Kosova ka qenë sërish fokusi i takimit që presidenti rus dhe ai serb, Vladimir Putin dhe Aleksandër Vuçiç, zhvilluan të premten në Pekin. Kreu i shtetit serb, sikurse një ditë më parë më homologun kinez, mori mbështetje për qëndrimet kundrejt dialogut me Kosovën.
Rusia e ndjek me vëmendje çështjen e dialogut Prishtinë-Beograd dhe mban krahun e Serbisë sa herë që tema vihet për diskutim.
Ky mesazh iu përcoll të premten presidentit serb Aleksandër Vuçiç, nga homologu i tij rus, Vladimir Putin, gjatë një takimi në Pekin.
Mediet serbe raportojnë se kreu i shtetit i vuri në dijeni homologut të Kremlinit rezervat për vendimet e fundit qartësisht të njëanshme dhe diskriminuese të Prishtinës kundrejt vendit të tij.
Vuçiç paralajmëroi së shpejti një sërë masash konkrete si reagim ndaj qëndrimeve të Kosovës, veçanërisht taksimit të produkteve serbe në vlerën 100 për qind.
Putin theksoi mbështetjen e Rusisë në çdo hap që Serbia planifikon të ndërmarrë.
Takimi mes dy liderëve pason një tjetër sukses diplomatik të shënuar një ditë më parë mes presidentit Vuçiç dhe homologut kinez, Shi Xhinping, ku sërish u përqafuan synimet territoriale të Serbisë.
Më herët, presidenti serb ka thënë se konsultat me dy figurat më të pushtetshme në botë do i shërbejnë atij për të pasur një pozitë më të qartë strategjike në negociatat me Kosovën të hënën e ardhshme.
Në samitin e Berlinit që do të mbahet me ndërmjetësimin e kancelares Angela Merkel dhe presidentit francez, Emanuel Makron, krerët politikë të Prishtinës dhe Beogradit do të tentojnë edhe një herë të përvijojnë planet e pajtimit dhe mundësisht arritjen e një marrëveshjeje gjithëpërfshirëse brenda disa muajve.
