Kryeministri i ri i Britanisë së Madhe, Rishi Sunak, dhe presidenti i Francës, Emmanuel Macron, raportohet se janë zotuar të bllokojnë kalimet e emigrantëve me gomone, përmes kanalit të La Manshit.
Në një telefonatë të premten në mëngjes, kryeministri dhe presidenti francez u angazhuan për “thellimin e partneritetit” në mënyrë që “të pengojnë udhëtimet vdekjeprurëse nëpër Kanal që përfitojnë kriminelët e organizuar”.
Një zëdhënës i qeverisë britanike ka thënë për mediat vendase se “Kryeministri theksoi rëndësinë që të dy vendet ta bëjnë rrugën e Kanalit plotësisht të paqëndrueshme për trafikantët”.
Presidenti francez aktualisht po shqyrton një marrëveshje të re me Mbretërinë e Bashkuar që do të rinovonte një marrëveshje të vitit 2021, e cila e shihte Britaninë të kontribuonte me 54 milionë funte për të paguar për një dyfishim të policisë në plazhe, drone dhe pajisje të tjera vëzhgimi.
Suella Braverman, Sekretarja e Brendshme, beson se përqindja e emigrantëve të ndaluar nga francezët para se të arrijnë në det duhet të rritet nga 42.5 për qind aktualisht, në 80 ose 90 për qind nëse duan të thyejnë modelin e biznesit të kontrabandistëve të njerëzve duke e bërë atë joekonomike.
Ajo dhe zyrtarët e saj kanë qenë në bisedime me homologun francez Gerald Darmanin për të rënë dakord për një “paketë ambicioze masash” që u premtua në fillim të këtij muaji nga Liz Truss dhe presidenti Emmanuel Macron që synon “t’i japë fund udhëtimeve të rrezikshme nëpër Kanal”.
Robert Jenrick, ministri i ri i imigracionit, tha se qeveria do të përpiqet të ndërtojë një marrëdhënie më “konstruktive” me Francën për të trajtuar imigracionin tani që zoti Sunak është kryeministër. Ai tha gjithashtu se qeveria duhet të “marrë kontrollin” në një numër frontesh, duke përfshirë edhe numrin e shqiptarëve që arrijnë në Mbretërinë e Bashkuar.
“Ne po shqyrtojmë nëse ka një rrugë të caktuar për shqiptarët që rastet e tyre të dëgjohen shpejt dhe të largohen nga vendi nëse nuk konstatohen të jenë të suksesshme, të kthehen në Shqipëri.
Dhe ne po shikojmë gjithashtu diplomatikisht se si mund të punojmë me qeverinë në Shqipëri dhe në koalicion me vendet me të njëjtin mendim, si Franca, për të arritur një marrëveshje me Shqipërinë”, ka thënë ministri.
