Po mbahet në këto momente për herë të parë Kuvendi Kombëtar i Protestës dhe nuk kanë munguar tensionet.

Persona të ndryshëm që janë prezentë në sallë kanë dalë kundër mënyrës sesi po organizohet kjo mbledhje dhe personat që janë të pranishëm aty.

“Mosha mesatare këtu është mbi 45 vjeç, këtu nuk shoh asnjë nga marshimi. Nuk jemi lajmëruar”, shprehet një prej protesuesve.

Nga ana tjetër, ka edhe nga ata që kanë kërkuar fjalën, por nuk u është dhënë. “Kemi një rend dite”, u shpreh një nga organizatorët pas këtij incidenti.

“Ky kuvend është i hapur për të gjithë qytetarët, do të kemi takim të hapur”, tha moderatorja e takimit. Ndërkohë, një prej organizatorëve, i cili në një moment po pengohej të fliste, nuk e kurseu përgjigjen e ashpër.

“Nuk ma ka ndier kur kam pasur 300 veta përballë, jo më juve. Prandaj mos na sfidoni, mos na merrni neve sikur jemi të butë”, u shpreh ai, duke shkaktuar më pas një reagim të ashpër në sallë.

“Duhet të shkojmë përtej sheshit. Në shesh e vramë frikën, por çfarë do të bëhet më pas? Nuk duhet të përsërisim rastin e Serbisë, ku protestuan pa fund dhe nuk ndryshuan asgjë”, shprehet një prej organizatorëve.

Megjithëse burimet financiare janë rritur në tërësi për të gjitha bashkitë në vend, struktura e shpenzimeve sipas bashkive ka probleme. Referuar raportit të Financave Vendore për vitin 2025, në shumë bashki të vogla dhe të mesme shpenzimet për paga dhe operative zënë me shumë së 60 % të buxhetit, ndërkohë në bashkitë e mëdha ky raport është më i ulët.

Nëse do ti referohemi të dhënave ku paraqitet struktura e shpenzimeve sipas natyrës për vitin 2015 dhe vitin 2025, konstatohet se aktualisht vetëm 18%-20% e shpenzimeve vendore shkojnë për investime kapitale, pjesa tjetër për paga dhe shpenzimeve operative.

Konkretisht bashkitë kanë shpenzuar në total në vitin 2025, 92.4 miliardë lekë, nga të cilat 29.1 miliardë janë shpenzime operative; 40 miliardë lekë paga dhe sigurime dhe vetëm 23.2 miliardë lekë investime.

Kjo tregon se një pjesë e madhe e rritjes së buxhetit nuk është përdorur në drejtim të zhvillimit ekonomik vendor, kryesisht në bashkitë e vogla.

Nga analiza rezulton se në vitin 2025, rreth 40 % e buxhetit të bashkisë Tiranë është përdorur për investime, ndërkohë në bashkitë e tjera si Durrës, Elbasan etj, rreth 30 % e buxhetit është përdorur për investime. Ky raport i shpenzimeve për investime paraqitet kryesisht në bashkitë e mëdha dhe të mesme.

Investimet nga burimet e veta janë rritur nga 12 miliard lekë në vitin 2015 në rreth 23.2 miliard lekë, në vitin 2025. Investimet kryesisht janë fokusuar në: infrastrukturë rrugore, ujitje-kullim, menaxhim mbetjesh, zhvillim urban.

Përsa i përket shpenzimeve për paga/sigurime dhe operative konstatohet një rritje e konsiderueshme nga viti 2015 në vitin 2025. Kjo rezulton një rritje e cila është vjen paralelisht me rritjen e të ardhurave dhe buxhetit vendor dhe me rritjen e volumit të shërbimeve për komunitetet vendore. Si rezultat i krijimit të njësive të reja vendore, bashkitë e reja administrojnë një territor shumë herë më të madh se para reformës administrativo territoriale, si rrjedhojë kanë rritur edhe nivelin e shërbimeve që ofrojnë.

