Shqipëria shënon një tjetër hap të rëndësishëm në rrugën drejt Bashkimit Europian. Më 26 maj në Bruksel, Konferenca Ndërqeveritare Shqipëri-BE pritet të vulosë mbylljen me sukses të fazës hyrëse dhe hapjen e fazës përmbyllëse të negociatave të anëtarësimit.

Kryeministri Edi Rama e cilësoi këtë zhvillim si një fitore për Shqipërinë Europiane, ndërsa hodhi akuza ndaj kundërshtarëve politikë që sipas tij përhapën lajme negative për vendin në arenën ndërkombëtare.

Rama e cilësoi 26 majin si “një ditë krenarie për Shqipërinë”, duke theksuar se procesi i integrimit po hyn në një etapë vendimtare për të ardhmen europiane të vendit.

Reagimi i plotë i Kryeministrit Rama

Thanë negociatat u bllokuan.
Thanë Shqipëria u ndëshkua.
Thanë Europa u zgjua dhe narkoregjimi u zbulua.

U lëshuan rrugëve me molotovë, për ta djegur Shqipërinë në sytë e të huajve. U lëshuan nëpër Europë me thasë balte e llumi, për ta zhgarravitur Shqipërinë në sytë e të huajve. U gënjyen si gjithnjë nga mendja e tyre dhe gënjyen edhe ata gjithnjë e më të paktë, që shkojnë me atë mendje.

Humbën përsëri. Dhe Shqipëria përsëri fitoi.

Më 26 maj në Bruksel, Konferenca Ndërqeveritare Shqipëri – BE vulos me sukses fazën hyrëse dhe çel fazën përmbyllëse të negociatave të anëtarësimit. Sepse ndryshe nga si e përflasin ditë e natë ata që gjithnjë humbasin në fund, Shqipëria Europiane që po ndërtojmë është një histori suksesi, e cila shkruhet me vizion, punë e përkushtim, hap pas hapi, e në fund gjithnjë fiton.

Kjo është një tjetër ditë krenarie për Shqipërinë, për skuadrën tonë të madhe, për të gjitha repartet e saj në çdo pjesë të fushës së përgjegjësive publike, për shumicën parlamentare, për qeverinë, për institucionet e pavarura, e sigurisht për ata që i përfaqësojnë ato në tryezën e negociatave për Shqipërinë 2030 në BE.

Urime të gjithëve e mbi të gjitha faleminderit çdo shqiptari e shqiptareje, që na beson e na mbështet në rrugën e këtij misioni historik.

Forca Shqipëria!

Mereme Sela, e cila aspiroi të ishte kandidate për kryetare të Partisë Demokratike, por nuk u lejua nga lidershipi i partisë, ka qenë e ftuar në emisionin “Të Paekspozuarit” në MCN TV, ku ka deklaruar se do ta shkatërronte Sali Berishën në garë, por frika prej saj, bëri që ta skualifikojnë. 

Sela tha se koha e të vjetërve ka mbaruar dhe se ajo ka ide të reja. 

Pjesë nga biseda:

Ylli Rakipi: E keni dashur doktorin si figurë? Ma thuaj ndershmërisht. Ai do të rizgjidhet dhe do të jetë edhe pas vdekjes.

Mereme Sela: Ishalla e ka jetën e gjatë.

Ylli Rakipi: Edhe kur të shkojmë në jetën tjetër, ai do na dalë dhe në këtë parti do të na gjejë. Ti mund t’ja marrësh atje. Se në këtë botë harroje… Vështirë shumë. Se po i more PD-në i merr ditët që i kanë mbetur.

Mereme Sela: Unë po luftoj për ta marrë këtu.

Ylli Rakipi: Ti dukesh grua zonjë, e mençur në profesionin që ke. Gjithë këta doktorë të pasur që ka PD, me vila, me makina të shtrenjta, ju banoni në Fushë Kruje dhe bëni rrugën çdo ditë për Tiranë. Jeni më e varfra nga këta. Si ta marrësh ti tani partinë, në gjithë këta doktorë të pasur?

Mereme Sela: Po garantoj një gjë për opinionin publik, kolegët në QSUT, nëse do të ishte garë e ndershme dhe nëse do të isha unë dhe zoti Berisha, jam e sigurtë që do të fitoja numrin më të madh të votave dhe Berisha do të dilte me humbje katasrofike ndaj meje.

Ylli Rakipi: Pse e mund doktorin ti? Ç’ka ndodhur me gjithë këtë doktor?

