Nënsekretari i Shteteve të Bashkuara të Amerikës, David Hale në një intervistë për Gazetën Express ka hedhur poshtë të gjitha spekulimet se raportet Kosovë-SHBA po eskalojnë. Pas takimeve që ka zhvilluar me krerët e shtetit, Presidentin, Kryeministrin dhe Kryeparlamentarin, Hale është fokusuar në dialogun Kosovë – Serbi, që sipas tij duhej të përfundonte me “njohjen reciproke të të dy shteteve”. Zyrtari i lartë amerikan ka thënë që SHBA dhe shtetet e BE-së në përgjithësi kanë qëndrim të njëjtë për zgjidhjen e problemit në mes të Kosovës dhe Serbisë. Spekulimet e javës së kaluar se ushtria e Shteteve të Bashkuara të Amerikës do të tërhiqen nga Kosova, nëse Qeveria e Kosovës e pengon dialogun, nënsekretari i shtetit nuk i ka komentuar, por ka thënë që përkushtimi i SHBA-ve në Kosovë do të vazhdojë i pandryshuar.
David Hale: Asgjë nuk ka ndryshuar në përkushtimin tonë.
