Një ngjarje e rëndë ka ndodhur mbrëmjen e së dielës, 23 gusht, në fshatin Kërvasari të Malishevës, ku një çift bashkëshortor është plagosur me armë zjarri.
Sipas zëdhënëses së Policisë për rajonin e Gjakovës, Vlera Krasniqi, ata janë gjetur të plagosur në dhomën e tyre të gjumit.
Të plagosurve u është dhënë ndihma e parë mjekësore dhe më pas janë dërguar për trajtim në Qendrën Klinike Universitare të Kosovës (QKUK).
Sipas burimeve nga QKUK, 25-vjeçarja ishte 7-muajshe shtatzënë. Pavarësisht përpjekjeve të mjekëve, ajo nuk ka mundur t’u mbijetojë plagëve dhe ka ndërruar jetë.
Ndërkohë, bashkëshorti i saj, 26-vjeç, ndodhet në gjendje shumë të rëndë. Ai është i intubuar dhe po i nënshtrohet ekzaminimeve të nevojshme.
Deri më tani nuk janë bërë të ditura detaje të tjera lidhur me rrethanat e ngjarjes apo autorin e dyshuar.
