Presidenti i Republikës, Bajram Begaj, priti këtë të shtunë në Presidencë ambasadorin e ri të Shteteve të Bashkuara në Shqipëri, Eric Wendt, i cili paraqiti zyrtarisht Letrat Kredenciale, duke nisur mandatin e tij diplomatik në vend.
Gjatë ceremonisë, Kreu i Shtetit i uroi ambasadorit Wendt suksese në detyrën e re dhe rikonfirmoi angazhimin e Shqipërisë për forcimin e partneritetit strategjik me Shtetet e Bashkuara.
Begaj theksoi se Shqipëria do të vijojë të angazhohet në thellimin e marrëdhënieve dypalëshe, duke u mbështetur te prioritetet e politikës së jashtme dhe përgjegjësitë që burojnë nga bashkëpunimi i ngushtë mes dy vendeve.
“Shtetet e Bashkuara janë një partner i pazëvendësueshëm për avancimin e interesave kombëtare”, u shpreh Presidenti Begaj.
Pas ceremonisë së pranimit të Letrave Kredenciale, Presidenti Begaj dhe ambasadori Eric Wendt zhvilluan edhe një takim kokë më kokë.
