Kryeministri Edi Rama reagon lidhur me lirimin me kusht të kreut të Aleancës për Ardhmërinë e Kosovës, Ramush Haradinaj.

“Mirëukthefsh në Prishtinë i dashur Ramush. Mbyllet episodi absurd por beteja për fshirjen e listës së urdhër-arresteve te vjetra vazhdon”, shkruan Rama në profilin e tij në Twitter.

Gjykata franceze liroi sot me kusht kreun e Aleancës për Ardhmërinë e Kosovës, Ramush Haradinaj.

Vendimi u dha ditën e sotme nga Gjykata e Colmar në Francë.  Ish- kryeministri i Kosovës do të duhet të paraqitet dy herë në javë pranë autoriteteve franceze dhe nuk mund të largohet nga shteti ku u ndalua.

Këtë të martë pala serbe u dërgoi autoriteteve franceze kërkesën për ekstradimin e ish-Kryeministrit të Kosovës drejt Beogradit.

Përmes saj u kërkua që Haradinaj, i cili u arrestua më 4 janar, të ekstradohej nga paraburgimi i Colmar në Francë, drejt Serbisë.

Ramush Haradinaj u arrestua më 4 janar në Francë në bazë të një urdhër arresti të lëshuar nga Serbia të vitit 2004, i dyshuar për krime lufte.

Partia Demokratike thotë se në dhjetv ditët e para të këtij vitit, rreth 4 ton e gjysmë drogë, kanë kaluar përmes kufijve të Shqipërisë në drejtim të Italisë dhe Greqisë.

Kreu i departamentit për rendin dhe sigurinë në PD, Enkelejd Alibeaj në një dalje të sotme nga selia blu tha se në Otranto, Torre-Veneri, Napoli, Lece, Brindizi, kanë mbërritur rreth 4 tonë drogë në këto 10 ditë, të kapura e të sekuestruara nga policia italiane.

Sipas tij, po ashtu, në Igumenicë, Selanik, Kostur, janë kapur rreth 500 kg droge, nga policia greke dhe se afërsisht 4 tonë e gjysëm, në 10 ditë, vetëm sasia e kapur, e sekuestruar.

“Këto të dhëna tronditëse, dëshmojnë qartë se karteli qeveritar i drogës vazhdon pa ndalesë aktivitetin, dhe qeveria, Rama e Tahiri, i ofrojnë atyre rregullisht lehtësitë për ta transportuar brenda vendit, e për të kaluar kufinjtë tanë”, u shpreh ai.

Alibeaj shtoi se këto të dhëna, dëshmojnë se droga mbetet edhe për këtë vit alternative e Edi Ramës, dhe angazhimi kryesor i “Tahirit të tij”.

Në këtë linjë nënvizoi se koha ka ardhur për ta larguar këtë të keqe, e për të sjellë një qeveri që krijon mundësi për zhvillim e punë të ndershme.

Lënda narkotike e nisur nga Shqipëria, e kapurën Itali, 01- 11 Janar 2017 sipas PD

01 Janar 2017- Në veri të Otrantos, Guardia Di Finanza sekuestron 400 kg marijuana

04 Janar 2017- Në Torre Veneri, San Kataldo, provincë e Leces, Itali, Guardia Di Finanza ka sekuestruar 510 kg marijuanë.

09 janar 2017- Në Napoli 700 gram heroinë

10 janar 2017- Në Lece në Itali, 700 kg marijuanë në një gomone të braktisur në San Basilio

11 janar 2017- Në Brindizi, 200 kg maijuanë

11janar 2017- Në Brindizi, sekuestrohen nga Guardia di Finanza 1.9 ton marijunë.

11 janar 2017- Në Modena 2 kg heroinë e ardhur nga Shqipëria

Droga e kapur në Greqi sipas PD

02 Janar 2017- Në Igumenicë, 213 kg e 930 gramë marijuanë të ardhura nga Shqipëria

03 janar 2017 –Në Selanik sekuestrohen 51 kg e 984 gramë marijuanë

08 janar 2017- Në Kostur 10kg e 420 gramë marijuanë

09 janar 2017- Në kufirin greko-shqiptar sekuestrohen nga policia greke 22kg e 300 gramë marijuanë

11 janar 2017- Në kufirin greko-shqiptar, 89 kg e 250 gramë marijuanë

Arrestimi i Ramush Haradinaj mund të përkeqësojë edhe marrëdhëniet e Tiranës me Beogradin. Ministri i Jashtëm Ditmir Bushati, në një intervistë për një televizion maqedonas është shprehur se i është bërë e qartë Serbisë se marrëdhëniet varen nga ecuria e procesit të gjithanshëm me Kosovën.

“Rinovimi apo nxjerrja nga sirtari i mandateve të arrestit nga ana e Serbisë, në kushtet kur Bashkimi Evropian nxit sa më shumë Serbinë dhe Kosovën për të ecur përpara në procesin e vështirë të normalizimit të marrëdhënieve, në kushte kur ne si Shqipëri kemi nxitur vijimësisht Kosovën për të ecur përpara në këtë proces. Në kushte kur ne si Shqipëri ia kemi bërë të qartë Serbisë që marrëdhëniet ndërmjet Shqipërisë dhe Serbisë varen gjithashtu nga ecuria e procesit të gjithanshëm e normalizimit të marrëdhënieve ndërmjet Serbisë dhe Kosovës, sepse nuk janë marrëdhënie që zhvillohen në boshllëk, në vakum, i gjithë ky akt, kam përshtypjen ndikon negativisht apo përpiqet të minojë edhe ato suksese, edhe ato hapa, të cilët janë hedhur me vështirësi gjatë gjashtë viteve të fundit”, është shprehur z. Bushati.

Duke u ndalur tek Maqedonia, ministri Bushati tha se Shqipëria nuk është përfshirë në çështjet e brendshme të një vendi tjetër, por ka zbatuar një detyrim kushtetues, që ka të bëjë me mbrojtjen dhe avancimin e të drejtave të shqiptarëve, pavarësisht se ku ata jetojnë, shkruan tch. Ai e quan dritëshkurtësi tendencën për të barazuar të drejtat e shqiptarëve në Maqedoni thjesht me lehtësira, ndërsa kërkon zbatimin e Marrëveshjes së Ohrit.

“Çdo tendencë për t’i barazuar të drejtat e shqiptarëve në Maqedoni thjesht me krijimin e lehtësirave nëpërmjet ndërtimit të fabrikave apo zonave të lira ekonomike, në rastin më të mirë, do të ishte dritëshkurtësi dhe në rastin më të keq do të barazonte shqiptarët me një komunitet punëtorësh, të cilët mund të jenë drejt kërkimit të punës. Sa më shpejt të krijohen kushtet për të njohur këtë fakt publikisht, do të krijohen mundësitë për më tepër ura komunikimi ndërmjet dy komuniteteve kryesore shtetformuese, duke mundësuar një përfaqësim më të mirë në institucionet kryesore, zbatim politikash më harmonike ekonomike dhe sociale, për më shumë stabilitet demokratik në Maqedoni”, ka thënë Bushati.