Nga Agim Xhafka
Nuk di fare në njihen apo jo dy personat që kam vënë në titull. Di që Armiri është gazetar dhe nga ata me 5 yje dhe zonja Mira, Zv.ministre e Shëndetësisë, e bërë njësh me familjet shqiptare në vitin famëkeq të pandemisë.
Nuk i bëra rastësisht bashkë; nga një lajm i sotëm që sipas një vendimi të qeverisë, zonjës i është akorduar nga taksat e shqiptarëve një shumë e majme, 30 mijë euro për kurimin e saj.
Në fakt më tronditi sa e mësova, se Buxheti i shtetit po bëhet si arka familjare e Ramës, thes për qoka pa fund.
Në rrjetet sociale ka plasur një protestë e arsyeshme. Se Zv/ministrja, ashtu si mijëra e mijëra familje që marrin kredi për mjekim, mund të kishte aplikuar para një banke. Do t’ia miratonin në çast e pa kolateral. Për dinjitet dhe për të ruajtur postin e saj nga përbaltja, asaj rruge t’i drejtohej.
Po ç’hyn Armir Shkurti në këtë ndodhi?!
Hyn, se ai para ca ditësh ka botuar një shkrim për të sëmurët me kancer. Për të sëmurët shqiptarë që kurohen në Tiranë, që paguajnë taksa dhe që nga ato taksa të këtyre me metastaza në trup mori Zv/ministrja e iku me avion të kurohej jashtë. Jashtë, se brenda ne e kemi falas shëndetësinë.
E ky Armir ustai i fjalës së lirë, na e solli si në një film me kamp përqendrimi, trajtimin e të sëmurëve me kancer te Spitali Onkologjik, që rrinin me orë jashtë mes zhegut nga që spitali nuk i qaste as në ndonjë sallë pritje, që prisnin radhë e nuk ndjeheshin fare, që infermieret e rojet e institucionit u bërtisnin sikur ata të qenë armiq, që askush nuk tregonte pikë njerëzillëku me ta.
Nuk mjaftonte kanceri, por duhej dhe trajtimi kanceroz i shtetit mbi ta. Kështu shkruante Armiri dhe kështu ka vite e vite që shkruhet.
Ndërkohë ato para që njerëzit i dorëzojnë për shëndetësinë shqiptare, i merr Rama dhe i ndan ndër miq e shokë si ai i dehuri që qeras me dopio kë i sheh syri në pijetore.
Ka dhjetëra deputetë, ministra, ofiqarë që ia shalojnë avionëve, kurohen jashtë e kthehen faqekuq nga shëndeti i riparuar.
Buxheti ndërkohë bëhet faqe meit, se boshatiset për qoka.
Propaganda e lodhur shqiptare trumbeton “Shëndetësi falas”!!! Ta shpifin mediat lëpirëse. Falas, po p.sh. për Zv.ministren apo kolegët e saj, se populli zë radhë nëpër banka që të marrë kredi qoftë dhe për një apandesit.
Zoti Rama, bëje me lekë shëndetësinë, se kështu falas siç e trumbeton, na griu! Nuk e përballojmë dot, byrazer!
E mos fut duart te Fondi i Sigurimit Shëndetësor! Ai është buxhet nga kontributi i njerëzve të thjeshtë e të varfër, që e duan t’u gjendet për ditë të zeza, t’u gjendet për sëmundje e halle.
Artikulli i Armir Shkurtit
https://www.facebook.com/Armir.Shkurti0/posts/10160254331154724?ref=embed_post
