Ish‑deputeti socialist Jurgis Çyrbja është liruar nga burgu, pasi ka përfunduar vuajtjen e dënimit pas vendimit të Gjykatës së Posaçme. Çyrbja u deklarua fajtor dhe dënua me 3 vite burgim për korrupsion në zgjedhje, përkrahje të autorit të krimit dhe nxjerrjes së sekretit shtetëror. Në aplikim të gjykimit të shkurtuar ai duhet të vuante 2 vjet burg.

Megjithëse kërkesa e ish‑deputetit për lirimin e menjëhershëm ishte rrëzuar nga Apeli i Gjykatës së Posaçme ditën e premte, gjykata konstatoi se shumica e dënimit ishte shlyer gjatë kohës së qëndrimit në paraburgim, duke i mundësuar Çyrbjas daljen nga burgu këtë të shtunë. Gjithashtu pjesën më të madhe të kohës ish-deputeti e kaloi në paraburgim.

Për çfarë u arrestua Çyrbja?

Ish-deputetit socialist Jurgis Çyrbja është arrestuar më datë 28 tetor të vitit të kaluar. Ndaj ish-deputetit janë 3 akuza, konkretisht: “Tregimi i sekretit shtetëror nga shtetasit”, kryer më tepër se një herë, “Përkrahja e autorit të krimit”, kryer më tepër se një herë si dhe për korrupsion aktiv në zgjedhje. 

Çyrbja akuzohet se informonte Altin Hajrin dhe persona të tjerë që kërkohen nga autoritetet shqiptare, në rast se do kishte operacione policore për kapjen e tyre në qytetin e Durrësit. Në kompensim të ketij favori, Çybrja kërkonte vota për kandidimin e tij në qarkun e Durrësit në zgjedhjet parlamentare të vitit 2021. Për të njejtën çështje, me urdhër të SPAK u arrestua edhe Ahmet Masha, ndërsa është shpallur në kërkim Altin Hajri, i cili po gjykohet në GJKKO për rrëmbimin dhe zhdukjen e Jan Prengës.

Policia i është kundërpërgjigjur me një agresivitet të shtuar protestuesve që Partia Demokratike thirri këtë 20 shkurt në bulevard, në një datë që përkon me rënien e bustit të diktatorit Enver Hoxha 25 vite më parë. Mesazhet për protestuesit u mbyllën shpejt dhe kishin në qendër akuzat për korrupsion, skandalet që kanë përfshirë qeverinë me kryefjalë dyshen Rama-Balluku. I fundit, si zakonisht ishte fjalimi i kreut të PD-se Sali Berishës, që e quajti Ramën pjesë të bandave kriminale duke paralajmëruar ndëshkimin e tij.

“Aldo Baret sot janë Edi Rama, Lubi Balluku, ministrat e tij, kurse kartelet e drogës, Elvis Doçi, Suel Çela janë thjesht ushtarët e tyre. Ta dinë mirë se edhe prapa diellit po të shkojnë, ne do t’i gjejmë ata, ne do t’i ndëshkojmë ata me forcën e ligjit” u shpreh Berisha.

Menjëherë pas fjalimit të Berishës, protestuesit kanë nisur të hedhin breshëri fishekzjarresh dhe molotovë që ndezën në flakë shkallët e kryeministrisë. Ky moment është tashmë një “deja vu” nga protestat e shkuara dhe në disa raste ia ka dalë të krijojë një skenografi që tërheq vëmëndjen e mediave ndërkombëtare.

Vetëm se para se organizatorët e protestës të rikrijonin këtë moment panoramik, policia ndërhyr me shpejtësi. U duk sikur Berisha nuk e kishte mbaruar fjalën, kur nga ana e kryeministrisë ka shpërthyer uji me presion që  fiku me shpejtësi flakët e molotovëve. Brenda pak sekondash sapo kishin nisur shpërthimet e para të fishekzjarrëve, protestuesit u shpërndanë me ujë me presion.

U duk se policia kishte marrë urdhër që kësaj here t’i përgjigjej protestuesve dhëmb për dhëmb.

Sapo ujëhedhëset nisën të lëvizin përballë kryeministrisë, siç ka ndodhur në tubimet e tjera kombëtare, mbështetësit e opozitës u drejtuan për tek godina e parlamentit. Veçse aty i priste një grup tjetër i forcave të rendit, të armatosur me bombula me gaz.

