Ish-Ministri i Jashtëm, Ditmir Bushati, në përkujtim të 81 vjetorit të ndarjes nga jeta të poetit të madh shqiptar Migjeni (pseudonimi i Millosh Gjergj Nikollës), ka zgjedhur pikërisht poezinë e tij “Zgjimi” për të përshkruar edhe realitetin që po kalon vendi.
“O vullnete të ndrydhura! O vullnete të shtypuna! Shkundni prangat të mbrapshta!” thuhet ndër të tjera në vargjet e Migjenit, ndërsa Bushati nuk dihet se kujt i bën thirrje për zgjim, politikës që e ka futur vendin në krizë, apo popullit që vazhdon dhe i mban mbi kurriz mbrapshtësitë e saj.
ZGJIMI
O vullnete të ndrydhuna ndër grushta të çelikta të shekujve të kaluem!
O vullnete të shtypuna me themra të ngurta të titajve të tërbuem!
Të cilët n’udhë për në theqafje këtejpari i ranë
dhe vatrat tona në mjerim i përlanë…
O vullnete të ndrydhura!
O vullnete të shtypuna!
Shkundni prangat të mbrapshta! E me brimë ngadhnyese,
me hove viganash, dëshirash flatruese,
turniu në të gjitha anët dhe poshtë në dhë zbritni
– ndosht’ aty keni për të gjetë fillin e një hymni,
që Illyri e vjetër ndër kremtime këndonte,
ndërsa zemra e kombit në liri kumbonte.
O vullnete të ndrydhuna!
O vullnete të shtypuna!
Tash shëgjetat e flakta të shprehjes suej zharitse
drejtoni kah qiella në ball të hyut a të dreqit,
i cili fatin tonë mbytte në mnijë të vet përpise –
a dijë se të Birt’ e Shqipes folen ia ngrehën vetvetit.
