Sekretariati i Etikës ka pranuar kërkesën e PS dhe ka përjashtuar me 60 ditë nga seancat plenare dy deputetët e Partisë Demokratike, Gazment Bardhi dhe Klevis Balliu.

Ishte mazhoranca qeverisëse që kërkoi marrjen e masave për dy opozitarët, të cilët hodhën shishe uji e vezë në drejtim të kryeministrit Edi Rama, anëtarëve të tjerë të kabinetit e deputetëve gjatë seancës së 8 tetorit kur u votua dhe reforma e re territoriale.

Opozita ishte kundër propozimit të Partisë Socialiste. Gjatë procesit të votimit, deputetët e opozitës u revoltuan nga prania e kryeministrit Edi Rama në sallë e më tepër nga ajo e ish numrit dy të qeverisë, Belinda Balluku, e cila u paraqit për të ngritur kartonin pro draftit të PS.

Ministrja e Arsimit, Mirela Kumbaro ka miratuar së fundmi Kodin e Etikës, ku mësohet se të gjithë nëpunësve u duhet të mësojnë rregullat e sjelljes brenda dhe jashtë institucionit, në mënyrë që të mos cënohet imazhi i institucioneve.

“Nëpunësit e institucionit duhet të garantojnë se të gjitha asetet, mjetet e punës, infrastruktura teknologjike dhe bazat e të dhënave zyrtare përdoren ekskluzivisht për përmbushjen e detyrave funksionale dhe në shërbim të interesit publik. Për të siguruar paanshmërinë politike dhe integritetin e institucionit, këto burime nuk mund të vihen në dispozicion të aktiviteteve gjatë fushatave elektorale.”, shkruhet në dokumentin e siguruar nga Top Channel.

Përgjatë Kodit të ri të Etikës theksohet gjithashtu se nuk do të pranohet veshja ekstravagante, sportive apo makiazh i tepruar. Po ashtu bëhet me dije se nëpunësi nuk duhet të mbajë veshje, simbole ose elemente përmes së cilave shfaqin bindje politike.

Më tej nënvizohet se sjellja nuk duhet të udhëhiqet nga interesat private apo nga ndikimi politik gjatë proceseve vendimmarrëse.Gjiashtu nëpunësi duhet të kërkojë përjashtimin kur konstaton konflikt të mundshëm interesi.

Një tjetër pikë në Kod është sinjalizimi i korrupsionit, ku do të garantohet mbrojtja e konfidencialitetit të nëpunësit që raporton shkelje të ligjit gjatë detyrës.

“Nëpunësit i ndalohet të kërkojë ose të pranojë drejtpërdrejt ose tërthorazi dhurata, shpërblime, favore, ose cfarëdo përfitimi tjetër, si dhe premtime për përfitime, për veten ose për persona të lidhur me të, kur ato ndikojnë ose mund të ndikojnë, apo krijojnë perceptimin se ndikojnë, në paanshmërinë e ushtrimit të detyrës ose përbëjnë, apo mund të perceptohen si shpërblim për kryerjen e saj”.

Përgjatë të njëjtit dokument theksohet se edhe gjatë mbledhjeve me Ministrin, Sekretarin e Përgjithshëm, drejtuesit e tjerë, telefoni duhet të jetë i fikur ose në modalitet pa zë, përveç rasteve kur përdorimi i tij është autorizuar nga drejtuesi i mbledhjes.

Ambasadori i Shteteve të Bashkuara të Amerikës, Eric Wendt, ka zhvilluar sot një takim në ambientet e SPAK-ut me kreun e këtij institucioni, Klodian Braho.

Ambasadori amerikan ka mbërritur në ambientet e Prokurorisë së Posaçme i shoqëruar nga anëtarë të delegacionit dhe zyrtarë të tjerë amerikanë, ku është pritur nga përfaqësuesit e institucionit.

Kujtojmë se edhe katër ditë më parë, diplomati amerikan u takua me dy drejtuesit e institucioneve të drejtësisë.