Mereme Sela: Mendoj se e kam shprehur edhe nga selia, kam respekt për të si koleg dhe aty mbyllet çdo gjë. E ka mbyllur ciklin e karrierës, historisë, kisha menduar se do të isha kandidatja më potenciale aty, pa asnjë impakt negativ. Unë do ta kisha lënë si lider historik. Unë hyra për të kandiduar dhe për ta drejtuar unë PD-në.

Ylli Rakipi: Ju mendoni se doktori i ka humbur votat?

Mereme Sela: Do ta shohim, sepse pretendojnë se po bëjnë referendum. Por është i paligjshëm. Gjykata do të vendosë sipas standarteve. Njerëzve u ka shkuar aty ku nuk mban. Duke ndejt Berisha me atë opozitë… Problematika ka edhe Amerika, edhe bota Europiane, por problematikat janë për shkak të opozitës.

Ylli Rakipi: Pra një guxim shumë i madh. Tani po shpjegoni dhe jam i bindur se ju e njihni PD-në. Pse e shtrëngon kaq fortë doktori PD-në? Se ti thua humb, po kështu thotë edhe Salianji. Pse i duhet këtij njeriu partia?

Mereme Sela: Mendoj se ka hallet e veta. Kisha një thirrje për Parlamentin, të miratojë një ligj, është e ulët që dëgjojmë, merren me familjarët, motrat, fëmijët, ata të flasin vetëm për deputetët aty. Ata hapin libra, krijojnë impakt, ndikojnë në gjendjen shëndetësore të fëmijëve, grave, burrave. Është e shëmtuar.

Ylli Rakipi: Po dokumentat ku i dorëzuat?

Mereme Sela: Në recepsion, aty gjeta edhe gazetarët. Pyeta për anëtarët e KKO. Nuk janë më thanë. I thashë kam ardhur të dorëzoj dosjen, por thanë hajde nesër. Lashë dosjen, u bëra edhe foto, u mora emrat se thashë kushedi…

Ylli Rakipi: Me Flamurin nuk kontaktuat?

Mereme Sela: Jo fare, e njoh, një mirëmëngjes, mirëmbrëma. 24 orë isha ok, pastaj… Mendoj se skualifikimi ishte arbitrar.

Ylli Rakipi: Flamuri tha, perveç zonjës Sela nuk pranohet njeri tjetër. A je këtu në foto me Flamurin?

Mereme Sela: Jo jo është montim.

Ylli Rakipi: Aaaaa është më inteligjencë artificiale.

Mereme Sela: Mendoj se frika ime i ka trembur dhe më kanë skualifikuar. Unë kam ide të reja, të vjetërit kanë mbaruar punë. 

Për këdo që nuk ishte bindur se qasja amerikane kundrejt Shqipërisë ka ndryshuar dhe se ajo është tani më praktike se formale, fjala hapëse e të nominuarit për ambasador amerikan në Shqipëri, Eric Uendt, shuan çdo dyshim.

Kandidati i Presidentit Donald Trump për postin e ambasadorit në Tiranë dha që në fjalën e parë para Senatit Amerikan një mesazh të drejtpërdrejtë për atë që Uashingtoni e sheh si përparësi në Shqipëri: luftën kundër korrupsionit, krimit të organizuar dhe trafikut të drogës. 

“Do të eksplorojmë mënyra për të mbështetur Shqipërinë në luftën kundër korrupsionit, krimit të organizuar dhe trafikimit të drogës që lidhet me kartelet latine, për të ndihmuar që Shqipëria dhe SHBA të jenë më të sigurta”, deklaroi ai.

Kandidati për ambasador u ndal veçanërisht te bashkëpunimi me ushtrinë shqiptare gjatë misioneve të NATO-s dhe në Afganistan, duke vlerësuar trupat shqiptare dhe duke treguar se njeh, të paktën, heroin tonë kombëtar.

“Gjatë drejtimit të forcave të NATO-s, trupat shqiptare ishin pjesë e komandës sime dhe kam punuar me ta në terren. Në Afganistan kam shërbyer me trupa shqiptarë. Trupat shqiptare kanë shpirtin luftarak të heroit shqiptar Skënderbeut dhe njerëzit shqiptarë janë mikpritës dhe punëtorë”, u shpreh Uendt.

Ish-ushtaraku shprehu falenderime për nominimin nga Presidenti Trump për këtë pozicion, teksa kujtoi se ka shërbyer edhe në njësinë legjendare elitare të forcave speciale amerikane, Green Beret. 

“Jam i nderuar nga besimi i Presidentit Trump për këtë pozicion. Për më shumë se 34 vite kam shërbyer SHBA-ve si ushtar. Kam kaluar vite në këmbësori dhe si ‘Beretë e Gjelbër’”, deklaroi ai.

