Anëtari i Këshillit Kombëtar të Partisë Demokratike, Ilir Alimehmeti, duke folur në emisionin “Puls” nga Bruna Çifligu në A2CNN theksoi se protesta qytetare duhet të marrë një drejtim politik, pasi përndryshe nuk i arrin dot 5 kërkesat e veta. Ndër të tjera Alimehmeti vë në dukje se nevojitej një shkundje e gjithë sistemit politik dhe establishmentit të krijuar nga Edi Rama.

“Po bëjnë një protestë jashtëzakonisht të bukur, me diferenca të qarta, mosha, qytetaria, rregullsia le të themi. Nuk mendoj që një protestë s’ka organizatorë, por s’i kemi publik. Kjo është gjëja më e parëndësishme në këtë moment. Nevojitej një shkundje e gjithë sistemit politik, establishmentit të krijuar nga Rama. Ato 5 pikat që kanë kërkuar, mbështeten gjerësisht, qoftë nga opozita, por sidomos nga njerëzit. Çdo lloj proteste, lëvizje merr një drejtim politik. Pjesa s’ka politik, s’ka politik, s’i jep zgjidhje. Por kërkesat janë thellësisht politike, dhe është e nevojshme hyrja në këtë lloj diskutimi. Çdo qytetar duhet ta mbështesë si protestë. Kërkohet një fushë e pastër dhe garë e barabartë. Unë jam personalisht në bulevard dhe 5 kërkesat që ata kanë janë shumë të drejta dhe i mbështes. Brenda protestës ka 10-12 grupime të ndryshme, politike, apo parapolitike. Secili jashtë 5 objektivave madhore ka edhe objektivat e veta”, shprehet Alimehmeti.

“Demokracia dhe liria janë më shumë sesa vlera për t’u çmuar; ato mund të jenë vetë kushti i domosdoshëm për mbijetesën tonë.”

Kështu do e përshkruante një prej gjuhëtarëve dhe mendimtarëve amerikanë më me ndikim në shek. XX dhe XXI, Noam Chomsky, atë që prej 8 ditësh po ndodh në shesh, ku mijëra protestues duket se kanë kuptuar pas 13 vjetësh pushtet se demokracia dhe liria kanë qenë në rrezik gjatë qeverisjes së Ramës!

Por ajo që është tejet interesante është se për vite me radhë, qeveria e Kryeministrit Rama ka investuar në ndërtimin e një imazhi pozitiv të Shqipërisë në arenën ndërkombëtare dhe ka dominuar mbi retorikën mediatike në vend!

Çdo vit, në dhjetëra intervista në mediat më prestigjioze botërore, te promovimi i turizmit, investimeve dhe reformave, kryeministri Rama ka synuar të paraqesë një vend në zhvillim dhe një qeveri me mbështetje absolute popullore. Shumë herë në samite ndërkombëtare është shfaqur me stilin e tij provokativ në të veshur apo në sjellje, duke e etiketuar atë si një lider “avangard”.

Por protesta e ditëve të fundit duket se po teston këtë imazh. Këtë e solli dukshëm në pah përplasja e drejtpërdrejtë e tij me mediat prestigjioze botërore!

Një nga momentet më të komentuara ishte intervista e kryeministrit me gazetaren e CNN, Isa Soares. Pyetjet e saj mbi protestat dhe pakënaqësitë e shfaqura në rrugë e vunë Ramën përballë një diskutimi të ndryshëm nga ajo që qeveria promovonte zakonisht. Kësaj here fokusi nuk ishte te turizmi apo investimet, por vëmendja është kthyer tërësisht te protestat, korrupsioni dhe perceptimi i qytetarëve për qeverisjen.

Kryeministri Rama u komentua për sjellje arrogante ndaj gazetares, disa herë me tone të papërshtatshme, edhe pse gazetarja ishte tërësisht korrekte dhe etike ndaj tij!

“Let me finish!” u bë refreni i zotit Rama, duke e vënë disi në vështirësi në një intervistë ku në qendër ishte llogaridhënia dhe jo propaganda.

Ndërkohë, protesta ka hyrë në ditën e nëntë, duke treguar një qëndrueshmëri që bie ndesh me pretendimet e qeverisë se bëhet fjalë për një pakicë të izoluar.

Një nga debatet e ditëve të fundit lidhet me numrin e protestuesve. Kryeministri dhe eksponentë të mazhorancës kanë minimizuar vazhdimisht pjesëmarrjen, ndërsa pamjet filmike të publikuara nga media të ndryshme dhe nga vetë qytetarët tregonin të kundërtën. Madje duket se numri i tyre është gjithnjë e në rritje.