Në njoftimin për atë takim, Ambasada Amerikane theksoi se “Lufta kundër krimit transnacional, trafikut të narkotikëve dhe migracionit të paligjshëm është ndër përparësitë kryesore të Presidentit Donald Trump”.

Po ashtu, ambasada bëri të ditur se “Ambasadori Eric Wendt u takua me drejtuesit e SPAK-ut për të diskutuar rolin vendimtar të institucioneve të pavarura në përballimin e këtyre sfidave dhe se si partneriteti ynë kontribuon për një të ardhme më të sigurt e më të begatë për të dy kombet tona”.

Harta e re territoriale që parashikon shkrirjen 15 bashkive të vogla u miratua të enjten në mesnatë me 85 vota pro, vota që erdhën nga 82 deputetët e PS-së dhe mandatet e Partisë Socialdemokrate të Tom Doshit.

Nisma e njëanshme e PS-së u kundërshtua fort nga opozita, nga këshillat bashkiakë të bashkive që do të shkrihen dhe nga komunitetet lokale në këto zona që protestuan të enjten para parlamentit.

Në seancë plenare u shfaqën edhe zëra kundër brenda radhëve të PS-së, por qëndrimet e tyre nuk u reflektuan në votimin final, pas paralajmërimeve të kryeministrit Edi Rama për përjashtimin nga grupi parlamentar.

“Ai (Rama) tha; nëse ti voton kundër je jashtë këtij grupi parlamentar,” tha deputeti veteran i kësaj partie, Erion Braçe gjatë një komunikimi në media vetëm disa orë para votimit në parlament. Në finale, Braçe votoi sipas vullnetit të kryeministrit dhe në kundërshti me qëndrimin e tij publik.

Duke shprehur rezerva të forta ndaj nismës së PS-së, Braçe tha të enjten në Kuvend se nuk bëhej fjalë për ‘reformë’, por për ‘vijëzim i një harte të re’ pa marrë parasysh se kjo ndryshonte jetën e njerëzve në bashkitë që shkriheshin.  “Harta e provuar shumë herë është e përkohshme dhe e paqëndrueshme dhe si reformë tërësisht e pamjaftueshme,” kritikoi ai.

Edhe deputetja Elisa Spiropali, e cila prej muajsh ka tentuar të krijojë një profil kritik brenda radhëve të PS-së, në fund votoi pro, edhe pse kishte paralajmëruar të kundërtën gjatë fjalës saj.

“Ne s’jemi as kartona, as njerëz pa përgjegjësi. Mënyra se si ju na drejtoheni është revoltuese,” tha Spiropali në seancë.

Edhe deputetë të tjerë socialistë, që kishin shprehur kritika dhe kishin kërkuar që të merrej parasysh vullneti i banorëve në zonat ku ata ishin zgjedhur deputetë, u tërhoqën në momentin e fundit duke iu nënshtruar vendimit politik të partisë, pavarësisht garancive kushtetuese që deputeti shpreh vullnetin individual.

Pro hartës së re votoi edhe Belinda Balluku, ish-zv.kryeministrja nën hetim për korrupsion dhe shkelje të barazisë në tendera, e cila u shfaq në parlament mbrëmjen e së enjtes pas javësh të tëra mungese.

Kryeministri Rama e komentoi me nota ironike shuarjen e zërave kritikë në partinë e tij.

“Përtej të gjithë debateve të brendshme, spekulimeve të jashtme dhe peripecive të një kohe të ngatërruar nga gjithfarë duarsh të pista, ca të dukshme e ca të padukshme po jo të pazbuluara tanimë, votimi i mbrëmshëm në Kuvend i dha Shqipërisë një tjetër shtysë modernizuese”- shkruajti ai në platformën X duke shtuar se “nga ana tjetër, u tregoi edhe njëherë të gjithë atyre që e kishin të nevojshme, se nuk duhet të bëjnë asnjëherë ‘hesape pa hanxhinë’ me Partinë Socialiste”.

