Ministri i Brendshëm Sandër Lleshaj, ka reaguar pas ndarjes nga jeta të 25-vjeçarit, Klodian Rasha.
Nëpërmjet një postimi në “Facebook”, Ministri Lleshaj ka shkruar se; ka besim të plotë se organet ligjore përgjegjëse do të finalizojnë shpejt dhe jashtë çdo ndikimi hetimet për eleminimin e Klodian Rashës.
“E VËRTETA ËSHTË NGUSHËLLIMI MË I MADH Ka shumë arsye se përse e ndjej fort se çfarë do të thotë humbja e Klodian Rashës për prindërit dhe familjarët e tij. Në këto çaste të hidhërimit të madh, u shpreh atyre ngushëllimet e mia më të thella për këtë humbje tragjike. Në të njëjtën kohë, shpreh besimin tim të plotë se organet ligjore përgjegjëse do të finalizojnë shpejt, saktë, drejt dhe jashtë çdo ndikimi hetimet për eleminimin e Klodian Rashës. Kjo ngjarje ka prekur shumë njerëz, të afërm të viktimës, qytetarë të zakonshëm, pjesëtarët e Policisë së Shtetit dhe gjithë të tjerët. Sot të gjithë kanë nevojë për qartësimin e plotë dhe shterues të rrethanave që sollën këtë ngjarje tragjike dhe autoritetet përgjegjëse ligjore duhet të përmbyllin sa më shpejt detyrën e tyre në shërbim të së vërtetës dhe të drejtësisë.”- ka shkruar Lleshaj.