Sapo një pjesë e protestuesve hodhën flakadanët e parë në drejtim të forcave të policisë përgjigjia ka qenë e shpejtë. Rruga përballë parlamentit është mbushur me një re tymi të dendur dhe shpërthime të vogla të bombolave me gaz shoqëruar me ujë me presion për të shpërndarë turmën.

Brenda pak minutave, zona përballë parlamentit u mbulua nga tymi, ndërsa protestuesit u shpërndanë në disa drejtime. Sjellja e policisë këtu u bë akoma më agresive.

Sasi të mëdha gazi lotsjellës u hodhën jo vetëm në anën ku ishin protestuesit, por edhe në oborrin e xhamisë ku ishin duke falur namazin një numër i konsiderueshëm besimtarësh myslimanë.

Paralelisht, ndërsa opozitarët po qëndronin në rrugë, ndërsa disa prej tyre po tërhiqeshin drejt selisë së PD, dhjetëra vetë u gjendën nën sulmin e grupeve të policëve civilë dhe u shoqëruan në komisariate për verifikim. Grupet e personave civilë që lëviznin në rrugicat përreth protestës ishin po aq të shumtë, me qëllim kapjen e çdo personi të dyshuar si protestues.

Filmimi më poshtë është publikuar nga numri dy i PD, Flamur Noka dhe tregon civilë të maskuar, me veshje sportive që marrin protestues dhe i shoqërojnë dhunshëm për në makinat e policisë. “Ninxhat si puna e këtij dhe civilët që i dërgon krimi i organizuar për të ndaluar qytetarët të protestojnë, duke i zvarritur drejt komisariateve të policisë”, shkruan Noka në rrjetet sociale.

Ndryshe nga herët e tjera, forcat e rendit përndoqën deri në selinë e Partisë Demokratike protestuesit edhe pse këto ishin duke u larguar për shkak të gazit lotsjellës.

Në videon më poshtë duket një prej protestuesve që është qëlluar në kokë me bombulën e gazit, ndërsa po qëndronte në rrugën përballë selisë blu.

Tensionet u shtuan akoma më shumë pas vendosjes së një grupi policësh përballë selisë së Partisë Demokratike. Ndërkohë që protesta kishte mbaruar, këto shoqëronin çdokënd që dilte në rrugë. U desh ndërhyrja e deputetëve të Partisë Demokratike për të larguar forcat e rendit, që duket se kishin rrethuar selinë e partisë më të madhe në opozitë.

Në orët e vona të mbrëmjes u raportua për disa dhjetëra persona të shoqëruar me forcë në komisariate, ndërkohë që deputetët e PD ishin shpërndarë në komisariate.

Më shumë se për mesazhet politike, kjo protestë e datës 20 shkurt do të mbahet mend për mënyrën se si shteti zgjodhi të përgjigjej me sasi të mëdha gazi lotsjellës, me ujëhedhëse që u aktivizuan brenda sekondash dhe me shoqërime masive nga policë të veshur civilë dhe të maskuar. Perceptimi është ai i një reagimi më shumë represiv se herët e tjera, që pati qëllim jo thjesht ndëshkimin, por imponimin e frikës tek ata që do të tentojnë të protestojnë sërish kundër qeverisë./Lapsi.al

Kryeministri i Shqipërisë, Edi Rama, di si të tërheqë vëmendjen ndaj vendit të tij. Ish-basketbollisti i kombëtares (1.98 m i gjatë) prezantoi në shtator të vitit të kaluar Diellën, një ministre virtuale përgjegjëse për prokurimet publike.

Kreu i Partisë Socialiste, në pushtet prej më shumë se 12 vitesh dhe tashmë në mandatin e katërt, fitoi zgjedhjet e vitit 2025 duke premtuar anëtarësimin e plotë të Shqipërisë në BE deri në vitin 2030. Për të arritur këtë objektiv, lufta kundër korrupsionit mbetet thelbësore, një nga kërkesat kryesore të Brukselit ndaj vendit me 2.3 milionë banorë, i cili nisi zyrtarisht negociatat e anëtarësimit katër vite më parë.