Rama e drejton PS-së që prej vitit 2005, kur ish kryetari i saj historik Fatos Nano dha dorëheqjen pas humbjes në zgjedhjet parlamentare të atij viti. Në një parti ku kishte pasur debate dhe franskione politike prej vitesh, Rama ndërtoi një figurë autoritare, ku institucionet partiake dhe debati i brendshëm pothuajse nuk ekzistojnë./ Reporter.al

Pasditen e nxehtë të 26 gushtit, ndërsa dielli po perëndonte mbi plazhin e Durrësit, një Audi i zi u bllokua nga disa makina të pashënjuara policie në autostradë, pranë zonës së Plepave. Brenda tij ndodhej Ergys Agasi, një ish-zyrtar i Ministrisë së Mjedisit dhe biznesmen, të cilin SPAK e akuzon si drejtues të një grupi të strukturuar kriminal që përdorte çdo mjet, nga korrupsioni deri te pengmarrja, për kontrollin dhe manipulimin e tenderëve publikë të lidhur me Agjencinë Kombëtare të Shoqërisë së Informacionit, AKSHI.

Në pamjet e publikuara nga Policia e Shtetit, Agasi shfaqet me një bluzë të bardhë dhe pantallona të shkurtra, i rrethuar nga policë në njërën anë të rrugës, me duart e lidhura pas shpine dhe kokën të ulur.

Më pak se një muaj më vonë, më 21 shtator, Gjykata e Posaçme caktoi masën e sigurisë “arrest në shtëpi” dhe pezullimin nga detyra për Vlora Hysenin, drejtoreshën e Shërbimit Informativ të Shtetit, SHISH, e dyshuar se kishte ndihmuar Agasin gjatë periudhës kur ai ishte në kërkim dhe se mund t’i kishte përcjellë informacione me karakter sekret. Edhe ish-drejtori i Policisë së Shtetit, Ilir Proda, është marrë në pyetje nga SPAK dhe, sipas raportimeve mediatike, është nën hetim në lidhje me rrethanat e arratisë dhe mbrojtjes së dyshuar të Agasit.

Detajet e dosjes hetimore ndaj Vlora Hysenit, të rrjedhura në media, tregojnë se ish-drejtuesja e SHISH kishte krijuar një marrëdhënie romantike me Agasin. Hyseni i mohon akuzat dhe raportohet se i ka justifikuar komunikimet me biznemenin në kërkim me statusin e tij si informator i SHISH. Por sipas ish-zëvendëskryeministrit Arben Ahmetaj, ndikimi i ish-zyrtarit durrsak shkonte përtej Hysenit dhe buronte nga një miqësi shumë më e rëndësishme politike, ajo me kryeministrin Edi Rama.

Ahmetaj e ka përshkruar publikisht Agasin si një “koordinator” mes qeverisë së Ramës dhe grupeve të krimit të organizuar, një akuzë që Agasi dhe Rama e kanë mohuar. Vetë Rama nuk e ka mohuar se e njihte dhe kishte afërsi personale me Agasin, por ka këmbëngulur se një marrëdhënie njerëzore me kryeministrin nuk përbën funksion publik dhe se Agasi nuk kishte autorizim të vepronte në emër të tij.

Edhe pse pa mandat apo post zyrtar, dosja e SPAK-ut e paraqet Agasin si një njeri me ndikim të drejtpërdrejtë mbi mënyrën se si ndaheshin kontrata publike me vlerë miliona euro. Sipas prokurorisë, ky ndikim i siguroi atij përfitime të mëdha financiare.

Djali i deputetit

Ergys Agasi lindi në Durrës në mars të vitit 1987. I ati, Bardhyl Agasi, ka qenë deputet i Partisë Socialiste për Durrësin për tre mandate, ka shërbyer si zëvendëskryetar i grupit parlamentar socialist dhe sekretar i Komisionit për Mjetet e Informimit Publik.

Gjurmët e para në internet të Ergys Agasit nuk lidhen me administratën publike, por me biznesin. Në nëntor 2011, në moshën 24-vjeçare, ai shfaqet si ortak dhe për një periudhë të shkurtër, administrator i kompanisë “Agasi Markoudis Group”, një shoqëri me seli në Durrës dhe objekt aktiviteti që shtrihej nga ndërtimi e tregtia te pasuritë e paluajtshme. Kompania hyri në likuidim dy vjet më vonë.

