Prokuroria për Krime të Rënda ka sekuestruar hotelin në funksion “Rezidenca President” në bregdetin e Sarandës, pasi ekzistojnë dyshimet e arsyeshme se është ndërtuar nga paratë e siguruara prej aktivitetit kriminal në Belgjikë të pronarit Gentian Ndreu.

Prokuroria për Krime të Rënda ka nisur hetimin pasuror në kuadër të ligjit “Antimafia”, pas kërkesës për ndihmë juridike të autoriteteve të Belgjikës.

Deri në këtë fazë të hetimit, Prokuroria ka krijuar dyshime të arsyeshme se hoteli është ndërtuar nga të ardhurat e siguruara nga aktiviteti i “Shfrytëzimit të prostitucionit”, për të cilin është hetuar në Liege (Belgjikë) shtetasi Gentian Ndreu.

Bazuar në të dhënat e deritanishme, prokuroria kërkoi vendosjen e sekuestros mbi këtë pasuri, gjë e cila u miratua nga Gjykata për Krime të Rënda.

Në bazë të të dhënave hetimore rezulton se Gentian Ndreu është pjesë e një procedimi penale për “Shfrytëzim prostitucioni” në Belgjikë. Ai akuzohet nga Prokuroria e Liege se, në vitet 1999-2003, ka shfrytëzuar për prostitucion një shtetase shqiptare.

Nga hetimit pasuror, i kryer nga Prokuroria për Krime të Rënda ndaj Gentian Ndreut dhe familjarëve të tij, rezultoi se babai i tij, Osman Ndreu ka në pronësi hotelin në Sarandë.

Gjithashtu, rezulton se asnjë prej familjarëve Ndreu nuk ka pasur mundësi ekonomike të mjaftueshme për të ngritur ndërtesën e hotelit, si edhe për zhvilluar sipërmarrje të tillë ekonomike.

Në këto kushte, Prokuroria për Krime të Rënda ka krijuar dyshime të arsyeshme se hoteli është krijuar nga të ardhurat e përfituara nga aktiviteti kriminal në Belgjikë i shtetasit Gentian Ndreu.

Prokuroria thotë se kjo pasuri plotëson kriteret e parashikuara nga neni 11 i ligjit nr. 10192 datë 03.12.2009 “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”, i njohur si ligji “Antimafia”.

Në vijim detajohen këto konstatime:

-së pari, pasuria është përfituar gjatë përfshirjes së dyshuar të shtetasit Gentian Ndreu .

-së dyti, kjo pasuri nuk i përgjigjet nivelit të të ardhurave të shtetasve Gentjan Ndreu dhe Osman Ndreu.

-së treti, ekziston rreziku i humbjes apo tjetërsimit pasi subjektet mund të marrin dijeni për hetimin dhe të tjetërsojnë këto pasuri.

Një operacion i policisë së Shkodrës i koduar “Trip” ka zbuluar lëndë narkotike, duke vënë në pranga dy shqiptarë dhe një italian.

Ky operacion u zhvillua ditën e djeshme gjatë të cilit u arrestuan në flagrancë Marco Cavanna, 58 vjeç, banues në Itali, shtetas italian dhe dy shqiptarët Elton Hyseni, 22 vjeç, banues në Itali dhe Arsen Hysaj, 29 vjeç, banues në Shkodër.

Ndalimi i tyre u bë pasi në pikën e kalimit kufitar në Muriqan, italianit Cavanna në çantën e dorës ju gjetën dhe sekuestruan në cilësinë e provës materiale 124 gramë lëndë narkotike kanabis sativa, të cilën në bashkëpunim me dy shqiptarët po tentonin ta kalonin përtej kufirit.

Tre të dyshuarit u arrestuan në kushtet e flagrancës, ndërsa në ngarkim të tyre materialet i kaluan Prokurorisë së Krimeve të Rënda Tiranë, për veprën penale “Trafikimi i narkotikëve” në bashkëpunim.

Specialisti i Policisë Rrugore në Policinë e Shtetit, Ervin Dervishi, këshillon drejtuesit e mjeteve që të bëjnë kujdes në ditët e festave.

Në një dalje për mediat ditën e sotme ai tha se sezoni i fundvitit është një sezon i mbushur me festa dhe me plot aktivitete ku nuk mungojnë hareja, organizimet mes miqsh, kolegësh, festat familjare etj, ku për shkak të përdorimit të pijeve alkoolike, shpërqendrimit, shkujdesjes së drejtuesve të mjeteve, jo rrallë herë jemi përballur me aksidente me pasoja fatale për jetën e përdoruesve të rrugës.

Në këtë linjë ai tha se ky është një sezon me një shtim të fluksit të qarkullimit për të gjitha kategoritë e përdoruesve të rrugës.

Dervishi deklaroi se Policia Rrugore u bën thirrje të gjithë përdoruesve të mjeteve të tregojnë kujdes të veçantë në përdorimin e rripave të sigurimit për vete dhe për të gjithë pasagjerët në bord si dhe të kenë kujdes të veçantë ndaj këmbësoreve dhe çiklistëve.

“Të tregojnë mirëkuptim me drejtuesit e tjerë të mjeteve dhe të mos shfaqin sjelle agresive dhe intolerace ndaj tyre. Të evitojnë përdorimin e substancave alkoolike si dhe limitet e shpejtësisë së lejuar. Të mos bëhen shkaktarë dhe burim aksidentesh për shkak të parakalimeve dhe mos qëndrimit në autokolonë kur ka radhë të gjata trafiku. Drejtuesit e mjeteve të shmangin përdorimin e telefonit gjatë drejtimit të mjetit”, u shpreh Dervishi.

Më tej kërkoi që këmbësorët nga ana e tyre të tregohen të vëmendshëm dhe të kujdesen për vete dhe për fëmijët apo të moshuarit që kanë në krah dhe të respektojnë shenjat e punonjësit të policisë si dhe vendkalimet për këmbësoret.

Aty ku vendkalimet mungojnë, janë të detyruar të presin derisa mjetet t’u japin përparësi atyre tha ai.

Ndërkohë për çiklistët, kujtoi që të përdorin kaskat mbrojtëse për sigurinë e tyre dhe të respektojnë të gjitha rregullat e qarkullimit rrugor ashtu si të gjithë përdoruesit e tjerë të rrugës.

Për motoçiklistët bëri me dije, se e kanë kusht të panegociueshëm mbajtjen e kaskës mbrojtese dhe ndërkohë të jenë të kujdesshëm në respektimin e normave të sjelljes të kodit rrugor.

Po ashtu tha se Policia Rrugore është në detyrë dhe në funksion të rritjes së sigurisë rrugore do të ushtrojë kontrolle të vazhdueshme ndaj të gjithë përdoruesve të rrugës për të gjitha shkeljet e rregullave të qarkullimit rrugor.

“Bashkëpunoni me Policinë rrugore dhe me të gjitha patrullat e policisë, telefononi në numrin 112 për Tiranën dhe 129 për qarqet, për çdo rast nevoje dhe shqetësimi. Nga ana tjetër, mos hezitoni të raportoni çdo shkelje të rregullave të qarkullimit rrugor. Denonconi çdo abuzim sado i vogël qoftë nga punonjësi i policisë në detyrë”, tha ndër të tjera.

Ai e mbylli fjalën duke bërë një thirrje për përdoruesit e rrugës, që të shmangin përdorimin e alkoolit, të vendosin rripin e sigurimit dhe kaskën mbrojtëse, të mos përdorin aparatin telefonik gjatë drejtimit të mjetit dhe të mos shpejtojnë për të arritur aksidentin.