Vijojnë ende në Gjermani bisedimet mes CDU-së dhe SPD-së për krijimin e qeverisë së re. Sipas raportimeve të mediave gjermane, negociatat janë ndërprerë mesnatën e të hënës dhe pritet të vazhdojnë dhe sot. Edhe pse data përfundimtare për arritjen e një marrëveshjeje ishte ajo e 4 shkurtit, ishin parashikuar dy ditë pritjeje, nëse do të kishte lindur nevoja për diskutime të reja. Lideri i socialdemokratëve Martin Shulz u shpreh se kanë prfunduar bisedimet për Europën dhe të gjitha palët kishin rënë dakord që vendi ka një të ardhme vetëm në një europë të fortë dhe të bashkuar dhe se të gjithë ishin gati për të qenë pjesë e saj. Pas zgjedhjeve të përgjithshme në vend, rënia e numrit të votive për partitë tradicionale, dhe ngritja e atyre të ekstremit të djathtë bënë të pamundur një mazhorancë të qartë në Dhomën e Deputetëve. Në një moment të parë Unioni i Kristiandemokratëve të Angela Merkel u përpoq të krijonte një koalicion me liberlaët dhe ekologjistët por dështoi duke bërë që në janar të nisnin negociatat me socialdemokratët. Bisedimet tashmë janë në fazën përfundimtare dhe anëtarë të partisë së Merkel u shprehën optimist për mediat gjermane duke thënë se marrëveshja ishte shumë pranë. Marrëveshjet e arritura deri tani kanë të bëjnë me disa investime: 2 miliard euro për ndërtimin e banesave sociale deri në 2021-shin dhe 33 miliardë do të jenë për bashkitë për disa projekte të ndryshme mes të cilave dhe shërbimet për fëmijët. Ndërsa ende pa zgjidhur janë temat për shëndetësinë dhe normat për punën. Ajo që është e qartë, ka të bëjë me faktin se gjermanëtjanë gjithnjë e më shumë indiferentë përballë faktit se vendi prej katër muajsh është pa qeveri. Nuk është një rastësi që dy partitë politike kanë marrë një mbështetje minimale nga votuesit, me socialdemokratët që kanë zbritur në 18 për qind të pëlqimit dhe unioni I kristiandemokratëve në 33 për qind. Përtej mbështetjes, sipas analistëve gjermanë edhe nëse gjendet një marrëveshje, do të bëhej fjalë për një aleancë të paqëndrueshme me euroskeptikët e Alternativës për Gjermaninë në opozitë në Bundestag.

Kriza politike në Maldive është përkeqësuar ndjeshëm. Policia arrestoi kreun e Gjykatës së Lartë, Abdulla Saaeed dhe një gjykatës tjetër, disa orë pasi qeveria shpalli gjendjen e jashtëzakonshme. Trazirat nisen kur presidenti Abdulla Yameen refuzoi t’i bindej urdhrit për lirimin e disidentëve politikë. Vendimi është dënuar ashpër nga opozita dhe komuniteti ndërkombëtar. Maldivet janë një shtet i përbërë nga 26 ishuj koralor ku banojnë 1192 persona. Turizmi është një pjesë jetësore e ekonomisë së tij. Pjesë e grupit të politikaneve opozitare është edhe ish-presidenti Muhamed Nasheed, i cili po jeton në ekzil në Britaninë e Madhe. Gjykata vendosi se gjyqi kundër tij në vitin 2015 kishte qenë jokushtetues. Tensionet u përshkallëzuan të martën kur u shpall gjendja e jashtëzakonshme e kur policia u autorizua të kryente arrestime dhe të ndalonte mbledhjet publike. Nasheed i kërkoi Indisë dhe Shteteve të Bashkuara të ndihmojnë në përmbysjen e presidentit Tameen, i cili sipas tij kishte shpallur në mënyrë të paligjshme ligjin e luftës. Që prej ardhjes se Jamenit në pushtet në vitin 2012, vendi është përballur me probleme sa i përket lirisë së medias, burgosjes së opozitarëve dhe Pavarësisë së gjyqësorit. Departamenti Amerikan i Shtetit u shpreh i shqetësuar dhe i zhgënjyer nga zhvillimet. Ish presidenti Maumoon Abdul Gayoom u arrestua pasi lideri aktual dhe vëllai i tij Abdulla Yameen dekretoi gjendjen e jashtëzakonshme. Lajmin e bëri të ditur vajza e Gayoom në rrjetin social Twitter. Ish presidenti 80 vjeçar që udhëhoqi vendin për 30 vjet deri në 2008-ën kur u mbajtën zgjedhjet e para demokratike, e që më pas u bashkua me opozitën aktuale, u arrestua në banesën e tij në kryeqytetin Male. Vendi është përfshirë nga një krizë e rëndë institucionale që prej së enjtes kur Gjykata e Lartë urdhëroi lirimin e të gjithë opozitarëve politikë të qeverisë aktuale, përfshirë ish-presidentin Mohammed Nasheed, në ekzil në Mbreterinë e Bashkuar.