Në tetor 2013, vetëm pak javë pasi qeveria “Rama” kishte marrë detyrën, Agasi shfaqet publikisht si kryeinspektor i Mjedisit në një aksion kundër kompanive të inerteve në Zall Herr. Të dhënat e deklarimeve pasurore e regjistrojnë zyrtarisht në funksionin e kryeinspektorit të Inspektoratit Shtetëror të Mjedisit dhe Pyjeve nga 21 shkurti 2014, kur ishte vetëm 26 vjeç.

Ministria e Mjedisit në atë kohë drejtohej nga Lefter Koka, i cili më vonë do të arrestohej për korruspion dhe pastrim parash për rolin e tij në skandalin e inceneratorëve.

Posti i kryeinspektorit i dha Agasit kontakt të drejtpërdrejtë me bizneset, lejet, inspektimet dhe strukturat shtetërore që kontrollonin sektorë të rëndësishëm të ekonomisë. Gjatë viteve në Ministrinë e Mjedisit, Agasi krijoi lidhje me ish-deputetin e PS-së, Alqi Bllako, i cili në vitet 2013-2016 shërbeu si Sekretar i Përgjithshëm.

Në korrik 2016, ndërsa Agasi ishte ende kryeinspektor, ai themeloi së bashku me Edmond Bllakon, babanë e Alqi Bllakos, kompaninë EA Logistics, me nga 50% të kuotave secili. Pas largimit nga administrata, Agasi u bë administrator i kompanisë dhe në korrik 2018 bleu edhe 50% të aksioneve të Edmond Bllakos, duke u bërë pronar i vetëm.

Afërsia me pushtetin

Nga fundi i vitit 2021 ose fillimi i vitit 2022, biznesmeni Orest Sota kujton se nisi ta shihte rregullisht Ergys Agasin te lokali “Chocolattini” në zonën e ish-Bllokut në Tiranë. Agasi hante aty mëngjesin, ndërsa Sota shkonte për kafe. Fillimisht vetëm përshëndeteshin, por me kalimin e kohës marrëdhënia u forcua. Sota i tha më vonë SPAK-ut se kishte dëgjuar se Agasi filloi të merrte shumë fuqi në treg, si “biznesmen i fuqishëm me pushtetin”.

Nga ky reputacion i shpërndarë në treg duket se buron edhe fuqizimi i bizneseve të tij. Pasi u bë pronari i vetëm i kompanisë EA Logistics, Agasi ia ndryshoi emrin në EA Tobacco në mars 2019. Xhiroja e saj u rrit nga rreth 6.2 milionë lekë në vitin 2017 në 291.5 milionë lekë në vitin 2021 dhe 470.5 milionë lekë një vit më vonë.

Zgjerimi në këtë sektor vazhdoi edhe përmes Special Tobacco, një kompani e krijuar në vitin 2018. EA Tobacco mori kontrollin e plotë të saj dhe, më 28 shkurt 2020, kuotat iu transferuan drejtpërdrejt Agasit.

Kompania merrej me tregtimin e cigareve dhe produkteve të duhanit dhe më vonë ndryshoi emrin në EA Logistic. Edhe këtu rritja ishte e shpejtë. Xhiroja vjetore arriti rreth 371 milionë lekë në vitin 2021 dhe 559 milionë lekë në vitin 2022.

Në mars 2023, Agasi hyri edhe në sektorin e teknologjisë së informacionit me krijimin e EA Solution, ku ishte pronar i vetëm dhe fillimisht administrator. Kompania kishte si objekt aktiviteti shërbime në teknologjinë e informacionit, telekomunikacion dhe sisteme IT.

Vetëm gjatë vitit të parë të aktivitetit, EA Solution raportoi xhiro prej rreth 242.4 milionë lekësh dhe fitim para tatimit prej rreth 232.1 milionë lekësh. Pikërisht kjo kompani do të shndërrohej më vonë në një nga hallkat kryesore të hetimit të SPAK-ut për tenderët e AKSHI-t.

