Eurozona, ekonomia tkurret me 12.1%, Eurostat publikon të dhënat për tremujorin II-të

0
10

Prodhimi i brendshëm bruto i eurozonës ka regjistruar në tremujorin e dytë një rënie historike prej mbi 12 për qind si pasojë e masave kufizuese në transport, biznese dhe lëvizje të qytetarëve për shkak të koronavirusit. 

Tremujori i dytë i vitit ka rezultuar më negativi për ekonominë e eurozonës, e cila prej muajsh po përpiqet të mënjanojë pasojat e pandemisë së kovidit të ri.

Zyra e statistikave e Bashkimit Europian informoi të premten se prodhimi i brendshëm kombëtar i 19 vendeve të unionit monetar u tkurr me 12,1 për qind në muajin qershor nga tremujori i kaluar, ndërsa bilanci i 27 vendeve anëtare ra me 11,9 për qind, rënie këto më të fortat në historinë 25-vjeçare të eurozonës.

Nga viti në vit, ekonomitë që përdorin monedhën euro dhe ato kryesore evropiane janë tkurrur përkatësisht me 15 dhe 14,4 për qind.

Mes vendeve anëtare, Spanja duket se i ka përjetuar më rëndë efektet ekonomike të pandemisë së koronavirusit, me një rënie rekord gati 18,5 për qind në muajt prill-qershor, ndjekur nga fqinji tjetër Iberik, Portugalia, me 14,1 për qind, Franca 13,8, Italia 12,4, dhe Gjermania e cila humbi 10,4 për qind të prodhimit të saj kombëtar.

Banka Qendrore Evropian pret që aktiviteti ekonomik do i rikuperojë shpejt humbjet në tremujorin në vijim, falë edhe fondit 750-miliardë euro të miratuar për daljen nga kriza.

Me optimizëm shihen edhe shifrat për papunësinë në BE, që qëndron aktualisht në nivelin 7,8%.

Periudha prill-qershor e këtij viti përkoi me kohën kur shumica e qeverive evropiane aplikuan masa të rrepta të karantinimit të popullatave për të ndalur përhapjen e virusit SARS-Cov-2.

Disa prej vendeve tani raportojnë rritje të infeksioneve pas heqjes së këtyre kufizimeve në lëvizje.

Autoritetet po përgatiten për rregulla më strikte të distancimit social për të evituar sa të munden goditjen nga vala e dytë e pandemisë, por është paralajmëruar se nuk do të jetë më skenari i bllokimit thuajse total të ekonomive siç ndodhi në muajt e pranverës.

Një ditë më parë, edhe Shtetet e Bashkuara të Amerikës njoftuan tkurrjen historike të ekonomisë, minus 32,9 për qind në terma vjetorë, ndërkohë që në këto 19 javët e fundit rreth 54 milionë amerikanë janë listuar si të papunë për shkak të krizës prej kovidit-19.