Vassily Nebenzia, ambasadori i Rusisë në OKB, ka deklaruar se Ukraina është përgjegjëse për krizën mes dy vendeve, e cila degradoi deri në sulmimin e territoreve ukrainase nga ushtria ruse.
Ai tha në Asamblenë e Kombeve të Bashkuara se Ukraina për vite me radhë ka sabotuar dhe shpërfillur detyrimet e saj sipas Paketës së Minskut.
“Rrënja e krizës aktuale qëndron në veprimet e vetë Ukrainës. Për shumë vite ajo sabotoi dhe shpërfilli detyrimet e saj të drejtpërdrejta sipas paketës së masave të Minskut. Vetëm kohët e fundit kishte një shpresë se në Kiev ata do të rishqyrtonin dhe se ata me të vërtetë do të pajtoheshin me atë që nënshkruan në 2018”, u shpreh ai.
Nebenzia tha se Ukraina nuk kishte qenë e gatshme të angazhohej në dialog dhe t’i jepte status të veçantë Donbasit. “Kjo përfundimisht na bindi për faktin se ne nuk kemi më të drejtë të lejojmë që banorët e Donbasit të vuajnë më tej”, tha ai.
“Veprimet ruse po shtrembërohen dhe pengohen, numri i falsifikimeve është marramendës, me mediat dhe rrjetet sociale që i përhapin këto gënjeshtra”, shtoi ai.
Rusia e ka akuzuar Ukrainën më herët për gjenocid në Ukrainën lindore dhe se drejtohet nga nazistët.