Denoncimi i Ahmetajt

Për vite me radhë, Ergys Agasi kishte mbetur një emër relativisht pak i njohur për publikun, edhe pse bizneset dhe pasuria e tij po zgjeroheshin. Kjo ndryshoi në vitin 2024, kur ish-zëvendëskryeministri Arben Ahmetaj, në një intervistë për emisionin “Report” të televizionit italian RAI 3, e vendosi atë në qendër të akuzave të tij ndaj qeverisë së Edi Ramës.

Ahmetaj e përshkroi Agasin si një “koordinator” mes kryeministrit dhe grupeve të krimit të organizuar, duke pretenduar se biznesmeni shërbente si ndërmjetës mes pushtetit politik dhe eksponentëve kriminalë, përfshirë edhe gjatë proceseve zgjedhore.

“Po të jap emrin e koordinatorit, Ergys Agasi,” i tha ai gazetari Sigfriddo Ranucci, duke pretenduar se biznesmeni durrsak ishte bërë “për llogari të Ramës, koordinator i të gjithë grupeve”.

Në deklarata të mëvonshme, Ahmetaj pretendoi se marrëdhënia mes Ramës dhe Agasit ishte shumë më e afërt nga sa dukej publikisht.

Sipas tij, Agasi ishte i pranishëm në dreka dhe darka private të kryeministrit dhe kishte akses të drejtpërdrejtë në rrethin e tij të ngushtë. Ahmetaj ka pretenduar gjithashtu se Agasi kishte marrë pjesë në një darkë në rezidencën qeveritare, ku ishte i pranishëm edhe ish-kancelari austriak, Sebastian Kurz.

Vetë Rama nuk e ka mohuar njohjen apo afërsinë personale me Agasin. Pas arrestimit të biznesmenit, kryeministri e përshkroi atë si një “marrëdhënie njerëzore”, por këmbënguli se Agasi nuk kishte pasur mandat apo autorizim për të vepruar në emër të tij.

“Tani mua më kanë bërë shumë afërsira ose shumë rrëfenja me afërsitë. Afërsia me mua e një njeriu apo e një njeriu tjetër, nuk është funksion publik. As fotografia, as raportet personale dhe as pretendimi që unë e kam me atë, unë flas në emër të atij, etj. Unë nuk kam autorizuar ndonjëherë ndonjë njeri që të flasë në emrin tim apo të bëjë punët e shtetit në emrin tim,” deklaroi me 11 shtator 2026, në podkastin “Flasim”.

“Patjetër që mua më vjen keq që gjendem në situatën kur një njeri që unë kam pasur një marrëdhënie njerëzore për një arsye apo një tjetër, ekspozohet si një njeri që ka probleme me ligjin. Por nga ana tjetër jam tërësisht i çliruar sepse, përtej keqardhjes, secili atje është përballë ligjit me veten dhe avokatin e vet,” shtoi ai.

Kontrabanda e cigareve

Në fillim të vitit 2025, Agasi zgjeroi më tej interesat në industrinë e duhanit përmes blerjes së kompanisë “Albania Tabak” në Librazhd. Marrëveshja parashikonte kalimin e plotë të kuotave te EA Tobacco, pasi pronarët e mëparshëm të shlyenin detyrimet e kompanisë. Në pamje të parë, ishte një tjetër hap në zgjerimin e biznesit të tij të cigareve.

Por fabrika që Agasi po merrte kishte hyrë ndërkohë në një hetim të SPAK-ut për kontrabandë cigaresh.

Sipas hetimit, gjatë viteve të mëparshme sasi cigaresh të prodhuara apo të deklaruara për eksport dyshohej se ishin devijuar drejt tregut të paligjshëm, përmes dokumentacionit dhe destinacioneve të rreme. Një nga episodet e hetuara lidhej me një ngarkesë të ndaluar nga autoritetet greke në vitin 2023.

