Moti i keq vijon të shkaktojë problematika në disa zona. Në zonën e Tales, në Lezhë rritja e nivelit të ujit në lagunë ka dëmtuar argjinaturën, duke bërë që uji të depërtojë drejt zonave të banuara. Gjatë natës, mjetet e tonazhit të rëndë kanë punuar për të forcuar argjinaturën dhe për të minimizuar pasojat.
Situata paraqitet problematike edhe në Mirditë, ku aksi rrugor Rrëshen–Bukmir ka pësuar shembje në disa pika, duke rrezikuar bllokimin e qarkullimit.
Kryetari i Bashkisë Mirditë, Albert Melyshi, dhe Prefekti i Qarkut Lezhë, Taulant Malshi, u shprehën se ky segment ka pasur prej kohësh probleme të përsëritura, të cilat janë përkeqësuar më tej nga reshjet intensive. Rruga Rrëshen–Bukmir është një arterie kryesore që i shërben qindra banorëve dhe lidh fshatrat e Njësisë Administrative Kaçinar me qendrën urbane.
Edhe në qarkun e Vlorës situata vijon të jetë e rënduar, lumi Vjosa ka arritur në kuotën maksimale dhe ka dalë nga shtrati në pjesën e tregut pranë Urës së Mifolit. Rrezikohen që të përmbyten tokat bujqësore.
