Kryetari i PS njëherësh kryeministri Edi Rama në takimin e zgjeruar të Grupit Parlamentar Socialist, tha se protestat e flamingove në bulevard nuk ishin një sulm ndaj arritjeve të tri mandateve të para, por tregues i pritshmërive më të larta që sot kanë qytetarët shqiptarë.
Kreu i qeverisë theksoi se mësimi i parë që kanë marrë nga protesta është që faktet nuk mjaftojnë më, dhe bulevardi i flamingove s’duhet parë si protestë, por si pasqyrë që shoqëria i vuri përpara qeverisë.
“Kam sjellë dy dokumente që mishërojnë reflektimin tim përpara pasqyrës së bulevardit të flamingove. I pari është një dokument strategjik për kthesën që duhet të garantojë mandati i katërt, i dyti është një aneks për mënyrën si PS duhet ta mbështesë kthesën e mandatit të katërt. Po e nis me një episod që mund ta keni dëgjuar, qëlloi në ditët e qershorit, që një kryetar bashkie, shok i yni, më erdhi i acaruar me një grup qytetarësh që i kishin dalë në protestë për një problem në lagje. I kam gjetur në llum tha, s’kishin rrugë, trotuare, vetëm gropa, ferra, i bëra me rrugë tha, me trotuar, u vura dhe stola, por janë mosmirënjohës. Ai jemi ne të gjithë, sepse secili prej nesh e ka menduar qoftë edhe një herë atë fjalë të keqe kur i ka ardhur shpirti në maj të hundës, në marrëdhënien e punës me popullin. Ka menduar që janë mosmirënjohës. Kjo fjalë është pikënisja e prespektivës së re që na duhet. Në përmbajtjen e saj gjendet kuptimi më i gabuar i fazës së re ku ka hyrë Shqipëria. Dua t’ua them drejt e në sy atyre që protestuan ndaj kryetarit të bashkisë, atyre që dolën në bulevard gjatë qershorit, atyre që kanë protestuar qysh pas zgjedhjeve të qershorit të kaluar, ju s’jeni mosmirënjohës por matësi i ri standardeve tona“, tha Rama.
Kryesocialisti vuri në dukje se qytetarët sot jetojnë me pritshmëri që rriten më shpejt se sa mundësitë e qeverisë për t’u përgjigjur. Ai u shpreh se deviza e epokës së re që ka hapur bulevardi i flamingove është se “ka edhe më mirë”.
“Ju që mbushët bulevardit nuk protestuat kundër Shqipërisë që ne ndërtuam gjatë tre mandateve të para. Ata nuk dolën në bulveradin e flamingove për të sulmuar qeverinë dhe për t’u bashkuar këngës ‘Rama jepe dorëheqjen’. Ata që votuan për ne, dolën dhe u bashkuan me të tjerët, sepse forca përthithëse e protestës ishte më imponuese, se sa figura ime. Ata të administratës, dolën edhe ata, sepse Shqipëria e re nuk jeton me hijen e të vjetrës. Ata u mblodhën aq të shumtë, sepse i çoi një nevojë e thellë, e brendshme, për të përcjellë një mesazh më të fortë se sa përkatësia e partisë, apo qeverisë për të cilën mund të kenë votuar. Mësimi i parë që dua të ndaj është që faktet tona nuk mjaftojnë më. Ata sot jetojnë me pritshmëri që rriten më shpejt se sa mundësitë tona për t’u përgjigjur. Me fjalë të tjera s’mjafton më ta qeverisim të tashmen duke treguar çfarë bëmë deri këtu, por në harmoni me përvojat e përditshme të qytetarëve. Bulveardi i flamingove duhet parë jo si protestë, por si pasqyrë që shoqëria na i vuri përpara. Unë pashë mbylljen e një epoke dhe hapjen e një epoke tjetër. Deviza e kësaj epoke është ‘ka edhe më mirë’”, shtoi kryeministri.
