Përballë dosjes së kopsitur të SPAK për korrupsionin me miliona euro në tunelin e Llogarasë, Zëvendëskryeministrja Belinda Balluku publikisht është shfaqur e qetë, duke marrë pjesë në aktivitete brenda dhe jashtë vendit, sikur të mos kishte ndodhur asgjë.
Po publikisht ajo ka shmangur komentet në lidhje me hetimet dhe akuzat e ngritura nga SPAK, ndërsa nën rrogoz po lëviz të gjithë gurët në Shqipëri dhe jashtë Shqipërisë, për të siguruar mbështetje politike dhe ekstraligjore.
Mësohet se në kohën që në Kuvend vartësit e saj prezantonin projektbuxhetin e Ministrisë së Infrastrukturës për vitin e ardhshëm, Belinda Balluku vetë ka qenë e zënë me një agjendë personale në Shtetet e Bashkuara të Amerikës.
Burimet pohojnë se Balluku ka udhëtuar drejt Shteteve të Bashkuara të enjten e javës së kaluar dhe është rikthyer në Tiranë ditën e diel.
Për këtë udhëtim të saj drejt SHBA nuk ka asnjë komunikim zyrtar, por jozyrtarisht konfirmohet se ajo është përpjekur që të sigurojë mbështetje në administratën amerikane përballë akuzave për korrupsion në Shqipëri.
Sa të suksesshme kanë qenë këto përpjekje koha do ta tregojë, por udhëtimi i saj matanë Atlantikut në këtë periudhë tregon se problemet e zv.Kryeministres shkojnë përtej drejtësisë shqiptare./Vox News
