Gazetari Mero Baze ka reaguar pas publimit të përgjimeve të Gardës së Republikës më 21 janar 2011, ku tregohej qartë se vrasjet në bulevardin “Dëshmorët e Kombit” ishin kryer me urdhër nga lart.
Baze shkruan se fakti që Berisha zhduku serverin e Kryeministrisë, sërish nuk e fshehu dot krimin. Sipas tij, tani SPAK-u nuk ka më asnjë alibi për të mos e hapur çështjen dhe arrestimet të nisin që sot.
Reagimi i plotë
Gazetari Artan Hoxha ka publikuar sot audion e regjistruar nga komunikimi me radiot e Gardës së Republikës më 21 janar 2011. Audiot që dëgjohen nga regjistrimi i radiove, provojnë tërësisht se komandanti i Gardës Ndre Prendi ka urdhëruar vrasjet. Madje ai ka zgjedhur dhe kush duhet të vriste, duke ju drejtuar me emër dy gardistëve.
Fakti që Sali Berisha zhduku serverin e kamerave të kryeministrisë më 21 janar duke u gdhirë 22 Janari, nuk e fshehu dot krimin. Pas 12 vitesh më në fund dolën në publik komunikimet me radio.
Tani SPAK nuk ka më asnjë alibi për të mos hapur çështjen. Së paku Ndrea Prendi përveçse me figurë tani është dhe më zë si urdhërues i vrasjeve. Arrestimi mund të bëhet që sonte. Tani nuk ka më një kryeministër që nuk i lë të prekin gardistët. Janë të lirë të hetojnë. Madje dhe ish kryeministrin mund ta marrin.
