Në sytë e Brukselit, progresi i Shqipërisë në rrugën e anëtarësimit në Bashkimin Europian duket i mrekullueshëm.
Ky ishte mesazhi që konfirmoi në Tiranë Presidentja e Komisionit Europian, Ursula von der Leyen.
Në prag të nisjes së Forumit të Investimeve BE- Ballkani Perëndimor, ajo u takua me Presidentin Bajram Begaj dhe kryeministrin Edi Rama teksa konfirmoi se Brukseli planifikon të hapë të gjithë kapitujt deri në fund të vjeshtës së këtij viti.
Në një konferencë të përbashkët, me kryeministrin Edi Rama, Von Der Leyen e vlerësoi këtë të fundit lidhur me progresin që Shqipëria ka bërë deri më tani. Madje u shpreh se është e impresionuar.
“Ne të gjithë themi që kushti i zgjerimit bazohet në merita dhe Shqipëria i ka të gjitha meritat. Siç i thashë është një proces normal dhe të punojmë me reformat për Integrimin në BE. Për mua është impresionuese të shikoj shpejtësinë që kemi kaluar me reformat këto 2-3 vite. Jam e impresiunuar me ju z.kryeministër. Populli shqiptar e do integrimin në BE, dhe që thotë që këto reforma janë për ne, që të forcojmë demokracinë dhe të bëhet pjesë e BE. Kjo është e dukshme. Unë përmenda SEPA, përmenda roaming dhe planin e rritjes që po funksionon mjaft mire në Shqipëri. Do të kemi tani konferencën e investimeve. Prandaj unë mund të them që jam e impresionuar nga fryma që gjej në Shqipëri dhe në ambicien tuaj që deri në vitin 2027, Shqipëria të bëhet pjesë e BE-së”, tha Von Der Leyen.
Ndërsa kryeministri Edi Rama theksoi se brenda 2027 do të mbyllin të gjithë grupkapitujt. Ai tha se vendi ynë është me fat që ndodhet mes të Evropës dhe ka mbështetjen e BE-së, pasi përndryshe do ta kishte të vështirë rrugën e saj drejt një shteti tërësisht demokratik.
“Në fillim kur thuhet 2027, do të thotë që brenda 2027, do të mbyllen kapitujt. Nuk e kuptoj pyetjen se çfarë pritshmërish ke? Pritshmëria është që brenda 2027 të mbyllen kapitujt dhe ne duhet të bëjmë të gjithë detyrat këtu dhe janë të mirëpërcaktuara kapitull për kapitull dhe plus edhe në planin e rritjes. Kështu që nëse sot ne marrim një vlerësim kaq pozitiv, vjen si rezultat i detyrave të bëra deri tani. Por që të vazhdojmë të marrim vlerësimin, duhet të vazhdojmë detyrat dhe detyrat nuk i bëjmë se sa e kërkon BE, as që të kënaqim ata që nesër do të na miratojnë anëtarësimin në Paris, Berlin apo se do thoja Londndër por Londra ka ik në drejtim të paditur…apo në Romë. Ne i bëjmë detyrat për veten tonë. Çdo detyrë që bëhet këtu me sukses, e bën Shqipërinë më të fortë dhe më funksionale si shtet. Për ne procesi i negociatave, i hapjes dhe mbylljes së kapitujve është proces shtetbërje demokratike. Kur BE të thotë ne mbaruam tonë, dmth se Shqipëria merr një certifikatë që në bazë të opinionin të KE, jemi shtet funksional demokratik. Kjo është për shqiptarët, më pas ne mund të hyjmë në BE dhe vazhdon procesi i përmirësimit. Edhe gjermanët që janë mbajtur me dekada si më të përsosurin nuk janë aq të përsosur sa i dinim dhe tani e kuptojnë dhe vet. Për ne është fat që jemi në mes të Evropës dhe që kemi BE që na shoqëron në këtë proces. Nëse do ishim jashtë kontinentit do ta kishim të pamundur të bënim një shtet funksional demokratik për një mijë e një arsye”, tha Rama.