Gjatë kësaj jave, kanë qenë të pranishme edhe teoritë konspirative, ku një nga episodet më të komentuara ishte deklarata e ministrit Taulant Balla lidhur me automjetin teknik të agjencisë mediatike Reuters. Automjeti u paraqit fillimisht si “makinë serbe” dhe e lidhur me “agjentura” destabilizuese. Përpara se lajmi të sqarohej apo të konfirmohej, ai u shpërnda masivisht në media dhe në rrjetet online!

Vetëm pak orë më pas, gazetari Gjergj Erebara tha se bëhej fjalë për automjete të përdorura nga një prej agjencive më të mëdha të lajmeve në botë. Episodi më pas u kritikua dhe u interpretua si një përpjekje për të delegjitimuar raportimin ndërkombëtar mbi protestat.

Alarmi në qeveri u ndez kur protesta u bë lajm ndërkombëtar në thuajse të gjitha mediat botërore, kështu që kryeministri Edi Rama u dërgoi disa mediave dhe organizatave ndërkombëtare një letër, ku kundërshtonte mënyrën se si po pasqyroheshin zhvillimet në Shqipëri. Paralelisht, ai akuzoi CNN se algoritmet e rrjeteve sociale dhe mekanizmat e shpërndarjes së përmbajtjes po krijonin një perceptim të shtrembëruar për atë që po ndodh në vend!

Vëmendja ndërkombëtare ndaj protestës nuk ka ardhur vetëm nga CNN. Zhvillimet janë pasqyruar nga agjenci dhe media të njohura ndërkombëtare si Reuters, Associated Press, Euronews, Deutsche Welle dhe media të tjera rajonale e evropiane që kanë raportuar mbi protestën!

Fakti që protesta ka arritur të depërtojë në axhendën e mediave të huaja përbën një sfidë të veçantë për qeverinë, e cila prej vitesh ka investuar në promovimin e Shqipërisë si një histori suksesi politik, ekonomik dhe turistik. Vazhdimisht, kryeministri ka zgjedhur të publikojë në rrjetet sociale postime që fokusohen te mbeturinat e lëna pas në Zvërnec.

Një tjetër episod që ka tërhequr vëmendje është ai me gazetarin Mustafa Nano. Gjatë debatit publik, Rama zgjodhi t’i referohej rolit të tij si ambasador, duke rrëfyer personalisht se i ishte propozuar në zyrë posti i ambasadorit.

Në të dyja rastet, episodet tregojnë për mënyrën se si operohet në vend, pra miqësisht e jo institucionalisht, ndërkohë që pastrimi i zonave të mbrojtura po ashtu është detyrë e qeverisë!

Për herë të parë pas shumë kohësh, qeveria po përballet jo vetëm me protesta të vazhdueshme, por edhe me raportim ndërkombëtar kritik, duke sjellë ndoshta momentin më të vështirë për Edi Ramën, që nuk lidhet vetëm me vetë protestën, por me rrezikun e çarjes së mekanizmit propagandistik që ka krijuar ndër vite, brenda dhe jashtë vendit!/acqj.al

Kryeministri Edi Rama pretendoi se vala e protestave po dëmton turizmin dhe po sjell anulimet e para, por përvojat e vetë turistëve që i janë bashkuar protestuesve dhe agjencitë turistike dëshmojnë të kundërtën.

Një video e publikuar në Instagram të dielën në darkë, ku një turist amerikan filmonte veten i buzëqeshur mes protestuesve në rrugët e Tiranës u pa më shumë se 280 mijë herë brenda 12 orëve.

I riu në video është Gabriel Bolling, një 22 vjeçar nga Florida, i cili erdhi në Shqipëri në një udhëtim të planifikuar për të zbuluar vendin, por e pa veten të përfshirë nga entuziasmi i të rinjve shqiptarë që marshonin duke kërkuar dorëheqjen e kryeministrit dhe anulimin e një projekti masiv turistik në lagunën e mbrojtur të Nartës.

“Pjesmarrja në këtë protestë ishte një përvojë thellësisht transformuese,” tha Bolling për BIRN.

“Ajo mishëron pikërisht atë që duhet të jetë një lëvizje qytetare: paqësore, me jehonë dhe e palëkundur. Energjia ishte e prekshme dhe më dha një ndjenjë të re shprese, besimin se po jetojmë një moment kthese, kur njerëzit po zgjedhin më në fund të shohin përtej interesit financiar dhe të luftojnë për atë që është moralisht e drejtë,” shtoi ai.

