“Sfidat kanë qenë të mëdha, por jam krenar” Fatmir Xhafaj flet pas dorëheqjes

0
42

Fatmir Xhafaj ka folur për herë të parë pas dorëheqjes se tij nga posti që mbante në krye të Ministrisë së Brendshme, që prej marsit të 2017-ës.
Përmes një postimi publikuar në faqen e Facebook të Ministrisë së Brendshme, ai ka falenderuar kryeministrin Rama për mundësinë e dhënë dhe shprehet se e ka dhënë me vullnet të plotë dorëheqjen, por pa dhënë ndonjë arsye konkrete.
Xhafaj ka bërë të ditur se sfidat kanë qenë të mëdha, por është krenar se në krye të një ekipi me integritet e përkushtim në Ministrinë e Brendshme dhe Policinë e Shtetit, ka mundur të arrij suksese shumë të rëndësishme në forcimin e rendit dhe sigurisë në vend.
Në mesazhin e publikuar pas dorëheqjes, Fatmir Xhafaj, falenderon ekipin e kolegët me të cilët bashkëpunoi gjatë kësaj periudhe.
Mesazhi i ministrit Fatmir Xhafaj
Pas më shumë se 1 viti në krye të Ministrisë së Brendshme, me vullnetin tim, i kam paraqitur Kryeministrit Edi Rama dorëheqjen time si Ministër i Brendshëm, duke e falënderuar për besimin e dhënë me emërimin në këtë detyrë të rëndësishme.
Erdha në këtë detyrë për një mision të vështirë, shërbeva me pasion, me modesti dhe me devotshmëri në shërbim të shtetit, të ligjit dhe të qytetarëve.
Sfidat kanë qenë tepër të mëdha, por jam krenar se në krye të një ekipi me integritet e përkushtim në Ministrinë e Brendshme dhe Policinë e Shtetit, kemi mundur të arrijmë suksese shumë të rëndësishme në forcimin e rendit dhe sigurisë në vend, disa prej tyre të konsideruara të pamundura për vite të tëra.
Falënderoj të gjithë ekipin, kolegët, miqtë e mi dhe veçanërisht familjen time, si dhe të gjithë ata që më vlerësuan, besuan dhe më mbështetën gjatë gjithë kësaj periudhe.
Vlerësim dhe mirënjohje nga zemra për të gjithë ata gra dhe burra në uniformë, për gjithçka bënë gjatë kësaj periudhe në luftë me krimin dhe paligjshmërinë.
Një falënderim i veçantë edhe për partnerët vendas dhe ata të huaj, agjencitë ligj zbatuese vendase e ndërkombëtare, mbështetja e të cilëve ka qenë një inkurajim shumë i rëndësishëm.