Kryeministri Edi Rama tha se është këshilluar që të ndërtohet një spital privat brenda spitaleve shtetërore në vend, në mënyrë që të ndihmohen mjekët financiarisht.
“Ne kemi mjekë shumë të mirë, të thonë çfarë të duan, por këtë gjë e kam konstatuar në biseda me jo pak të huaj që kanë pasur praktika të përbashkëta. Kemi mjekë dhe infermierë shumë të mirë., Problemi ynë është menaxhimi, sepse nuk e kemi traditë”, tha Rama gjatë një vizite në Spitalin Rajonal të Lezhës, përcjell A2.
“Duke diskutuar me nja dy grupe shumë të mëdha për të hyrë në marrëdhënie menaxhimi, të dy pavarësisht nga njëri-tjetri, thonë që është kyç që të ndërtohet brenda spitalit, një spital privat, për mjekët e spitalit. Dhe të jetë pjesë e sistemit të punës së mjekëve të spitalit, në mënyrë që t’u japim mundësinë që ta kenë spitalin si vendin ku janë bashkëpronarë dhe të kenë një kapacitet të ardhurash që varion në bazë të performancës”.
“Plus e dyta është që ne duhet patjetër të fillojmë të vendosim tarifa për turistët”, shtoi kryeministri.