Gjithashtu, ndikim të drejtpërdrejtë në rritjen e shpenzimeve për paga ka patur edhe transferimi i funksioneve nga ministritë e linjës te bashkitë në vitin 2015, bashkë me stafin përkatës./lapsi.al

Në një proces burokratik në hapjen e tre kapitujve me BE-në, kryeminstri Rama nuk e la momentin t’i ikte për të bërë qoftë edhe një video me Marta Kos, komisioneren për zgjerim të BE-së.

Nuk kishte si të mos trajtonte çështjen që zien më shumë, duke e kthyer një vend të vogël si Shqipëria në agjendën kryesore të mediave botërore, e veçanërisht një zone të harruar si Zvërneci.

“Do të bëjmë një projekt që do të jetë krenari për Shqipërinë dhe Europën. Kjo është ambicia ime”, u shpreh kryeministri.

E thënë hapur si: “ambicia ime”, kryeministri Rama po zhvendos çështjen Zvërneci edhe në Bruksel, imazhi i të cilës për atë pjesë europiane që nuk sheh me syzet e Kos është ai burrë që zvarritej në tokë nga rojet private në sytë e Policisë së Shtetit dhe protesta e qytetarëve shqiptarë që vijon çdo ditë me moton e vetme: “Rama jepe dorëheqjen”

Ndërsa premton se do të vijojë projektin që do bëjë “krenar” edhe europën, kreu i qeverisë u mjaftua me qëndrimet e Kos, që në këto ditë të vështira të kreut të qeverisë sonë nuk ka hezituar që t’i japë edhe një dorë mbështetëse.

Komisionerja për Zgjerimin, Marta Kos, tha se mbrojtja e mjedisit mbetet një nga kapitujt më të rëndësishëm të negociatave me Shqipërinë. Ajo theksoi se Brukseli pret respektimin e plotë të legjislacionit europian. Sipas saj, Komisioni Europian dhe qeveria shqiptare kanë rënë dakord që ligji për Investimet Strategjike të shfuqizohet, ndërsa ligji për Zonat e Mbrojtura të rishikohet dhe të harmonizohet me standardet e BE-së.

Edhe Rama konfirmoi se ligji për Investimet Strategjike do të zëvendësohet me një ligj të ri, pasi, sipas tij, e ka përmbushur misionin e vet. Ndërsa për ligjin e Zonave të Mbrojtura, ai sqaroi se nuk do të shfuqizohet, por do të pësojë ndryshime për t’u përafruar plotësisht me kërkesat europiane.

Me parimin që të hajë nga të dyja anët, kryeministri tentoi edhe një herë që të shpërdajë hi poropagandistik në Bruksel, por deri më tani ka zënë vetëm sytë e Martës, e cila tetoi të tundej edhe një herë para një kryetari qeverie që qyteratë e tij i tërheq zvarrë në emër të zhvillimit dhe abicies personale sikurse e cilësoi projektin për Zvërnecin./boldnews.al

Nga BIRN

Në raportin vjetor për Sundimin e Ligjit të publikuar të premten, Komisioni Europian theksoi se reagimet e ekzekutivit dhe shumicës parlamentare ndaj hetimeve të SPAK-ut ndaj zyrtarëve të lartë përbëjnë përpjekje për ndikim të papërshtatshëm mbi drejtësinë dhe dëmtojnë besimin publik te institucionet.

Komisioni ka vlerësuar progresin e Shqipërisë në reformën në drejtësi, por paralelisht ka kritikuar ashpër sulmet politike ndaj Prokurorisë së Posaçme dhe institucioneve të tjera të drejtësisë, duke i cilësuar ato si përpjekje për ndikim të papërshtatshëm mbi sistemin gjyqësor.

“Pezullimi nga detyra i një zyrtari të nivelit të lartë, i urdhëruar nga Gjykata e Posaçme me kërkesë të SPAK-ut, si edhe kërkesa e SPAK-ut drejtuar Kuvendit për heqjen e imunitetit parlamentar të këtij zyrtari, shkaktuan reagime të forta negative nga pushteti ekzekutiv dhe ai legjislativ, përfshirë sulme të drejtpërdrejta ndaj SPAK-ut dhe institucioneve gjyqësore”, thuhet në raport.

