Lorenc Shehu gazetari dhe realizuesi i Emisionit Gjurmët në Zjarr tv, është vlerësuar me titullin “Mirënjohja e qytetit” të Deçanit nga kryetari i komunës Bashkim Ramosaj. Ceremonia u organizua në 24 shkurt 2026, në zyrën e kryetarit të Komunës Deçan në Kosovë.
Ky vlerësim iu dha gazetarit Lorenc Shehu që realizon emisionin “Gjurmët”, me motivacionin: “Për kontributin e jashtëzakonshëm në afirmimin e personaliteteve të shquara shqiptare dhe vlerave që ata përfaqësojnë gjithandej në trojet shqiptare”.
Përmes këtij emisioni, gazetari Lorenc Shehu ka sjellë në vëmendje histori frymëzuese, figura të shquara, tradita dhe ngjarje që pasqyrojnë identitetin dhe trashëgiminë historike, kulturore shqiptare por jo vetëm.
“Mirënjohja e qytetit” të Deçanit përbën një nder të veçantë për gazetarin, duke vlerësuar punën e tij të palodhur në shërbim të informimit, kujtesës historike dhe promovimit të vlerave kombëtare. Ky vlerësim nga Komuna e Deçanit është një dëshmi e rëndësisë që ka media në forcimin e identitetit dhe në lidhjen shpirtërore të shqiptarëve brenda dhe jashtë trojeve të tyre.
Ky moment shënon një tjetër arritje të rëndësishme në rrugëtimin profesional të Lorenc Shehut dhe një motivim për të vijuar misionin e tij në promovimin e historisë, kulturës dhe vlerave shqiptare. Gazetari Lorenc Shehu është vlerësuar më parē me ” Mirënjohje” nga Lidhja Shqiptare në Botē, me qendër në Bern të Zvicrës. Gjithashtu dhe Ramush Haradinaj i ka akorduar gazetarit Lorenc Shehu medaljen ” Me besim në zot, atdhe dhe shtet”. Prej vitit 2020 e nē vazhdim, gazetari Lorenc Shehu e transmeton Emisionin Gjurmët në Zjarr tv.
