duke ballafaquar pikëpamjet. Jemi krejt të bindur se duke respektuar këto që thash më lart do të kemi një marrëveshje disa herë më e favorshme se ajo e 2009, të drejt dhe të zbatueshme në praktikë. Çdo diskutim në media për 12 milje, apo për falje, është thjesht një shpifje dhe këtë koha do ta vërtetojë këtë. Ne shpresojmë që në një kohë jo të largët do të kemi një marrëveshje të re”, u shpreh Bushati. Heqja e ligjit të luftës për ministrin e Jashtëm Bushati do të ndihmonte në fitimin e të drejtës së pronësisë tek ata persona që ishte vendosur sekuestro. “Për herë të parë një qeveri greke e pranon zyrtarisht që kjo gjendje lufte është relike e së kaluarës që duhet të shfuqizohet. Kemi kërkuar që ligji i luftës, apo dekreti mbretëror që sanksionoi regjimin e luftës ndaj Shqipërisë dhe vuri në sekuestro konservative një pjesë të mirë të pronave të shtetit shqiptar, shtetasve shqiptarë, të qytetarëve shqiptar me kombësi greke, duhet të shfuqizohet me një akt po të njëvlefshëm që ka të njëjtën fuqi ligjore në sistemin juridik grek. Ky akt nuk mund të ishte kursesi një kontratë e dyanshme. Përmes këtij procesi do të kemi situatë të re politike ndërmjet Greqisë dhe Shqipërisë sikundër do u jepet mundësia të tre kategorive ti drejtohen instancave greke për të fituar të drejtën e pronësisë. Do të kemi një çlirim jo thjesht psikologjik po dhe mundësinë që këto tre kategori të përfitojnë të drejtën pronësore siç i takon”, tha Bushati. Ndërsa për çështjen çame, Bushati tha se për herë të parë ka shkëmbim të dhënash mes dy shteteve në rast se refuzohet kalimi për shtetasit çam. “Dua të them që qeveria Rama është e para që zyrtarisht në programin qeveritar, e përfshiu këtë çështje si pjesë te dosjes diplomatike. Në këtë çështje të dytë më vjen mirë të deklaroj se me qeverinë greke jemi në një pozicion më të favorshëm se para disa vitesh, sepse ka filluar shkëmbimi i të dhënave, apo informacionit për rastet kur i refuzohet hyrja në territorin grek të qytetarëve shqiptarë që janë pjesë e komunitetit çam”, tha ministri.