Deputetja e Partisë Socialiste, Briseida Çakërri, ka adresuar deklarata të forta ndaj ish-koleges së saj, Marjana Koçeku, pas largimit të kësaj të fundit nga grupi parlamentar socialist.

E ftuar në emisionin “Off the Record” nga Andrea Danglli në A2 CNN, Çakërri deklaroi se Koçeku nuk tregoi guximin politik për të dorëzuar mandatin e deputetes që, sipas saj, e ka fituar falë Partisë Socialiste.

“Me kalimin e ditëve u qartësova akoma më shumë se çfarë po ndodhte që nga momenti i parë i daljes nga grupi parlamentar, ku nuk u tregua aq burrneshë sa të jepte dorëheqjen nga mandati i fituar nga PS, i dhuruar nga PS”, u shpreh deputetja socialiste.

Në një deklaratë, Çakërri solli edhe një varg të njohur të Dritëro Agollit për të ilustruar, sipas saj, sjelljen e ish-deputetes.

“Më kujton Dritëro Agollin kur thotë: ‘E mbajta në krah tërë ditën. Edhe zemër i dhashë… Mbahu! Të nesërmen në fshat kur arritëm, u tha të tjerëve: Më rrahu!’ Kjo është shprehja më e saktë”, deklaroi ajo.

Deputetja socialiste sfidoi hapur Koçekun që të testojë mbështetjen e saj elektorale jashtë siglës së PS-së.

“E ftoj të dalë të konkurrojë me kecat se as kecat nuk do ta votojnë. Nuk kam parë asnjë kauzë dhe nuk kam parë asnjë prononcim tjetër”, tha Çakërri në Off The Record me Andrea Dangllin.

Deklaratat vijnë në një moment kur largimi i Neomalësores nga grupi parlamentar i PS-së ka ndezur debatet politike, ndërsa socialistët po përpiqen të minimizojnë peshën politike të këtij akti, duke e cilësuar si një lëvizje individuale pa mbështetje reale elektorale.

Ndërkohë, përplasja mes dy deputeteve pritet të ushqejë më tej debatin publik mbi arsyet dhe pasojat e shkëputjes së Koçekut nga mazhoranca.

Marjana Koçeku, ka publikuar një mesazh të fortë në rrjetet sociale, të cilin e ka adresuar ndaj familjes Bajraj në Shkodër. Në reagimin e saj, Koçeku paralajmëron se do të reagojë ashpër nëse familjes së saj i ndodh diçka

“Ky mesazh i drejtohet Bajrajve të Shkodrës. Nëse familjes teme i preket kjoftë edhe nji qime floku, unë s’kam me lanë pa ju shkatërrue, sa ta kem jetën”, shkruan ajo.

Disa ditë më parë, Marjana Koçeku, ka njoftuar se nuk do jetë deputete e PS-së. E njohur si Neo Malsorja, ajo ka njoftuar nëpërmjet një statusi se do të jetë deputete e pavaruar.

Anëtari i Këshillit Kombëtar të Partisë Demokratike, Ilir Alimehmeti, deklaroi se protesta qytetare para Kryeministrisë po mbështetet nga qytetarë me bindje të ndryshme politike, përfshirë edhe përfaqësues të Partisë Socialiste. Sipas tij, mes protestuesve ka edhe drejtorë të Bashkisë së Tiranës, ndërsa në radhët e socialistëve ka nisur një proces reflektimi.

I ftuar në emisionin “Off the Record” nga Andrea Danglli në A2 CNN, Alimehmeti tha se protesta ka një qëllim të qartë politik, ndërsa theksoi se reflektimi duhet të ndodhë edhe brenda Partisë Demokratike.

 “Janë të pranishme të gjitha shtresat, të gjitha rrymat, qofshin politike, afër politikës, apo jo politike. Ka të Partisë Socialiste, ka drejtorë të Bashkisë Tiranë. Ka nga PD, nga Partia ‘Mundësia’, ‘Shqipëria Bëhet’, ‘Lëvizja Bashkë’, pra ka një larmi. Protesta ka një emërues të përbashkët që është dorëheqja e Edi Ramës. Në 5 kërkesat që janë bërë është dorëheqja e Ramës dhe 4 ligjet. Unë i mbështes dhe jam i pranishëm në protestë. Të kërkosh dorëheqjen e kryeministrit, patjetër që është kërkesë politike. Te PS ka nisur reflektimi në nivel deputetësh, në nivel drejtorësh, mund t’ua them edhe me emra se ata janë publikisht në shesh, s’e kanë problem të fotografohen. Patjetër duhet të ketë reflektim te PD”, shprehet Alimehmeti.

Ai shtoi se, pavarësisht se ka mendimet e tij për protestën, e mbështet atë pasi, sipas tij, kjo është kërkesë e qytetarëve.

“Kam edhe unë mendimet e mia për protestën, por jam në mbështetje. Pse? Sepse ma kërkojnë njerëzit. Në fund të ditës politikanët duhet të bëjnë çfarë kërkojnë njerëzit. Duhet të ketë zgjedhje, mund të mos duan ata të përfaqësohen politikisht, duan të mbështesin kë duan të mbështesin, por s’i jepet e drejta kujt fiton të abuzojë”, vijoi ai.