Uendt bëri me dije se ka shërbyer edhe si pjesë e ambasadës amerikane në Jerusalem, duke raportuar pranë Departamentit Amerikan të Shtetit.

Një mesazh që po përsëritet nga Uashingtoni 

Mesazhi i Eric Uendt nuk vjen nga hiçi. Ai futet në të njëjtën vijë paralajmërimesh që administrata Trump ka ndërtuar prej muajsh ndaj Shqipërisë dhe i ka sinjalizuar ato haptazi.

Edhe në urimin e Presidentit Donald Trump për 28 Nëntorin, në vend të formulave të zakonshme ceremoniale, u theksua si prioritet “përballja me organizatat kriminale ndërkombëtare”, krahas stabilitetit rajonal dhe bashkëpunimit ekonomik.

Urimi i Trump për Festën e Flamurit: 

“Në emër të popullit të Shteteve të Bashkuara, ju dërgoj urimet tona më të mira juve dhe popullit të Shqipërisë ndërsa festoni pavarësinë tuaj.

Shtetet e Bashkuara dhe Shqipëria gëzojnë një partneritet të fortë të krijuar nga lidhje të ngushta sigurie, ekonomike dhe njerëzore. Pres me padurim forcimin e bashkëpunimit tonë mbi prioritetet e përbashkëta, duke përfshirë stabilitetin rajonal, përballjen me organizatat kriminale ndërkombëtare dhe zgjerimin e mundësive dypalëshe të biznesit dhe tregtisë. Ju uroj juve dhe popullit të Shqipërisë një Ditë të gëzuar Pavarësie”, shkroi Presidenti Donald J. Trump në telegramin e tij dërguar Presidentit Begaj më 28 nëntor.

Në të njëjtën ditë, edhe Sekretari i Shtetit Marco Rubio dha një mesazh edhe më të drejtpërdrejtë, kur foli për partneritetin me forcat ligjzbatuese shqiptare përballë “grupeve kriminale ndërkombëtare, karteleve të trafikut të drogës dhe atyre që bashkëpunojnë me to”. Ishte një gjuhë e pazakontë për një urim feste kombëtare dhe një sinjal i qartë se Uashingtoni po e sheh Shqipërinë gjithnjë e më shumë përmes prizmit të sigurisë.

Në të njëjtën frymë kanë qenë edhe mesazhet e të ngarkuarës me punë të SHBA-së në Tiranë, Nancy VanHorn, e cila ka përsëritur vazhdimisht se lufta kundër korrupsionit, krimit të organizuar dhe trafikut të drogës mbetet një prioritet kyç i marrëdhënies mes dy vendeve.

Prandaj në këtë kontekst të ri, fjala e parë e Eric Uendt sot në Senatin Amerikan nuk bën gjë tjetër veçse konfirmon se linja amerikane ndaj Shqipërisë është tashmë ndryshe. Nëse më parë nga ambasada në Tiranë apo nga përtej oqeanit vinin komente për lloj-lloj aktualiteti politik në Shqipëri, tani sinjali që vjen nga Uashingtoni është më i prerë. Partneriteti me Shqipërinë do të matet gjithnjë e më shumë me rezultatet konkrete në luftën kundër korrupsionit, trafikut të drogës dhe krimit të organizuar. ©LAPSI.AL 

Ish-presidenti Ilir Meta ka dhënë një intervistë nga qelia e paraburgimit për emisionin “Off the Record” në A2 CNN, ku ka folur për raportin me kryeministrin Edi Rama dhe për situatën politike në vend.

I pyetur se çfarë do t’i thoshte Ramës nëse do ta takonte përballë, Meta u shpreh se nuk shmanget nga askush dhe se ndihet “ballëhapur” përpara qytetarëve.

“Unë dal përballë cilitdo dhe as nuk e ndërroj rrugën, as nuk i ul sytë. Përpara shqiptarëve do të jem gjithmonë ballëhapur sepse kam mbrojtur interesin kombëtar dhe demokracia për mua është interes kombëtar. Koha do tregojë se kush ka llogari për të larë me këtë popull”, tha Meta.

Ai komentoi edhe marrëdhënien e tij me Ramën ndër vite, duke thënë se e ka njohur atë që kur ishte ministër dhe më pas kryeministër në koalicion.

“Unë e njoh z. Rama. Rama ka qenë shumë i urtë kur ka qenë ministër, kur ka qenë vartës, madje edhe kur ka qenë kryeministër në koalicion. Ai vinte çdo ditë në orën 10:00 te Parlamenti. Derisa korruptoi Lulin dhe i mori të gjitha pushtetet, duke nxjerrë fytyrën e vërtetë”, deklaroi Meta.