Duke prezantuar nismën, Rama sqaroi: “Nuk po i delegojmë [Diellës] përgjegjësinë për të qeverisur apo për të marrë vendime përfundimtare. Po i japim përgjegjësinë të bëjë atë që bën më mirë: të përpunojë të dhëna me shpejtësi dhe të na japë përgjigje shumë të shpejta […] Tenderët publikë do të jenë 100% pa korrupsion.”

Opozita reagoi duke pyetur: “Kë do të arrestojë policia nëse kjo ministre gabon apo lehtëson një mashtrim? Programuesin?” Diella, emri i së cilës do të thotë “Diell” në shqip, iu përgjigj kritikave përmes ekranit në parlament: “Ndryshe nga njerëzit, unë nuk kam të afërm për të favorizuar, as miq për t’u dhënë kontrata, dhe as emocione që të më turbullojnë gjykimin mbi të dhënat publike. Besnikëria ime është matematikore.”

Rama, 61 vjeç, argumentoi: “Teknologjia nuk ka miq, nuk pranon kafe dhe nuk ka frikë nga hakmarrja.” Ai mbrojti idenë se algoritmi do të kapërcejë “nepotizmin strukturor” të vendit. “Ne jemi një vend kushërinjsh — nuk është e lehtë të kesh ndërveprime plotësisht të drejta dhe transparente në një vend kushërinjsh,” deklaroi ai në një intervistë për The New York Times në janar.

Emërimi i Diellës u pasqyrua gjerësisht nga mediat ndërkombëtare. Megjithatë, shumë shqiptarë shprehën mosbesim. Mes tyre ishte Jorida Tabaku, deputete e Partisë Demokratike dhe kryetare e Komisionit për Çështjet Europiane. “Nëse sistemi që përdor këto mjete nuk ka integritet, inteligjenca artificiale rrezikon të kthehet në një ‘kuti të zezë’ që përqendron pushtetin në vend që të zbulojë abuzimet,” deklaroi ajo.

Vetëm dy muaj pas emërimit të Diellës, Prokuroria e Posaçme kundër Korrupsionit dhe Krimit të Organizuar (SPAK) kërkoi pezullimin e zëvendëskryeministres Belinda Balluku, duke e akuzuar për “shkelje të barazisë në tenderë publikë”. Çështja përfundoi në Gjykatën Kushtetuese, e cila më 6 shkurt e shkarkoi nga detyra. Rama kritikoi vendimin dhe refuzoi t’i hapë rrugë heqjes së imunitetit parlamentar të saj.

Skepticizmi ndaj inteligjencës artificiale u thellua kur SPAK vendosi në arrest shtëpie drejtuesit e Agjencisë Kombëtare të Shoqërisë së Informacionit (AKSHI), përfshirë drejtoreshën Mirlinda Karçanaj dhe zëvendësen e saj Hava Delibashi, si dhe akuzoi disa persona të tjerë për korrupsion. Akuzat përfshijnë manipulim tenderësh dhe ushtrim presioni ndaj një sipërmarrësi të teknologjisë për t’u tërhequr nga një garë publike.

Më 24 janar, disa parti opozitare thirrën protesta, ku pati edhe incidente përpara zyrës së kryeministrit. Demonstratat vijuan më 10 dhe 11 shkurt me kërkesa për dorëheqjen e Ramës. Ndërkohë, aktorja Anila Bisha, mbi imazhin dhe zërin e së cilës u ndërtua avatar-i Diella, paditi qeverinë për përdorim të paautorizuar të figurës së saj.

Gazment Bardhi, kreu i grupit parlamentar të Partisë Demokratike, e quajti ministren virtuale “propagandë të pastër”, duke theksuar se personat që e krijuan janë nën hetim për korrupsion. “Në një qeveri të korruptuar, asnjë algoritëm nuk e zgjidh problemin,” deklaroi ai.

Ekspertë të pavarur theksojnë se ndikimi i inteligjencës artificiale në luftën kundër korrupsionit mbetet i paqartë. Andi Hoxhaj, profesor i së drejtës në King’s College London, vëren se është ende herët për të vlerësuar efektivitetin e Diellës. Ndërsa Rovena Sulstarova nga Instituti për Demokraci dhe Ndërmjetësim shprehet se IA mund të rrisë transparencën, por nuk përbën zgjidhje më vete.