Komisioni shton se institucionet drejtuese të sistemit gjyqësor reaguan publikisht duke dënuar presionin politik mbi drejtësinë, ndërsa kujton standardet europiane sipas të cilave “të gjitha pushtetet e shtetit duhet të nxisin dhe mbrojnë besimin e publikut te institucionet kushtetuese, përfshirë gjyqësorin”.

Qëndrimi vjen në një kohë kur marrëdhëniet mes qeverisë dhe SPAK-ut u tensionuan ndjeshëm pas hetimeve që prekën zyrtarë të lartë të mazhorancës, përfshi ish-zëvendëskryeministren Belinda Balluku.

Gjatë muajve të fundit, kryeministri Edi Rama dhe përfaqësues të Partisë Socialiste kanë akuzuar publikisht SPAK-un për tejkalim kompetencash dhe kanë paralajmëruar ndryshime në legjislacionin procedural. Paralelisht, deputetë të shumicës propozuan amendamente në Kodin e Procedurës Penale që do të zgjeronin kategorinë e zyrtarëve që nuk mund të pezullohen nga detyra gjatë hetimeve. Edhe për këto zhvillime Komisioni shpreh shqetësim në kapitullin mbi balancën e pushteteve.

Raporti kujton se Kuvendi refuzoi të heqë imunitetin e Ballukut të kërkuar nga SPAK për akuzën e shkeljes së barazisë në tendera, duke theksuar se ky vendim “ngriti shqetësime lidhur me parimet e kontrollit dhe balancës së pushteteve dhe barazisë përpara ligjit”. Po ashtu, Brukseli vëren se propozimet për të kufizuar pezullimin nga detyra të zyrtarëve gjatë proceseve penale “mund të dëmtojnë efektivitetin e hetimeve penale, përfshirë hetimet për korrupsion në nivele të larta, dhe koha e paraqitjes së tyre mund të kontribuojë në perceptimin e pandëshkueshmërisë”.

Megjithatë, vlerësimi për punën e SPAK-ut mbetet pozitiv. Komisioni thekson se struktura e posaçme “vazhdoi të demonstrojë pavarësi dhe kapacitete të forta për të dhënë rezultate pozitive në luftën kundër korrupsionit të nivelit të lartë, pavarësisht përpjekjeve të raportuara nga media dhe politika për ta diskredituar, ushtruar presion dhe ndikim të papërshtatshëm”.

Në një tjetër pjesë të raportit, Komisioni evidenton se gjatë periudhës së monitoruar pati edhe kërcënime fizike ndaj prokurorëve dhe gjyqtarëve, duke bërë që tetë magjistratë të vendoseshin nën mbrojtje. Raporti po ashtu përmend ngarkesën në sistem sidomos në gjykatën e Apelit dhe problemet e tjera përfshi mungesën e resurseve njerëzore.

Ndryshe nga theksi i vendosur nga raporti mbi presionin ndaj drejtësisë, Ministria e Drejtësisë, në reagimin e saj pas publikimit të dokumentit, u përqendrua kryesisht te vlerësimet pozitive.

“Raporti i këtij viti konfirmon se progresi i arritur në reformën në drejtësi po konsolidohet dhe se Shqipëria vijon të ecë përpara në përmbushjen e standardeve evropiane, në rrugën drejt anëtarësimit në Bashkimin Evropian,” thuhet në njoftimin e ministrisë.

Ministria vuri në dukje gjithashtu se raporti vlerëson përfundimin e procesit të rivlerësimit kalimtar, rezultatet në luftën kundër korrupsionit të nivelit të lartë dhe përmirësimet në efikasitetin e sistemit gjyqësor, ndërsa pranoi se Komisioni identifikon edhe fusha ku nevojiten përpjekje të mëtejshme për forcimin e sundimit të ligjit.