Një 44 vjeçar në Elbasan ka rënë në prangat e policisë për falsifikim kartëmonedhash.  Arrestimi i shtetasit Taulant Dubali u bë gjatë finalizimit të operacionit të koduar “Start 2018”. Dubalit i’u gjetën dhe sekuestruan 20.700 dollarë, prerje 100 të dyshuara si të falsifikuara. Policia thotë se operacioni dhe hetimet vazhdojnë për dokumentimin e plotë ligjor të kësaj veprimtarie kriminale si dhe përfshirjen e mundshme të personave të tjerë të implikuar në këtë aktivitet kriminal. Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Falsifikimi i monedhave” parashikuar nga neni 183/2 i Kodit Penal.

Gjykata e Kavajës ka dhënë masën e sigurisë të bllokimit të pasaportës dhe mos daljes jashtë shtetit të kryebashkiakut të Rrogozhinës Beqir Nuerdini. Nuredini akzohet për abuzimet me pronat në bregdet.  Gjithashtu, gjykata ka dhënë arrest me burg edhe për biznesmenin Idlir Karkini. Po ashtu janë kryer hetime dhe në lidhje me ndërtimet e 27 (njëzet e shtatë) lokaleve përgjatë vijës bregdetare, ku vetëm 4 (katër) persona (investitorë) rezultojnë të jenë banor të zonës, ndërsa të gjithë personat e tjerë janë qytetar të rretheve të tjera. Në vitin 2015 Nuerdini doli fitues si kryetar i Bashkisë Rrogozhinë nga koalicioni ASHE dhe vinte nga radhët e PDIU.

Qeveria duhet të ndërmarrë nisma të reja ligjore për zgjerimin e skemave të sigurimeve në vend. Presidenti i Kompanisë Sigal Unika Grup Austria, në emër të shoqatës së siguruesve thekson nevojën për të mos e lënë tregun vetem me ligjin e mjeteve motorike, dhe vetë sigurimi të mos shihet si taksë, por si garanci. Shoqata e Siguruesve të Shqipërisë i kërkon qeverisë të ndërmarrë nisma konkrete ligjore për të zgjeruar skemën e sigurimeve. Duke marrë si shembull, problematikat që po përballen fermët pas përmbytjeve të fundit që përfshinë vendin, dhe debatin që pasoi një propozim të kryeministrit Edi Rama për sigurimin e detyrueshëm, Presidenti i kompanisë Sigal Unika Grup Austria, shprehet se sigutrimi nuk duhet parë si taksë, por si garanci për pronën dhe çdo veprimtari tjetër.

Avni Ponari: I vetmi ligj ekzistues është ligji për sigurimin motorik, ligjin për sigurimin e TPL dhe asgjë tjetër.

Në një bashkëbisedim mbi sfidat dhe problematikat me të cilat përballet sektori i sigurimeve në Shqipëri, Ponari kërkoi që media të luajë rol konkret në ndërgjegjësimin e qytetarëve për garancinë dhe përfitimet që ata mund të marrin nga skemat e sigurimeve.

Avni Ponari: Jo në interes të atyre që kanë krijuar kompani të sigurimeve por në interes të mbrojtjes së interesave të konsumatorëve, ata janë ajo pjesë që mbrohet. Tregu i sigurimeve funksionon. Ponari apeloi për më shumë bashkëpunim përballë sfidave të tregut të sigurimeve dhe synimit për të garantuar një marrëdhënie korrekte dhe transparence me konsumatorin.

Ministria e Evropës dhe e Punëve të Jashtme po shqyrton letrën e presidentit Meta të ardhur si përgjigje e kërkesës së kësaj ministrie për plotfuqishmërinë e negociatave me Greqinë. Nga kjo mësohet se do i kthehet përgjigje kreut të Shtetit në mënyrë institucionale për tre pikat të cilat kishte kërkuar qartësi presidenti Meta. “Ministria për Evropën dhe Punët e Jashtme po shqyrton letrën e Presidentit të Republikës, në përgjigje të kërkesës së dërguar prej saj, për lëshimin e autorizmit për fillimin e negociatave me palën greke për delimitimin e hapësirave detare mes dy vendeve. Çështjeve të ngritura nga Presidenti i Republikës, Ministria për Evropën dhe Punët e Jashtme do t’u përgjigjet në rrugë institucionale. Sikundër Ministri për Evropën dhe Punët e Jashtme është i angazhuar për të vijuar bisedimet e konsultimet e nisura me Presidentin e Republikës për të gjitha çështjet me interes për këtë proces. Procesi i nisur me Greqinë është kompleks, ndaj kërkon qetësi, maturi, institucionalizëm dhe jo projektimin e një anormaliteti që nuk ekziston”. 

Ligji për vetingun në polici u miratua vetëm më votat e mazhorancës ndërsa Partia Demokratike e ka kundërshtuar në shumë nene të tij duke dhënë dhe amendamente përkatëse. Një ndër kërkesat e opozitës ishte dhe përfshirja e Ministrit të Brendshëm në vetting,  por mazhoranca e rrëzoi këtë. Mazhoranca  miratoi e vetme ligjin për vettingun në policinë e shtetit, ndërsa refuzoi amendamentet e opozitës. Me argumentin se propozimet e tyre e bëjnë realisht të zbatueshëm ligjin, Enkelejd Alibeaj,  propozoi që subjekt i vettingut të jetë  Ministri i Brendshëm, shefi i tij i kabinetit dhe zëvendës/ministrat.  Propozimi u rrëzua nga ana e mazhorancës, ndërsa kryetari i Komisionit të Ligjeve tha se nuk po kërkohet vetting për politikanët por për policinë. Opozita kërkoi po ashtu që organet e vettingut të jenë jo politike dhe jo nën varësinë e Ministrisë së Brendshme apo qeverisë. Alibeaj  tha se ky ligj është farsë dhe nuk sjell asgje të re. Pavarësisht një numri të madh amendamentesh, mazhoranca refuzoi opozitën duke e miratuar draftin që pritet të kalojë në Kuvend të enjten. Në përfundim të mbledhjes, opozita kërkoi sërish reflektimin mazhorancës. Janë rreth 15 mijë punonjës të Policisë së Shtetit, Gardës së Republikës dhë Shërbimit të Çështjeve të Brendshme që do të kalojnë në sitë në tre komponentë kryesorë; vlerësimin e pasurisë, kontrollin e figurës dhe vlerësimin e aftësive profesionale.