Drejtuesit e bizneseve në krah të autostradës Tiranë-Durrës protestojnë për mbylljen e rrugëve nga ARRSH. Duke qenë se këto “pika” apo dalje direkte në autostradë ishin bërë burim aksidentesh, u vendos që të mbylleshin një javë më parë.
Mirëpo, bizneset e quajnë të gabuar këtë vendim dhe kërkojnë akses në rrugën dytësore në mënyrë që të vazhdojnë aktivitetin. Edhe deputeti i zonës Agron Duka, thotë se qevria duhet të marrë masa pasi jemi në prag festash dhe bizeset janë goditur rëndë nga pandemia.
“Duke ndjekur me vëmendje shqetësimet e qytetarëve të Durrësit dhe jo vetëm, konkretisht si Deputet i Durrësit, i bashkohem shqetësimit të madh që çdo biznesë po preket nga vendimi i menjëhershëm i ARRSH për mbylljen e akseve të rrezikshme që shpesh hërë janë bërë burim aksidenti.
Edhe pse në prag festash, edhe pse pandemia ka dhënë efektin e saj negativ, shqiptarët përballen dhe me vendimin e nxituar të ARRSH duke mos i dhënë mundësi alternative që biznesi mos të shkojë në faliment. I bëjë thirrje qeverisë të marrë masa në planifikimin e hapjeve të rrugëve dytësore në të cilën bizneset të kryejnë normalisht aktivitetin e tyre tregtarë dhe familjarë”, shkruan Duka.