Episodet kryesore të kontrabandës që hetonte SPAK-u i përkisnin periudhës përpara se Agasi të merrte kontrollin e “Albania Tabak”. Në atë kohë ai nuk ishte pronar i fabrikës dhe nuk rezultonte i përfshirë në skemën e dyshuar të ngritur nga administratorët dhe pronarët e mëparshëm.

Megjithatë, blerja e kompanisë e afroi për herë të parë seriozisht Agasin me një hetim të Prokurorisë së Posaçme. Në verën e vitit 2025, agjentët e Byrosë Kombëtare të Hetimit ushtruan kontrolle në banesën dhe bizneset e tij në kuadër të procedimit për kontrabandën e cigareve.

Agasi deklaroi publikisht se nuk ishte person nën hetim në atë çështje dhe se nuk kishte dijeni për aktivitetin e dyshuar të pronarëve të mëparshëm të fabrikës. Sipas tij, marrja e “Albania Tabak” kishte qenë një vendim biznesi.

Kontrollet e BKH-së, megjithatë, shënuan një kthesë në trajektoren e tij. Për herë të parë, emri i Agasit nuk lidhej më vetëm me kompanitë, pasuritë dhe afërsinë e perceptuar me pushtetin, por edhe me një hetim penal të SPAK-ut.

Tenderat e AKSHI

Pas njohjes në ish-Bllok, Orest Sota dhe Ergys Agasi u afruan gradualisht, të ndihmuar edhe nga miqësia e përbashkët me Alqi Bllakon. Sipas dëshmisë së Sotës, me kalimin e kohës, mes tyre u krijua një miqësi e ngushtë.

Kjo miqësi do të merrte më vonë edhe një dimension praktik. Agasi i kërkoi Sotës t’i gjente një apartament me qira për drejtoreshën e AKSHI-t, Mirlinda Karçanaj. Sota i ofroi një pronë të tij pranë stadiumit “Air Albania”, ku Karçanaj u vendos më pas.

Sota u tha hetuesve se nuk e njihte Karçanajn dhe se nuk ishte takuar asnjëherë me të. Marrëveshja, sipas tij, ishte bërë përmes Agasit. Edhe çmimin e qirasë tha se e kishte vendosur në një nivel minimal “për t’i bërë nder shtetasit Ergys Agasi për shoqëri”.

Më 16 dhjetor 2025, SPAK njoftoi shpalljen në kërkim me masë “arrest në burg” të Ergys Agasit, i dyshuar si kreu i një grupi kriminal që, sipas prokurorisë, kishte manipuluar tenderët e AKSHI-t përmes favorizimit të kompanive të caktuara, faturave fiktive, presionit dhe dhunës.

Mirlinda Karçanaj dhe zëvendësdrejtoresha Hava Delibashi dyshohet se ndikonin në vendosjen e kritereve të tenderëve për të favorizuar “Soft & Solution”, “First”, “Fastech” dhe kompani të tjera të lidhura në mënyrë të tërthortë me Agasin.

Kompanitë që përfitonin tendera nga AKSHI transferonin shuma të mëdha në llogaritë e kompanisë EA Solutions të Agasit, përmes kontratave dhe faturave për shërbime që nuk ishin kryer realisht.

SPAK pretendon se Agasi përdorte presionin dhe dhunën për të kufizuar konkurrencën dhe për të mbajtur nën kontroll operatorët e tregut. Ai dyshohet se më 12 gusht 2025, urdhëroi rrëmbimin e biznesmenti Gerond Mece nga persona të maskuar për ta detyruar të tërhiqte ankimet ndaj tenderëve të AKSHI-t që cenonin interesat e kompanive të lidhura me Agasin.

Pasurimi shpejtë i Agasit

Kur u largua nga administrata shtetërore në vitin 2017, Ergys Agasi deklaronte një pasuri që përfshinte 106 mijë euro në cash, një Mercedes-Benz, një apartament me vlerë rreth 70 mijë euro, garazh dhe kuotat në EA Logistics. Nëntë vjet më vonë, SPAK evidentoi në emër të tij një portofol të gjerë pronash dhe llogarish bankare të konsiderueshme.

