Në një intervistë për Corriere dello Sport, argjentinasja që bën rolin e manaxheres së kapitenit të Interit, Mauro Icardi ka sjellë sërish në vëmendje se sulmuesin e kanë kërkuar disa nga klubet më të fuqishme të Evropës, por pa bërë të ditur emrat. Ky sinjal nga Wanda vjen në momentin kur Inter ka shprehur interes për të zgjatur kontratën me sulmuesin argjentinas. Në tetor të 2016 Icardi firmosi për 5 vjet të tjera me një përfitim prej 5.5 milionë eurosh në vit, ndërsa vendosën edhe klauzolën prej 110 milionë eurosh në rast të prishjes së kontratës. “Nuk jam takuar me Ausilion – tha Wanda – por dëgjohemi në telefon dhe unë e di mirë pozicionin e tij dhe të shoqërisë. Në këtë periudhë të fundit janë afruar disa skuadra të mëdha që kanë shprehur interes për Mauron. Dhe unë si përfaqësuese e tij kam detyrë ti dëgjoj, vlerësoj dhe të marr në konsideratë çdo situatë. Ka patur edhe në të shkuarën interes, por Mauro ka zgjedhur gjithnjë Interin. Ai është kapiteni i Interit që në moshën 22 vjeç dhe ka një raport shumë të mirë me shokët, pavarësisht çfarë thuhet. Por unë, dhe vetëm unë merrem me të ardhmen e tij, kështu që më duhet të vlerësoj të gjitha kërkesat që vijnë: gjithçka kalon nga unë, kush kërkon Icardin duhet të trokasë në portën timë”, deklaroi Wanda Nara. Ndër të tjera Wanda Nara foli edhe për zërat që kanë qarkulluar ditët e fundir se Icardi mund të kalojë nën prokurimin e Mino Raiolës. “Kam respekt për të, por janë të shumtë ata që pëlqejnë të kenë Icardin si futbollist të tyre. Por manaxherja e tij jam vetëm unë”, deklaroi Wanda, që ka thënë se pas pak javësh do të bëhet takimi  Interit, ku përveç pagës do të flitet edhe për klauzolën e shitjes së tij.

Një person ka tentuar të therë trajnerin e Vllaznisë Ernest Gjoka. Ngjarja ka ndodhur në fushën sportive Reshit Rusi në Shkodër në fund të stërvitjes. Një shtetas me kapuç në koke i është afruar trajnerit dhe ka tentuar që ta sulmojë me thikë. Trajneri Gjoka e ka kuptuar se personi mund ta sulmonte dhe i eshte shmangur duke shpëtuar pa u dëmtuar. Policia është njoftuar menjëherë, ndërsa sipas informacioneve tre shtetas në afërsi të stadiumit “Loro Boriçi” janë shoqëruar në polici duke dyshuar se mund të ketë dijeni për ngjarjen. Ky ështe rasti dytë teksa edhe njëherë tjetër ka patur tentative për ta sulmuar teknikun Gjoka. Policia po heton per ta zbardhur ngjarjen dhe si pistë kryesore e këtij sulmi mendohet të jetë për shkak të detyrës.

E ardhmja e Gianluigi Donnarummës është në Paris. Të paktën kjo është ajo që publikohet në median italiane, e cila thekson se portieri i Milanit ka vendosur që të largohet nga kuqezinjtë në fund të sezonit për t’u transferuar te Paris Saint Germain. Gjithnjë sipas asaj që publikohet në median e vendit të Apenineve, vendimtare në këtë histori rezultoi të ishte ndërhyrja e Marco Verrattit që e ka bindur 19-vjeçarin që të pranojë transferimin në France. Mësohet se Donnarumma e mori vendimin e tij ne 3 muajt e fundit. Portieri italian, përveç projektit teknik të klubit transalpin, ka mbetur i mahnitur edhe nga vetë qyteti i Parisit. Këtyre faktorëve u shtohen edhe këshillat e Verrattit me këtë të fundit që ka të njëjtin agjent si Donnarumma, Mino Raiolën. Në krahun tjetër, edhe Milani mund ta shohë si një lëvizje të nevojshme kalimin e Donnarummës te PSG, pavarësisht deklaratave të Yonghong Li për mbajtjen e futbollistit në skuadër. Kuqezinjtë, nëse nuk do të kualifikohen për në Ligën e kampioneve, do të kenë nevojë për të ardhura financiare, kështu që shitja e kartonit të Donnarummës mund të jetë një ndër masat që mund të merren. Nëse Donnarumma do të kalojë te Paris Saint Germain, do të përfitojë një pagë 12 milionë Euro në sezon, shifër kjo që është 2 herë më e lartë se paga që përfiton aktualisht te Milan, ndërkohë që vetë klubi do të arkëtojë të paktën 70 milionë euro nga shitja e tij. Për sa i përket të ardhmes, Milani duket se e ka gjetur pasuesin e Donnarummës dhe bëhet fjalë për Pepe Reinën. Spanjolli është drejt përfundimit të kontratës me Napolin dhe kuqezinjtë duket se e kanë prenotuar kartonin e tij për verën e ardhshme. Një alternativë tjetër për milanezët është edhe Marketti që prej kohësh e ka humbur vendin e titullarit te Lazio kundrejt Strakoshës.