‘Big Brother Vip’ është rikthyer në Shkodër por jo siç jemi mësuar ta shohim si një “Reality Show”, por në skenën e Teatrit Migjeni. E vendosur si komedi nga regjizori Ismet Drishti, shfaqja tërhoqi qindra shkodranë që e vlerësuan ironinë e ndërthurur në art.
Në një sallë të tejmbushur të teatrit “Migjeni” të Shkodrës, u shfaq premiera e komedisë “Big Brother Vip Shkodra”. 16 aktorë sollën për publikun të qeshura pa fund përmes roleve dhe karaktereve të krijuara.
“Spektatori shkodran është i jashtëzakonshëm, e kam thënë është spektatori më i mirë në botë.”
“Unë personalisht në prova jam shumë e lodhur, sa dalë në skenë, sa më shikon publiku ose më jep reagimin e parë, aty marr sadisfaksionin më të madh.”
“Mundem me gjuajt me gojën plot që kjo është mrekullia që ndodh vetëm në Shkodër.”
Shtëpia më e famshme në Shqipëri, rierdhi në skenën e teatrit të Shkodrës, krejt ndryshe nga ato të mëparshmet.
“Unë e shoh një situatë shumë shqetësuese shoh disa programe televizive me të vërtetë problematike, në çfarë rruge po i dërgojmë njerëzit, po i cojmë rininë, sa vlerë po mban familja, kam frikë se po na shkatërrohet familja” tha Ismet Drishti.
E veçantë ishte kjo natë për mjeshtrin e madh Besnik Çinari që festoi në skenë 68 vjetorin e lindjes. Një publik i tërë në këmbë uroi këtë ditë të veçantë për njeriun që në 40 vite i ka dhuruar të qeshura pa fund.
‘Big Brother Vip Shkodra’ do të vijë në skenë për disa net radhazi, kjo falë kërkesës së madhe të publikut për këtë komedi.