Shkrimtari dhe intelektuali Fatos Lubonja, i cili kaloi 17 vite burg gjatë diktaturës komuniste, shpreh skepticizëm të thellë ndaj qeverisë. Ai argumenton se pushteti i Ramës mbështetet në katër shtylla: oligarkët, mediat e lidhura me ta, krimin e organizuar dhe mbështetjen ndërkombëtare. Sipas tij, marrëdhënia e Shqipërisë me qendrat e fuqisë ndërkombëtare ka funksionuar historikisht mbi bazën e legjitimitetit të jashtëm dhe tolerimit të problemeve të brendshme.

“Njëra janë oligarkët, të gjithë njerëzit e pasur që e rrethojnë. Njëra është media që ata zotërojnë ose financojnë. E treta është krimi i organizuar. Dhe e katërta është mbështetja ndërkombëtare, veçanërisht nga Evropa Perëndimore dhe SHBA-ja”, shprehet ai.

Në fund të fundit, pastrimi i niveleve të larta do të varet nga vullneti njerëzor. Lubonja përfundon: “Nuk besoj se SPAK-u i vetëm mund ta ndryshojë vendin. Nuk mund ta reformosh vetëm sistemin e drejtësisë kur politika, ekonomia dhe krimi i organizuar po lëvizin të gjitha në drejtim të kundërt. Dhe Rama nuk po vepron me mirëbesim.

Marrë nga: El Pais

Ambasada Amerikane në Tiranë ka shpërndarë në rrjetet sociale një mesazh të Sekretarit të Shtetit Marc Rubio.

Kryediplomati amerikan thotë se SHBA-të do t’i heqë vizën çdo vizitori që përbën kërcënim për sigurinë kombëtare të SHBA-ve, apo politikën e jashtme.

“Sekretari Rubio: Nëse unë identifikoj një vizitor në vendin tonë, prania e të cilit përbën kërcënim për politikën tonë të jashtme dhe sigurinë kombëtare, ne do t’ia heqim vizën”, thuhet në mesazhin e Rubios. 

Gjykata e Posaçme e Apelit për Korrupsionin dhe Krimin e Organizuar këtë të premte ka rrëzuar kërkesën e ish-deputetit socialist, Jurgis Çyrbja për të dalë nga burgu pasi ka përfunduar dënimin. Sipas togave të zeza ai ka edhe disa orë për të shlyer në burg deri rreth mesnatës. Ai pritet të lirohet në ditët në vijim.

“Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Daniela Shirka (kryesuese), Florjan Kalaja (anëtar) dhe Tereza Merkaj (anëtare), sot më datë 20.02.2026, disponoi për çështjen penale nr. 73 akti, datë 18.02.2026 regjistrimi, mbi kërkesën e të pandehurit J.Ç, me objekt:

“Shuarjen e masës së sigurimit “Arrest në burg”, caktuar me vendimin nr. 126, datë 20.10.2024 të Gjykatës së Posaçme të Shkallës së Parë për Korrupsionin dhe Krimin e Organizuar, verifikuar me vendimin nr. 129, datë 22.10.2024 të kësaj gjykate, për shkak të përfundimit të dënimit të dhënë me vendimin nr. 68, datë 03.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar”, si vijon:

– Rrëzimin e kërkesës së kërkuesit J.Ç. U shpall në Tiranë, sot më datë 20.02.2026”, thuhet në njoftim.

Ish-deputetit socialist, Jurgis Çyrbja u arrestua më datë 28 tetor të vitit 2024. Çyrbja u shpall fajtor nga Gjykata e Posaçme dhe u dënua me 3 vjet burg. Dënimi i tij zbriti në 2 vite për shkak të gjykimit të shkurtuar.

Ai akuzohet për veprat penale “Tregimi i sekretit shtetëror nga shtetasit”, kryer më tepër se një herë, “Përkrahja e autorit të krimit”, kryer më tepër se një herë si dhe për korrupsion aktiv në zgjedhje. 

Çyrbja sipas akuzave informonte Altin Hajrin dhe persona të tjerë që kërkoheshin nga autoritetet shqiptare, në rast se do kishte operacione policore për kapjen e tyre në Durrës.

Në këmbim, Çybrja kërkonte vota për kandidimin e tij në qarkun e Durrësit në zgjedhjet parlamentare të vitit 2021. Lidhur me këtë çështje, u arrestua edhe Ahmet Masha.