Një pjesë e pronave është përqendruar në zonën e Petrelës, në fshatin Qeha Shytaj, ku në emër të tij rezultojnë disa parcela pyjore me sipërfaqe prej mijëra e dhjetëra mijëra metrash katrorë, të shoqëruara me ndërtesa të mëdha.

Vetëm njëra prej pronave ka një sipërfaqe prej rreth 26.7 mijë metrash katrorë dhe një ndërtesë prej 346 metrash katrorë, ndërsa prona të tjera përfshijnë ndërtime prej 182, 350, 490 dhe 568 metrash katrorë. Një pjesë e këtyre pasurive u legalizuan në qershor 2024, mbi bazën e aplikimeve të bëra disa vite më herët.

Portofoli i pronave të Agasit nuk kufizohej vetëm te Petrela. Dosja evidenton prona dhe apartamente në Tiranë, Durrës dhe Lundër, përfshirë një garazh në kompleksin “Joy Residences”. Në bregdet, ai rezulton pronar i një vile në kompleksin “Green Coast” në Palasë, të blerë në mars 2022 për rreth 251 mijë euro. Në vitin 2025, Agasi bleu gjithashtu apartament dhe garazh në Tiranë me një vlerë totale prej 235 mijë eurosh.

Rritja e pasurisë shfaqet edhe te automjetet e shtrenjta që ai përdorte. SPAK evidenton në emër të tij një Land Rover Defender të vitit 2023, të marrë në vitin 2024 përmes shkëmbimit me një Range Rover që Agasi zotëronte më parë.

Përveç pronave dhe automjeteve, hetimi identifikoi edhe disa llogari bankare me shuma të konsiderueshme në lekë dhe euro. Vetëm një llogari në Credins Bank kishte një bilanc prej rreth 55.6 milionë lekësh, ndërsa një tjetër në BKT kishte një vlerë ekuivalente me rreth 90.3 milionë lekë.

Prokuroria pretendon se ai ka përfituar rreth 10 milionë euro nga skema e dyshuar korruptive e lidhur me AKSHI-n. Vetëm gjatë kontrollit të një vile të lidhur me Agasin në resortin “Equos”, në Lundër, hetuesit gjetën arka me verë “Romanée-Conti” dhe shampanjë të shtrenjtë, me një vlerë që, sipas SPAK-ut, arrinte afërsisht 1 milion euro.

Tetë muaj në arrati

Pasi iu shmang arrestimit në dhjetor 2025, Ergys Agasi qëndroi për rreth tetë muaj në arrati. Por sipas burimeve policore dhe materialeve të hetimit të raportuara nga BIRN, ai nuk ishte tërhequr në një vend të largët apo jashtë vendit. Baza e tij kryesore dyshohet se ishte një godinë në Shkozet të Durrësit, pjesë e një kompleks vilash që policia e konsideronte si bazë të grupit të Elvis Doçit, alias “Visi i Pojës”.

Më 26 gusht, Agasi u mbajt nën vëzhgim për rreth 11 orë, nga Shkozeti drejt Elbasanit dhe më pas në kthim për në Durrës. Survejimi me dron u ndërpre për gati pesë orë pranë tregut agro-ushqimor në Elbasan, ndërsa në mbrëmje ai u lokalizua sërish dhe u arrestua në Plepa.

Në timonin e makinës ishte Uljan Shpataraku, ish-zyrtar i Policisë së Shtetit dhe ish-zëvendësdrejtor i Policisë së Elbasanit. Ai u arrestua në flagrancë për “përkrahje të autorit të krimit”. Gjatë periudhës në arrati, Agasi dyshohet se lëvizte mes Durrësit, Tiranës dhe Elbasanit dhe se vazhdonte të takohej e komunikonte me persona të lidhur me krimin e organizuar dhe funksionarë shtetërorë. Hetimet e mëvonshme treguan se ai nuk jetonte si një i arratisur i izoluar, por lëvizte në një territor relativisht të kufizuar dhe në zona ku policia kishte struktura të forta operative.

