Kryebashkiaku i kryeqytetit, Erion Veliaj, ka reaguar pas sekuestrimit të inceneratorit të Tiranës. Veliaj thotë në një postim në rrjetet sociale se sekuestrimi dhe hetimet e SPAK janë mëse të mirëpritura në rrugën e zbardhjes së veprimtarisë së paligjshme të atyre që kanë abuzuar me publikun.
“Histeria e portaleve të baltës tregon vetëm që baltaxhinjtë e udhëhequr nga ‘Non Gratat’ s’e kanë marrë vesh akoma që jemi në epokë tjetër! Sekuestrimi dhe heqja nga duart e subjektit privat të impiantit të mbetjeve të Tiranës si rezultat i hetimeve të SPAK është mëse i mirëpritur në rrugën e zbardhjes së veprimtarisë së paligjshme të kujtdo që ka abuzuar në dëm të interesit publik”, tha Veliaj.
Veliaj shprehet ndër të tjera se institucioni që drejton do të vazhdojë punën pa u ndalur.
“Bashkia e Tiranës ndërkohë do të vazhdojë pa u ndalur punën për një Tiranë që sot është pasqyrë pastërtie edhe si rezultat i transformimit të Sharrës nga një kancer urban në një fushë sanitare me standardet e duhura mjedisore. Koha punon për Tiranën dhe Shqipërinë Europiane, jo për kandilët e ‘Non Gratave’ që do të shkojnë drejt shuarjes”, shkroi ai më tej.
