Burgjet bënë sot “ngriva-shkriva” me prokurorin e korruptua, Haxhi Giu. Ai u lirua nga amnistia dhe më pas u rikthe në mjediset e burgut të Peqinit ku kishte vuajtur një dënim modest. Por në fund ai u la i lirë sërish dhe tashmë është përfundimisht në liri.

Gjithçka erdhi pasi drejtoria e Burgut në Peqin i kishte kërkuar Giut, i cili akuzohej për korrupsion, që të rikthehej në burg, pavarësisht faktit se ai përfitoi nga amnistia, mes shumë të dënuarve të tjerë.

Vetë ish-prokurori pohoi se e kishin telefonuar nga burgu, ku i kërkonin që ai të shkonte sërish atje.

“Më telefonuan nga burgu, më kërkojnë të kthehem”, – tha Giu duke denoncuar faktin më media.

Nga ana e tij Drejtori i Përgjithshëm i Burgjeve Miklovan Kopani deklaroi se ish-prokurori i Krujës, Haxhi Giu, i cili ishte mes të dënuarve që përfituan sot lirinë nga amnistia, është rikthyer në ambientet civile të burgut.

Në një lidhje telefonike, Kopani tha se Giu u rikthye në burg për verifikim, ndërsa shtoi se ai do të jetë përfitues sipas ligjit.

Kopani pohoi se për shkak të amullisë së krijuar në media për rastin “Giu”, drejtoria e Burgjeve vendosi të rishikojë rastin dhe dosjen e tij.

“Është rikthyer në ambientet e civile të burgut, dhe jo në burg. Duke bërë kështu kalkulimin e ditëve të burgut. Ne me korrektësi për zbatimin e ligjit kërkuam një hetim për vendimin e gjykatës. Zotëria nuk mund të privohet nga e drejta e tij por për shkak se jemi në limite, ne pas shqyrtimit, me mirëkuptimin e Giut, do bëjmë vendime të mëtejshme”, – tha Kopani.

Ish-Prokurorit të Krujës, Haxhi Giu i kishin mbetur edhe 9 muaj e 17 ditë burg. Por ai ka përfituar sot nga amnistia duke lënë qelinë e burgut të Peqinit që në mëngjes.

Gjykata e Krimeve të Rënda e dënoi prokurorin për akuzën e korrupsionit pasiv me 2 vite e 4 muaj burg, pasi përfitoi nga gjykimi i shkurtuar.

Akuza e korrupsionit pasiv lidhet me rastin e shtetasit Paulin Shporin nga Shkodra, të cilit Giu në këmbim të një shume të majme parash, 29 mijë euro, tentoi t’i zbusë akuzën nga “trafik narkotikësh”, në “moskallëzim krimi”.

Ish-prokurori Haxhi Giu u arrestua më 2 dhjetor 2015, rreth orës 15:13, teksa udhëtonte në makinën e tij nga efektivët e Policisë së Tiranës “Shqiponja”. Në cilësinë e provës materiale policia i sekuestroi ish-prokurorit shumën prej 28 mijë e 800 eurosh; gjithashtu si prova u sekuestruan DVD me pamje filmike të marra nga ambiente të ndryshme (lokale, exchange), ku janë zhvilluar takimet dhe shkëmbimi i parave ndërmjet shtetasve Haxhi Giu dhe Aleks Shpori. Ditën e sotme 130 persona kanë lënë qelinë e burgut të Peqinit, duke përfituar nga amnistia.

Partia Drejtësi, Integrim dhe Unitet ka depozituar në Kuvend kërkesën për ngritjen e një Komisioni të Posaçëm për Tragjedinë Çame. Në këtë nismë kërkohet që të ngrihet një komision i cili të zbardhë faktet dhe rrethanat për masakrën që ndodhi mbi shqiptarët e Çamërisë në vitin 1944. Në një konferencë për mediat nga Kryesia e Kuvendit, deputetja e PDIU-së znj.Mesila Doda u shpreh se do të zbardhet masakra që ndodhi mbi shqiptarët e Çamërisë në vitin 1944-të.

“Nisma e PDIU-së është depozituar që në datën 20 dhjetor të 2016-s. Kjo nismë ka të bëjë me ngritjen e një Komisioni të Posaçëm në Kuvendin e Shqipërisë, për evidentimin e fakteve, rrethanave dhe përgjegjësive të shpërnguljes me dhunë dhe masakrës mbi shqiptarët e Çamërisë në vitin 1944-të. Bëhet fjalë për një moment të historisë sonë, i cili nuk është zbardhur kurrë tërësisht. Ne nuk jemi njohur me përmasat e asaj tragjedie dhe për mënyrën se si erdhi. Kërkesa e PDIU-së ka për qëllim zbardhjen e këtyre fakteve dhe rrethanave.

Ka patur edhe komisione të tjera të cilat kanë qënë me karakter historik, por në Kuvendin e Shqipërisë, është hera e parë që një nismë e tillë merr jetë. Kjo nismë vjen edhe si kërkesë jo vetëm e popullsisë çame në Shqipëri, por edhe si kërkesë e të gjithë shqiptarëve. Nga ana tjetër nuk është plotësuar kurrë nga ana e shtetit shqiptar një dosje parlamentare, në të cilën të kemi të depozituara përmasat e tragjedisë, por edhe faktet që kanë sjellë këtë genocid”, – u shpreh znj. Mesila Doda.

Një 50-vjeçar ka rrezikuar që të mbytet në liqenin e Pogradecit pasi kishte dalë me varkë dhe kishte rënë në ujë e ishte thuajse pa ndjenja.

Pas njoftimit të bërë rreth orës 07:55 nga Patrulla e Përgjithshme e Policisë se Pogradecit për një qytetar me varkë, i cili kërkonte ndihmë në brendësi të liqenit, brenda pak minutash ka shkuar mjeti lundrues ì policisë kufitare.

Policia ka arritur që të nxjerrë 50 vjeçarin me inicialet Y. B., nga uji thuajse pa ndjenja dhe e transportoi me ambulancë për në spitalin rajonal, ku ju dha ndihma mjekësore dhe është jashtë rrezikut për jetën.

Një person i shpallur në kërkim është ndaluar nga policia e Korçës, pasi ishte dënuar me disa vite burg për “vrasje e mbetur në tentativë”. Mësohet se në pranga është vënë Irjat Rukaj, 51 vjeç, banues në fshatin Shqitas-Maliq.

Ndalimi i tij u bë në bazë të vendimit të formës së prerë, të  Gjykatës së Rrethit Gjyqësor Korçë, e cila e ka dënuar këtë shtetas me 9 (nëntë) vjet, 8 (tetë) muaj, e 18 (tetëmbëdhjetë) ditë burg për veprat penale: “Vrasja me dashje, e mbetur në tentativë” dhe “Prodhimi dhe mbajtje pa leje e armëve të gjuetisë dhe sportive”.

Ngjarja për të cilën akuzohet 51 vjeçari ka ndodhur më datë 8 tetor të vitit 2015, në fshatin Shqitas, ku Irjat Rukaj, është konfliktuar për motive të dobëta, me dy vëllezërit Dinoshi.