Astrit patozi, nëpërmjet një postimi, në rrjete sociale ka zbuluar arsyen se; përse Kryeministri Rama ka vendosur që të kandidojë në qarkun e Durrësit, për zgjedhjet e 25 prillit.
Sipas Patozit, Partia Socialiste e ndjen se; nuk i ka mirë punët në Durrës dhe Rama bëri këtë lëvizje strategjike.
Postimi i plotë:
“T’UA LEMË NË DORË THESIN E GËNJESHTRAVE
Edi Rama paska thënë se do të bashkojë Tiranën me Durrësin dhe për këtë u dashka që ai të bëhet pak durrsak në këto zgjedhje. A thua se kjo bëhet me ndonjë vendim qeverie dhe nuk është iniciativa e lirë e qindra mijëra shqiptarëve, të cilët kanë zgjedhur të jetojnë dhe bëjnë biznes prej 30 vjetësh në zonën më të populluar të Shqipërisë.
Përkthimi, në fakt, nuk është kaq i vështirë. “Rilindja” duket që nuk i ka punët mirë në Durrës, por ai po do që të këtë na e shesë si sakrificë të vetën për kombin. Nuk ka nevojë të lodhet kaq shumë, se ia njohim “nderin”.
Por kjo është një tjetër provë e qartë se asgjë nuk ka ndryshuar dhe kështu do të vazhdojë deri më 25 prill. Ata kanë hapur thesin e premtimeve dhe të gënjeshtrave me ngjyra dhe nuk do të ndalen deri në ditën e fundit të fushatës. Me shpresën se do të na e hedhin edhe kësaj radhe.
Edhe ata të tjerët nuk do të mbeten mbrapa, sepse të njëjtës racë u përkasin. Ndaj edhe duhen refuzuar si një paketë mashtruese më 25 prill.” – ka shkruar Astrit Patozi.