Edhe pse e kishte planifikuar udhëtimin e tij më herët, Bolling thotë se protesta do të ishte “një arsye e fortë për të ardhur në Shqipëri’.

Edhe Brett Pavel, 74 vjeç nga Kolorado e Shteteve të Bashkuara u është bashkuar protestave së bashku me bashkëshorten e tij, ndërsa po shijojnë bregdetin e Vlorës në vizitën e tyre të dytë në Shqipëri.

Pavel ka postuar në profilin e tij në Facebook dhe në faqet turistike video në protestën e organizuar në Durrës të dielën, duke mbajtur në duar një pankartë me mbishkrimin “Shpëtoni Nartën”.

“Mora pjesë në protestën në Durrës, sepse mbështes plotësisht të drejtën e qytetarëve shqiptarë për të mbrojtur vendin e tyre nga interesat grabitqare të miliarderëve të huaj, si edhe për të mbrojtur një thesar të egër natyror,” tha Pavel në një përgjigje me email për BIRN.

Ai thotë se po planifikon që të marrë pjesë edhe në protestat e tjera që organizohen në Vlorë apo Durrës gjatë qëndrimit të tij në këto qytete.

Në një nga deklaratat e tij, kryeministri Edi Rama pretendoi se protestat e mijëra njerëzve po ndikonin negativisht turizmin dhe sipas tij, kishin nisur anulimet e para të prenotimeve për sezonin e verës.

Por deklaratat e Ramës nuk mbështeten nga dhjetra video entuziaste të të huajve nga protestat si dhe nga operatorët turistikë të vendit.

Ndryshe nga pretendimet e kryeministrit, drejtuesit e shoqatave të operatorëve turistikë i thanë BIRN se protestat nuk kanë deri më tani ndonjë impakt te numri i rezervimeve, ndërkohë që bashkimi i turistëve të huaj në protestë ka sjellë një energji pozitive.

“Nuk ka anulime, nuk ka impakt, por as mund të themi që protesta po e rrit turizmin,” thotë Kliton Gërxhani, kryetari i Shoqatës Shqiptare e Turoperatorëve & Agjencive Turistike.

“Këto videot në rrjetet sociale janë të bukura, duket se ka një simpati, por nuk besoj se një turist ndikohet në planifikimin e pushimeve të tij për të ardhur nga kjo gjë,” shtoi ai.

Edhe Aneo Hila, që punon prej 17 vitesh në sektorin e turizmit si menaxher i Albanian Eagle Tours, thekson se protestat për momentin nuk kanë sjellë asnjë ndryshim në sektor.

“Por ka një energji pozitive bashkimi i turistëve të huaj në protestë,” tha ai për BIRN, duke shtuar se ndikimi i kësaj energjie do të mund të analizohet në fund të sezonit të verës nëse ka arritur të ndikojë në rritjen e interesit për të vizituar Shqipërinë.

Për Hilën, situata mund të prodhojë potencialisht dy efekte; rritjen e turizmit për shkak të admirimit me të cilin turistët e huaj po e përcjellin protestën, por edhe një lloj frenimi për shkak të një krize potenciale sigurie.

Por Hila vetë beson se jehona e protestave është pozitive dhe mund të rrisë interesin për të vizituar Shqipërinë.

Edhe Ornela Liperi, kryeredaktore e revistës ekonomike “Monitor” mendon se protestat po shënojnë një rritje të imazhit të Shqipërisë në botë dhe do të sjellin vetëm përfitim për turizmin në afatgjatë për shkak të kauzës së tyre ambientaliste.

“Pra, edhe nëse do të ketë ndonjë efekt negativ në afatin e shkurtër, që nuk besoj, pasi sidoqë të jetë në Shqipëri nuk ka luftë, në afatgjatë, përfitimi është vetëm pozitiv në këndvështrimin e përmirësimit të imazhit të vendit,” tha Liperi.

Liperi vlerëson se deklaratat e Ramës për ‘trembje të turistëve” kanë si synim zhvlerësimin e rolit të protestave që kanë marrë tashmë vëmendje ndërkombëtare.

Duke iu referuar përhapjes masive të protestës në media sociale të huaja, ku shpërndahen videot e shumta me imazhet e zonave turistike e të paprekura të vendit, nga jugu e deri në veri, Liperi thotë se kjo e ka rritur imazhin e Shqipërisë dhe shqiptarëve në një nivel tjetër, larg imazhit të kriminelëve që pëshkruhen nëpër filma apo media. /BIRN