Informacionet për vendndodhjen e tij kishin qarkulluar në polici edhe përpara arrestimit. Megjithatë, ndërhyrja vendimtare erdhi vetëm pas ndryshimeve në drejtimin e Policisë së Shtetit dhe largimit si drejtor të Ilir Prodës gjatë verës së vitit 2026.

Në gjykatë, Uljan Shpataraku ka pretenduar se nuk e njihte Ergys Agasin dhe nuk e dinte se ishte person në kërkim; sipas versionit të tij, po kthehej nga Elbasani kur e mori rastësisht me autostop një burrë që iu prezantua me emrin “Berti” dhe i tha se merrej me duralumin.

Nga Policia tek SHISH-i

Arrestimi i Agasit nuk i dha fund hetimit mbi tetë muajt e arratisë së tij. Përkundrazi, telefoni, komunikimet dhe materialet e sekuestruara pas kapjes hapën një tjetër linjë hetimi, mbi personat  që e kishin ndihmuar në arrati dhe çfarë informacioni kishte marrë gjatë kohës që kërkohej nga drejtësia. Kjo linjë e çoi SPAK-un tek drejtuesja e Shërbimit Informativ të Shtetit.

Më 21 shtator 2026, Gjykata e Posaçme vendosi masën “arrest në shtëpi” dhe pezullimin nga detyra për drejtoreshën e SHISH-it, Vlora Hyseni, në kuadër të të njëjtit procedim penal që kishte nisur me hetimin e tenderëve të AKSHI-t. Ajo u mor nën hetim për “përkrahje të autorit të krimit” dhe “nxjerrje të sekretit shtetëror ose të shërbimit”.

Në qendër të dyshimeve janë komunikimet mes Hysenit dhe Agasit gjatë periudhës kur ky i fundit ishte në kërkim. Materialet e dosjes të raportuara në media flasin për qindra telefonata, mesazhe dhe komunikime përmes aplikacionit Signal deri pak ditë përpara arrestimit. Në disa prej tyre, Hyseni dyshohet se i përcillte Agasit informacione mbi takimet dhe aktivitetin e saj zyrtar, ndërsa SPAK po heton nëse ai ka marrë edhe të dhëna që lidheshin me veprimet e strukturave policore dhe me vetë situatën e tij si person në kërkim.

Hyseni ka dhënë një shpjegim tjetër për kontaktet. Sipas raportimeve mbi dëshminë e saj në SPAK, ajo ka pranuar komunikimin e vazhdueshëm me Agasin, por ka pretenduar se ai ishte një bashkëpunëtor i SHISH-it. Në gjykatë ajo ka mohuar se i kishte dhënë materiale sekrete shtetërore.

Një tjetër element i hetimit janë materialet e gjetura pas arrestimit të Agasit. Sipas raportimeve që i referohen dosjes, hetuesit kanë sekuestruar në automjetin e tij nëntë faqe me të dhëna që dyshohet se përmbanin informacion të prodhuar nga SHISH-i. Hyseni është pyetur për origjinën e tyre, ndërsa ka mohuar se ia kishte dhënë ajo Agasit.

Natyra, klasifikimi dhe mënyra se si këto materiale kanë përfunduar në posedimin e tij mbeten çështje të hetimit dhe nuk janë provuar ende përfundimisht në gjykatë.

Gjykata e Posaçme ka vendosur një masë sigurie që ndalon publikimin e akteve të dosjes hetimore ndaj Vlora Hysenit. Megjithatë, pyetje të rëndësishme mbeten ende pa përgjigje edhe për ngjitjen meteorike të Ergys Agasit – nga inspektor mjedisi në biznesmen me pasuri të mëdha dhe, sipas SPAK-ut, në drejtues të dyshuar të një grupi të strukturuar kriminal. Të dhënat e bëra publike deri tani sugjerojnë se ndikimi i tij kishte depërtuar deri në nivelet më të larta të politikës dhe institucioneve të sigurisë, një tjetër dëshmi e brishtësisë së shtetit shqiptar përballë korrupsionit dhe depërtimit të krimit të organizuar./BIRN