Një person në Tiranë është kapur me armë zjarri. Kujtim Çaushi, 56 vjeç, banues në kryeqytet u arrestua ditën e djeshme nga efektivët e komisariatit nr.6.

Ai dyshohej se dispononte armë zjarri, ku gjatë kontrollit të ushtuar në pjesën e prapme të banesës së tij, i është gjetur dhe sekuestruar në cilësinë e provës materiale një armë zjarri, pistoletë e tipit “Glock”, me një krehër dhe 13 fishekë.

Ndaj tij vijojnë ende hetimet, ndërkohë që materialet i’u referuan Prokurorisë së Tiranës për veprën penale “Prodhimi dhe mbajtja pa leje e armëve luftarake dhe municionit”.

Ndërsa kryedemokrati Lulzim Basha ditën e djeshme vizitoi Kukësin për t’u njohur me situatën si pasojë e motit të keq dhe sulmoi qeverinë, duke kërkuar të shpallë gjendjen e emergjencës, vjen reagimi i Kryeministrit.

“Lulzimi thotë Qeveria po i le punonjësit e OSHEE nëpër shtylla që të ngrijnë! Në programin e PD parashikohen kaloriferë në çdo shtyllë✌”, shkruan Rama në postimin e bërë në Facebook, mesnatën mes të martës dhe të mërkurës.

Në një takim në bashkinë e Kukësit këtë të martë, me drejtuesit lokalë, kryedemokrati Basha tha se edhe pse të braktisur nga qeveria, qytetarët kuksianë ia kanë arritur ta përballojnë situatën.

“Situata e rënduar në të gjithë vendin. Qeveria nuk e merr përsipër emergjencën. Ia ka pasuar bashkive. Shpreh mirënjohjen më të thellë dhe keqardhjen për punonjësit e OSHEE të cilët punojnë në kushte kur shpëtohen nga banorët në situatë të vështira ku nuk është investuar këto 3 vjet. I lënë punonjësit e OSHEE të ngrijnë nëpër shtylla”, tha Basha, i cili i bëri thirrje Ramës që të shohë gjendjen në terren.

Persona të paidentifikuar kanë hequr flamurin grek nga zyrat e OMONIA-s në Sarandë gjatë orëve të para të mëngjesit të sotëm.

Përmes një njoftimi për mediat OMONIA ka dënuar këtë akt duke kërkuar nga autoritetet që të nisin hetimet dhe të arrestojnë personat përgjegjës.

“Për herë të tretë brenda një viti persona të paidentifikuar dhunuan flamurin Grek në zyrat qendrore të “Bashkimit Demokratik të Minoritetit Etnik Grek –OMONIA” në Sarandë.

Fyerja ndaj simbolit tonë kombëtar, provokon ndjenjat e të gjithë Helenëve dhe çdo qytetari që mendon në mënyrë të shëndetshme”, thuhet në reagimin e OMONIA-s.

Një ditë më parë ish-deputeti i PS-së, Koço Kokëdhima, zbuloi shkresën zyrtare dërguar më 5 janar 2017, ku kërkoi nga kreu i PS-së, Edi Rama dhe sekretari i Përgjithshëm, Gramoz Ruçi, që të shpjegonin ligjërisht dhe juridikisht se ku ishte mbështetur shkarkimi i tij nga funksioni i Sekretarit për Reformën Strukturore dhe Emigracionin si dhe futjen jashtë rendit të ditës dhe votimin për përjashtimin e tij nga anëtar i Asamblesë Kombëtare të PS-së.

Ndërsa sot ai publikon shkresën dërguar më 27 Dhjetor 2016 në adresë të Komisionit të Garancive Statutore të Partisë Socialiste të Shqipërisë, me objekt “Kërkesë për interpretim dhe gjykim”, lidhur me shkarkimin e tij dhe përjashtimin nga Asambleja Kombëtare e PS-së.

Më poshtë është kërkesa e plotë e z.Kokëdhima drejtuar Komisionit të Garancive Statutore të Partisë Socialiste të Shqipërisë.

Letra e Kokëdhimës dërguar Ramës dhe Ruçit

“Kërkesa e parë: Në cilësinë e Anëtarit të Partisë Socialiste të Shqipërisë dhe të kongresit të saj, ju kërkoj të interpretoni situatën aktuale kur nuk kemi të qartë se kush është statuti i Partisë Socialiste të Shqipërisë. Siç jeni në dijeni, Kongresi i marsit të vitit 2016, shfuqizoi Statutit e mëparshëm dhe miratoi Statutin e ri në parim. Ky Kongres, la detyrë që në mbledhjen e parë të Asamblesë Kombëtare pas tij, të miratohej drafti i Statutit të ri.

Aktualisht qarkullojnë 3 drafte. Kujt prej tyre t’i referohem unë për nevojat që kam si anëtar i Partisë Socialiste? Cilin prej tyre ju e konsideroni si Statut të Partisë Socialiste në fuqi? Me cilin Statut funksionon aktualisht Partia Socialiste e Shqipërisë, ndërkohë që janë zhvilluar 2 mbledhje Asamblesh Kombëtare pas Kongresit në fjalë?

Kërkesa e dytë: Në mbledhjen e Asamblesë Kombëtare të datës 23 Dhjetor 2016, është vendosur shkarkimi im nga Anëtar i Asamblesë. Ky vendim është tërësisht i gabuar dhe i paligjshëm. Unë e kam mësuar këtë gjë nga mediat, sepse nuk kam qenë prezent në mbledhje gjatë kohës që është marrë ky vendim, i cili nuk ka qenë i përfshirë në rendin e ditës së Asamblesë Kombëtare. Kam kërkuar gojarisht të më vihet në dispozicion vendimi i Asamblesë, por deri më tani nuk më është dhënë. Ne ditët e ardhshme do t’i kërkoj edhe me shkrim. Pavarësisht kësaj, nisur nga të drejtat e mia, Ju kërkoj ta shqyrtoni dhe ta rrëzoni këtë vendim si të pabazuar në Statut, të pabazuar në procedura, të pabazuar në përmbajtje, si një vendim absolutisht të pavlefshëm. Kur të kem marrë në dorë dokumentat e Asamblesë, do t’ju paraqes parashtrimet e mia më të plota”.