Ministri i Brendshëm Fatmir Xhafaj zhvilloi një vizitë në Maqedoni, ku u prit në Ohër nga homologu maqedonas Oliver Spasovski.  Në axhendën e bisedimeve ishte forcimi i bashkëpunimit ndërmjet dy vendeve në fushën e sigurisë, luftës kundër trafikut të drogës, terrorizmit, si dhe bashkëpunimin ndërkufitar. Gjatë kësaj vizite u nënshkrua “Protokolli i bashkëpunimit për luftën kundër terrorizmit”, i cili u finalizua pas një pune të ekspertëve nga dy vendet.  Një çështje tjetër, me rëndësi në bisedimet e zhvilluara ishte ngritja e një Qendre Rajonale e Bashkëpunimit Policor, për vendet e Ballkanit Perëndimor.  Ky projekt i propozuar nga Xhafaj ka marrë mbështetje nga vende të ndryshme të BE-së, nga Komisioneri Avramopulos, dhe u përkrah plotësisht edhe nga Ministri Spasovksi. Gjatë bisedimeve të sotme u ra dakord gjithashtu edhe për nisjen e punës për ngritjen e pikave të përbashkëta kufitare në Qafë Thanë, Tushemisht dhe Trebisht.  Pas takimit, në konferencë për mediat, ministri Xhafaj u shpreh: “Mund t’iu them se nuk kishim asnjë çështje ku ndaheshim, ishin të gjitha çështje që kishim dakordësi shumë të mirë midis nesh. Kishim dakordësi për të gjitha këto çështje, për bashkëpunimin që kemi dhe për bashkëpunimin që duhet të ndërtojmë. Dhe nuk kishte se si të ishte ndryshe, për shkak se kjo është produkt i atij raporti të shkëlqyer që ekziston ndërmjet dy vendeve, dy qeverive dhe dy popujve tanë. Ne jemi fqinjë të mirë me njëri tjetrin. Detyra jonë është t’i shërbejmë kësaj miqësie, kësaj fqinjësie të mirë. Dhe ne diskutuam me Ministrin dhe ekipin e tij disa tema të rëndësishme për t’i avancuar ato më tej,” tha ministri shqiptar i Brendshëm.  Duke nënvizuar rëndësinë e këtij bashkëpunimi, Xhafaj theksoi: “Unë besoj se çështjet që diskutuam për luftën kundër terrorizmit dhe luftën kundër krimit të organizuar, kontribuojnë për qetësinë dhe sigurinë në dy vendet tona, por kontribuojnë për qetësinë dhe sigurinë edhe në rajon.Po ashtu iniciativat ku ne bashkëpunojmë deri më sot apo iniciativat e reja që dëshirojmë të zhvillojmë më tej i shërbejnë miqësisë ndërmjet dy vendeve por edhe të ardhmes së rajonit. Unë besoj se disa nga temat dhe disa nga propozimet që u dakordësuan për t’u zhvilluar më tej, do t’i shërbejmë akoma më shumë lëvizjes së lirë të njerëzve dhe mallrave mes dy vendeve” u shpreh Xhafaj.

Del jashtë kontrollit situata në Gjirokastër. Reshjet intensive kanë sjellë daljen nga shtrati të liqenit të Viroit. Mësohet se ujërat e liqenit kanë kapërcyer mbi urën e dëmtuar në fillim të muajit dhjetor. Autoriteti Rrugor Shqiptar informon se aktualisht rruga tek Ura e Viroit në aksin Tepelenë-Gjirokastër është e bllokuar për autoveturat. Prurja e ujit nga liqeni që shkarkohet mbi rrugë është rritur dhe pengon kalimin e autoveturave. Punonjësit e ARRSH, kompanisë së mirëmbajtjes, Policia Rrugore dhe Prefektura po ndjekin nga afër situatën.

Bashkitë dhe Ndërmarrjet e Ujësjellës-Kanalizimeve janë vënë në krye të aksionit kombëtar kundër abuzimit me ujin e pijshëm. Në Tiranë verifikohen deri në 100 subjekte në ditë, ndërsa në Elbasan e qytete të tjera mungesa e kontratës evidentohet si problematika kryesore. Aksioni vijon në të gjithë vendin me paralajmërimin se asnjë abuzues me ujin nuk do të falet. Aksioni për të ndërprerë lidhjet e paligjshme të ujit po vijon me intensitet në të gjithë vendin. Paralajmërimi i kryeministrit Edi Rama se financimet e vendorëve do të varen nga rezultatet e aksionit duket se ka angazhuar më shumë këta të fundit. 9 grupet e task-forcës të ngritura në Tiranë, arrijnë deri në 100 verifikime në ditë, me paralajmërimin e qartë se asnjë abuzues nuk do të falet.