Deputeti socialist Erion Braçe ka shprehur shqetësimin e tij për votimin e ndryshimeve në Kodin penal gjatë seancës maratonë të parlamentit, teksa ka lënë edhe një koment për kërkesën e SPAK ndaj Kuvendit për heqjen e imunitetit të zv/kryeministres Belinda Balluku dhe shtyrjes së mbledhjes së sotme (28 janar) të Këshillit të Imuniteteve, me pretendimin se pritet vendimi i Kushtetueses mbi pezullimin nga detyra.
Ligjvënësi socialist tha se ai nuk bën pjesë te Këshilli i Imuniteteve, pasi interesi i tij më shumë janë çështjet ekonomike, por ndau mendimin se “për sa kohë është nën hetim nga SPAK, zv/kryeministrja nuk ka imunitet”.
Pyetjes së gazetarit Stafa për këtë çështje ai iu përgjigj:
“Nuk ka imunitet sa kohë që duke u hetuar është pa imunitet. Është ngritur një akuzë për të, po hetohet dhe prezumohet e pafajshme deri një vendim të formës së prerë të gjykatës, se në Kuvend çfarë nuk dëgjova. Se si e koordinon punën Këshilli i Mandateve, pyesni kreun e Kuvendit”, tha ai.
Më tej ai shpjegoi se:
“Nuk jam pjesë e Këshillit të Mandateve, nuk e di jam larg kësaj historie se si funksionon, Këshilli i Mandateve është larg fushës time të kompetencës unë merrem drejtpërdrejtë me ekonomisë.
Më shqetëson ajo që pason pas miratimit të ndryshimit në Kodin Penal që u miratua dje. Po dal në zonën time në lagje të shoh pikërisht këtë gjë, Dje nuk e votova, është ligj qesharak”, tha ai.
