Ish-deputeti demokrat Ervin Salianji, i ftuar në “Quo Vadis” të moderatores Pranvera Borakaj, ka folur për lëvizjen e nisur prej tij në takime me qytetarë dhe simpatizantë të PD-së.
I pyetur nga gazetarët në studio se çfarë ka konstatuar në takimet me demokratët, Salianji tha se ata janë gënjyer dhe u janë treguar përralla për 13 vite, duke u thënë çdo javë: “Hajdeni në protestë se do të rrëzojmë Ramën”.
Pjesë nga biseda:
Çifligu: Meqenëse zoti Salianji ka disa muaj që ka nisur takimet me anëtarësinë, unë nuk kam kuptuar cili është qëllimi? E ke nisur me disa fjalime parimore, jo të forta, jo goditëse. Qëllimi është të ringremë PD-në. I vetmi moment kur kulmoi ishte përplasja e hapur me Nokën; dje apo pardje fole për zotin Berisha. Çfarë po synon të arrish? Çfarë besimi kërkon të arrish te demokratët, te elektorati gri?
Salianji: Unë dua ta bëj PD-në fituese. Kam nisur duke dëgjuar shqetësimin e mijëra demokratëve, të cilët mendojnë se me këtë rrugë nuk fitojmë dot.
Çifligu: Kush ua kërkoi? Kush jeni ju?
Salianji: Jam anëtar i Kryesisë së PD-së, kam mbajtur kosto dhe jam një prej figurave në PD që kam parë si fitohet. Kam fituar në 2021 në Korçë, kam fituar edhe në Kavajë. Në Korçë ka qenë rezultati më i mirë në vitin 2017. Lista e përfaqësuesve ka humbur rëndë në zgjedhje. Kam parë që PD ka qenë në gjumë letargjik. Të gjitha shqetësimet i kam thënë në mbledhje të Kryesisë. Pasi dola nga izolimi kam qenë në Kryesinë e PD-së dhe kam thënë: meqenëse janë vjedhur zgjedhjet, të dalim në rrugë. Opozita e ka detyrim të protestojë si formë reagimi në shtator; nuk dolën në protestë. Vetëm pasi unë nisa lëvizjet, PD doli në terren dhe filloi konkurrencën.
Çifligu: Çfarë ke konstatuar në takime?
Salianji: Të gjitha ato që kam thënë: ka demotivim te demokratët. Kanë 13 vite që dëgjojnë të njëjtat përralla. Nuk mund t’u thuhet javë për javë: “Hajde se do të rrëzojmë Edi Ramën”. Po ashtu, në PD nuk ka meritokraci.
Borakaj: Si bëtë ju karrierë në PD?
Salianji: Unë jam bashkuar në opozitë me PD-në në 2013, kam bërë fushatë 5 vjet dhe më pas kam ardhur si propozim i demokratëve në Korçë.
